Heydər Əliyev Fondunun təşəbbüsü ilə Salyanda yeni yaşayış massivi istifadəyə verilib

Bakı:

25 °C

62 %

6 m/s

Əlaqə

AZ RU EN

Ana səhifə / Siyasət / Heydər Əliyev Fondunun təşəbbüsü ilə Salyanda yeni yaşayış massivi istifadəyə verilib

Heydər Əliyev Fondunun təşəbbüsü ilə Salyanda yeni yaşayış massivi istifadəyə verilib

31.12.2010 [09:51]

Dekabrın 30-da Heydər Əliyev Fondunun təşəbbüsü ilə Salyan şəhərində salınmış yeni yaşayış massivinin açılışı olub.
Açılış mərasimində bildirilib ki, 8 hektar ərazidə salınmış yeni yaşayış massivinin tikintisinə bu ilin birinci yarısında başlanılıb. Ərazidə birmərtəbəli 167 ev inşa olunub ki, bunlardan 6-sı dördotaqlı, 29-u üçotaqlı, 131-i ikiotaqlı, biri isə birotaqlıdır. Səkkiz küçədən ibarət olan şəhərcikdə 5 kilometr uzunluğunda daxili yollar asfaltlanıb. Şəhərcik daxilində 3 min 755 metr qaz xətti və 2 min metr içməli su xətti çəkilib, 49 müasir işıqlandırma dirəyi quraşdırılıb. Qəsəbə tam şəkildə mavi yanacaq və elektrik enerjisi ilə təmin olunub, sayğaclaşdırma işləri başa çatdırılıb. ümumilikdə, 5 min 600 kvadratmetr ərazidə yaşıllıq zolağı salınıb, 12 min ağac və bəzək kolları əkilib.
Şəhərcikdə inşa olunan evlər əsasən Qarabağ müharibəsi veteranları, əlil, aztəminatlı və çoxuşaqlı ailələr üçün nəzərdə tutulub.
Açılış mərasimində çıxış edən Heydər Əliyev Fondunun icraçı direktoru Anar Ələkbərov yeni evlərin sahiblərini təbrik edib. O, Azərbaycanın birinci xanımı, Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın salamlarını və təbriklərini tədbir iştirakçılarına çatdırıb.
Qeyd edilib ki, Azərbaycanda əhalinin sosial təminatının yaxşılaşdırılması, regionların sosial-iqtisadi inkişafı istiqamətində Prezident İlham Əliyevin rəhbərliyi ilə uğurlu siyasət həyata keçirilir. Bu siyasətin reallaşdırılmasında yaxından iştirak edən Heydər Əliyev Fondu uşaq evlərinin, internat məktəblərin, səhiyyə, təhsil ocaqlarının bərpası və tikintisi, eləcə də əlil, aztəminatlı və yeni ailə qurmuş şəxslərin evlə təmin olunması baxımından Azərbaycanda mühüm sosialyönümlü tədbirlər həyata keçirir. Salyan şəhərindəki şəhərcik də Fondun növbəti sosialyönümlü layihələrindən biri çərçivəsində inşa edilib. Şəhərciyin məhz belə bir gündə sakinlərin istifadəsinə verilməsi Fondun onlara Dünya Azərbaycanlılarının Həmrəylik Günü və Yeni il bayramı ilə bağlı hədiyyəsidir.
Bildirilib ki, Azərbaycandan kənarda 66 iri layihə həyata keçirən Heydər Əliyev Fondu artıq dünya QHT-ləri arasında ən nüfuzlu təşkilata çevrilib.
Sonra tədbir iştirakçıları evlərdə yaradılmış şəraitlə tanış olublar.
Şəhərciyin sakini, gənc ailənin üzvü Cavanşir Quliyev taxta lövhə üzərində nəqş etdiyi xatirə hədiyyəsini Heydər Əliyev Fondunun prezidenti Mehriban xanım Əliyevaya çatdırmaq üçün təqdim edib.
İcraçı direktor qəsəbə sakini, Qarabağ müharibəsi veteranının ailə üzvü Maya Gözəlovaya evin verilməsi haqqında Sərəncamı və mənzilin açarlarını təqdim edib.
Sakinlər onlar üçün yaradılmış şəraitə, göstərilən diqqət və qayğıya görə dövlətimizin başçısı İlham Əliyevə və Heydər Əliyev Fondunun prezidenti Mehriban xanım Əliyevaya minnətdarlıqlarını bildiriblər.
Qeyd edək ki, Heydər Əliyev Fondunun təşəbbüsü ilə Salyan şəhərində hər biri 200 yerlik olan 5 xeyir-şər evi də inşa edilir.

Paylaş:

Baxılıb: 1079 dəfə