Mehri - Ağarak yolunda...

Bakı:

30 °C

47 %

3 m/s

Əlaqə

AZ RU EN

Ana səhifə / Siyasət / Mehri - Ağarak yolunda...

Mehri - Ağarak yolunda...

11.08.2022 [10:30]

Ermənistan ictimaiyyəti həyəcan təbili çalır

SADİQ

Son günlərdə Ermənistan KİV-i Mehri-Ağarak yolunda Rusiya sülhməramlılarının sənəd yoxlaması, aparılan yüklərin təftişi ilə bağlı “həyəcan təbili” çalır. Düzdür, Ermənistanın rəsmi orqanları yoxlanışı adıçəkilən yolda narkoticarətin intensivləşməsi ilə əlaqələndirsələr də, sülhməramlıların ölkə daxilində post qurması məsələsinə münasibət bildirmirlər. Mehri icmasının rəhbəri Baqrat Zakaryan isə bildirib ki, rus sülhməramlılarının Mehri-Ağarak yolunda modul postları artıq 9 aydır quraşdırılıb. Sadəcə olaraq, son günlərdə bu postlar aktiv fəaliyyətə başlayıb.

Sosial şəbəkənin Ermənistan seqmenti, o cümlədən KİV bu baş verənlərə qarşı açıq kampaniya həyata keçirirlər. Onlar adıçəkilən ərazilərdə postların qurulması ilə razı deyil və bu postların qurulmasını qarşıdakı dövrdə baş verəcək siyasi hadisələrlə bağlı olduğunu deyirlər. Belə yoxlama postlarının qurulmasını Zəngəzur dəhlizi ilə bağlı razılaşmadan qaynaqlandığını idda edən ermənilər yoxlanışın Ermənistanın müvafiq strukturları tərəfindən deyil, məhz Rusiyanın sülhməramlı kontingentinin tərəfindən icra edilməsinə də qarşıdırlar. İddia edilir ki, sülhməramlıların həmin regionda hansısa yoxlama aparmaq hüququ üçtərəfli Bəyanatda əks olunmayıb. Magistralın Mehri-Ağarak hissəsində rus hərbçilərinin postlarının peyda olmasından daha çox, oradan keçən erməni nömrəli bütün avtomobillərin rus əsgərləri tərəfindən yoxlanılması erməni ictimaiyyəti üçün utancverici hadisədir. Bu iddiaların içində ən maraq doğuran fakt isə ondan ibarətdir ki, bu yoxlamalarla bağlı Ermənistanın müvafiq strukturlarından icazə alınmayıb. Ermənistan KİV-i bunu ölkənin suverenliyinə təhdid kimi dəyərləndirir. Amma...

Rəsmi İrəvan 2020-ci ilin noyabrında kapitulyasiya imzaladıqdan sonra öhdəlikləri yerinə yetirməmək üçün müxtəlif bəhanələr gətirir. Həmin dövrdə Azərbaycanın “dəmir yumruğ”undan xilas olmaq üçün bütün ölkələrə yalvaran Ermənistan 10 noyabr kapitulyasiyasını imzalamaqla canını qurtardığını düşünüb. Ermənistan elə düşünür ki, imzaladığı bu saziş müharibəni əbədi dayandırdı. Və artıq onlar yenə də istədikləri kimi davrana bilərlər. Bu isə belə deyil.

Ermənistan tərəfi 10 noyabr sazişini imzalamaqla üzərinə götürdüyü öhdəlikləri mütləq şəkildə yerinə yetirməlidir. 30 ilə yaxın regionun əsaslı inkişafına mane olan rəsmi İrəvan bu dəfə vaxt uzatmaq kimi manipulyasiyalarla status-kvonu qoruya bilməz. İstər şərqi Zəngəzurda, istər Laçın dəhlizində, istərsə də Kəlbəcər istiqamətində törətməyə çalışdıqları təxribatlar isə cavabsız qalmır. Azərbaycan ən yüksək səviyyədə bu təxribatların qarşısını alır.

Üçtərəfli Bəyanatın imzalanmasından ötən dövrdə əlini-əlinin üstünə qoyaraq heç nə etmək istəməyən, daha doğrusu müqaviləyə əsasən Azərbaycan torpaqlarını tərk edərək, yeni yoldan istifadə etməli olduğunu, Azərbaycanın əsas hissəsi ilə Naxçıvan arasındakı kommunikasiyanın qurulmasına şərait yaratmalı olduğunu “unudan” Ermənistanın apardığı hay-küy kampaniyası işə yaramır. Baş verənlərdə birmənalı olaraq Rusiyanı günahlandırmağa çalışan Ermənistan cəmiyyəti öz suallarını niyə indiyə qədər İrəvan hakimiyyətində təmsil olunanlara ünvanlamır?

Paylaş:

Baxılıb: 608 dəfə