Mətyu Brayzə: Prezident Obamanın məni səfir postuna təyin etməsi onun ABŞ-Azərbaycan əlaqələrinə böyük önəm verdiyini göstərir

Bakı:

17 °C

77 %

4 m/s

AZ RU EN

Ana səhifə / Siyasət / Mətyu Brayzə: Prezident Obamanın məni səfir postuna təyin etməsi onun ABŞ-Azərbaycan əlaqələrinə böyük önəm verdiyini göstərir

Mətyu Brayzə: Prezident Obamanın məni səfir postuna təyin etməsi onun ABŞ-Azərbaycan əlaqələrinə böyük önəm verdiyini göstərir

18.02.2011 [10:54]

“Prezident Obamanın məni səfir postuna təyin etməsi onun ABŞ-Azərbaycan əlaqələrinə böyük önəm verdiyini göstərir”. AzərTAc xəbər verir ki, bu sözləri Amerika Birləşmiş Ştatlarının ölkəmizdə yeni təyin olunmuş fövqəladə və səlahiyyətli səfiri Mətyu Brayzə dünən keçirdiyi mətbuat konfransında deyib. Brayzə qeyd edib ki, Bakıya gəlməzdən əvvəl ABŞ Prezidenti Barak Obama və dövlət katibi Hillari Klinton ona iki ölkə arasında əlaqələrin, dostluğun və tərəfdaşlığın çox vacib olduğunu bildiriblər.
ABŞ diplomatı deyib ki, Prezident Obamanın təlimatlarına əsasən iki ölkə arasında əməkdaşlığın və tərəfdaşlığın daha da gücləndirilməsi üçün əlindən gələni edəcək.
Brayzə vurğulayıb ki, ABŞ-la Azərbaycanı yaxınlaşdıran bir sıra çox geniş və dərin strateji maraqlar var. Bundan əvvəl də mən söyləmişdim ki, təhlükəsizlik, enerji və daxili islahatlar ölkələrimizin ortaq maraqlarıdır.
Səfir əlavə edib ki, heç bir məsələ Dağlıq Qarabağ münaqişəsinin danışıqlar və sülh yolu ilə nizamlanması üçün Minsk qrupuna yardım göstərməkdən vacib deyildir.
Mən ATƏT-in Minsk qrupunun, o cümlədən, ABŞ-dan olan həmsədr, səfir Robert Bradtkenin səylərini dəstəkləmək üçün əlimdən gələn hər şeyi edəcəyəm. Məqsədimiz münaqişənin ədalətli və uzunmüddətli həlli üçün tərəflərə yardım göstərməkdir. Hesab edirik ki, Dağlıq Qarabağ münaqişəsinin sülh yolu, danışıqlar vasitəsilə nizamlanması bütün region üçün yaxşı olacaq. Bu, regionda sülh və əmin-amanlığı gücləndirəcək və bölgənin strateji əhəmiyyətini daha da artıracaq.
Azərbaycanın beynəlxalq terrorizmə qarşı mübarizədə oynadığı rola toxunan səfir deyib ki, ABŞ hökuməti terrorizmlə mübarizədə davam edən əməkdaşlığına, xüsusilə Əfqanıstanda sülh yaradılması işinə verdiyi töhfəyə görə Azərbaycana təşəkkürünü bildirir.
Enerji sahəsində əməkdaşlıq məsələlərindən danışan səfir bildirib ki, ölkələr və şirkətlər Cənub dəhlizi ilə bağlı danışıqlar prosesində ciddi mərhələyə qədəm qoyublar. O deyib ki, bu layihə Azərbaycanı Avropaya daha dərindən bağlayacaq və Avropaya isə təbii qaz təchizatını şaxələndirməyə imkan verəcək. ABŞ hökuməti bu layihəyə dəstək verməkdə maraqlıdır.
Diplomat Azərbaycanda davam edən demokratiya və bazar iqtisadiyyatı ilə bağlı islahatları yüksək qiymətləndirib. O, deyib ki, Birləşmiş Ştatlar Azərbaycanda son zamanlar korrupsiya əleyhinə olan təşəbbüsləri alqışlayır.
Sonda səfir Mətyu Brayzə jurnalistlərin suallarını cavablandırıb.

Paylaş:

Baxılıb: 1091 dəfə