Qarsdakı türk-erməni dostluğuna aid abidənin sökülməsi tam məntiqli hərəkət olacaq

Bakı:

27 °C

44 %

11 m/s

Əlaqə

AZ RU EN

Ana səhifə / Siyasət / Qarsdakı türk-erməni dostluğuna aid abidənin sökülməsi tam məntiqli hərəkət olacaq

Qarsdakı türk-erməni dostluğuna aid abidənin sökülməsi tam məntiqli hərəkət olacaq

12.01.2011 [09:48]

Məlum olduğu kimi, Türkiyənin baş naziri Rəcəp Tayyib Ərdoğan Qarsda Ermənistanla münasibətlərin yaxşılaşdırılması məqsədilə hazırlanan abidənin götürülməsini istədiyini bildirib. Qarsa səfəri zamanı baş nazir Rəcəb Tayyib Ərdoğan abidəni yaxınlıqdakı müsəlman məbədini kölgədə qoyan yaraşıqsız bir struktur adlandırıb. Türkiyə KİV-nin məlumatına görə, Baş nazir şəhərin merinə abidənin yerində park salmağın lazım olduğunu deyib. İki insan fiquru şəklində olan abidənin üzərində işlər hələ də davam edir. Xatırladaq ki, abidənin ucaldılmasına iki ölkə arasında münasibətlərin yaxşılaşdırılması məqsədilə 2006-cı ildə icazə verilmişdi.
Məsələyə münasibət bildirən Yeni Azərbaycan Partiyası (YAP) İcra katibinin müavini, millət vəkili Mübariz Qurbanlı deyib ki, Qarsda türk-erməni dostluğuna aid abidənin sökülməsi ilə bağlı Türkiyənin baş naziri Rəcəb Tayyib Ərdoğanın söylədiyi fikirlər təqdirəlayiqdir. Onun fikrincə, bu abidənin sökülməsi tam məntiqli hərəkət olacaq. M.Qurbanlı qeyd edib ki, cənab Ərdoğanın bu mövqeyi mövcud reallığı əks etdirir və tamamilə qanunauyğun haldır. Mübariz Qurbanlının sözlərinə görə, belə abidənin mövcudluğu ermənilərin işğalçı siyasətinə mənəvi bəraətdən başqa bir şey olmazdı. Ona görə də, işğalçılara qarşı münasibət bildirilməlidir və onlara hər hansı güzəştə gedilməməlidir.
“Qarsda bəzi dairələr Ermənistanla sərhədlərin açılmasının iqtisadi cəhətdən Türkiyəyə, həmin bölgəyə divident gətirəcəyini düşünürlər. Amma bu gülünc fikirlərdir. çünki Ermənistan iqtisadiyyatı o qədər geridədir ki, Türkiyənin sərhədyanı bölgələri Ermənistanla ticarət əlaqələri aparmaqla cüzi gəlir əldə edə bilər. Xəzinəsi boş, əhalisi yoxsul olan Ermənistanla ticarətin əhəmiyyəti yoxdur. Türkiyənin aparıcı dairələri bu reallığı gözəl anlayırlar” - deyə, YAP İcra katibinin müavini vurğulayıb. M.Qurbanlı bildirib ki, Ermənistan Türkiyəyə qarşı ərazi iddiaları sürür, uydurma “erməni soyqırımı”nın təbliğatını aparmaqla Türkiyənin beynəlxalq aləmdə imicinə zərbə vurmağa çalışır. Belə olan halda ermənilərin mövcud olmayan dostluğuna abidə ucaltmaq lazım deyil.
Millət vəkili qeyd edib ki, eyni zamanda, Türkiyədə bəzi dairələr Ermənistanla sərhədlərin açılmasına, münasibətlərin qurulmasına tərəfdardır: “Bu cür dairələr belə fikirləşir ki, münasibətlər yaxşılaşarsa bütövlükdə bölgədə sülh və əmin-amanlıq üçün şərait yaranar. Lakin həyat göstərdi ki, Türkiyədə bu cür düşünən siyasətçilər yanlış yoldadırlar. çünki Ermənistan rəhbərliyi, erməni lobbisi, ermənilərin arxasında dayanan qüvvələr Türkiyəyə daim zərbə vurmağa çalışırlar. Tarixən beynəlxalq güclər tərəfindən ermənilər bir alət kimi istifadə olunub. Dəfələrlə ermənilər hələ Osmanlı dövründə türklər əleyhinə istifadə edilib, eləcə də, sovet dövründə Ermənistan Türkiyəyə qarşı ərazi iddiaları ilə çıxış edib. Ermənistanla Türkiyə arasındakı münasibətlərin kökündə qədimə gedən hadisələr dayanmaqdadır. Ermənilər türk xalqı əleyhinə daim cinayətlər törədiblər. Ona görə də, Qarsdakı türk-erməni dostluğunu ehtiva edən abidənin ucaldılmasının özü səhv addım idi”.
Həmin “dostluğa” həsr olunan bu heykəlin “İnsanlıq abidəsi” adlandığını xatırladan millət vəkili hesab edir ki, əslində, bu, Qarsda olan tarixi abidələr fonunda çox primitiv abidə idi. Ona görə də, Türkiyədə belə bir abidənin əleyhinə olanlar onun sökülməsini tələb edirdilər.
M.Qurbanlının fikrincə, belə bir abidənin olması həm tarixi-mədəni abidələr baxımından, həm də siyasi baxımdan doğru deyil: “Türk-erməni dostluğu adı altında abidə ucaltmaq nə dərəcədə məntiqli olur ki, Ermənistan Türkiyəyə qarşı torpaq iddiası ilə çıxış edir, uydurma “erməni soyqırımı” adı altında Türkiyənin beynəlxalq aləmdə imicinə xələl gətirən qərəzli siyasətini bir an dayandırmır? Belə abidə o vaxt ucaldılar ki, o xalqlar sülhə, əməkdaşlığa nail olublar. Ermənilər tamamilə anti-türk təbliğatı aparırlar. Belə olan halda Türkiyə tərəfindən erməni dostluğuna aid abidənin ucaldılması yolverilməzdir”.
Milli Məclisin komitə sədri, Azərbaycan-Türkiyə parlamentlərarası dostluq qrupunun rəhbəri Nizami Cəfərov isə bildirib ki, Qarsda türk-erməni dostluğuna aid abidənin sökülməsi Türkiyənin daxili məsələsidir. Onun fikrincə, Türkiyənin baş nazirinin belə bir bəyanat verməsi yəqin ki, müəyyən arqumentlərə əsaslanır. N.Cəfərov deyib ki, ermənilər tarix boyu türklərə qarşı məkrli olublar. Onun sözlərinə görə, son illər Ermənistanın Türkiyə ilə münasibətləri bərpa etmək üçün etdiyi cəhdlər də səmimi deyil. “Ermənilərin məqsədi Türkiyənin beynəlxalq nüfuzuna təsir etməkdir. Amma bu cəhdlər alınmayacaq. Hamı Ermənistanın işğalçı dövlət olduğunu bilir. Bu dövlət Azərbaycan və Türkiyə ilə normal münasibət qurmaq istəyirsə, işğalçılıqdan əl çəkməlidir” - deyə, N.Cəfərov vurğulayıb.
Nardar BAYRAMLI

Paylaş:

Baxılıb: 1126 dəfə