Azərbaycanda istifadəsiz qalmış şəxsi torpaq sahələrinin dövlətə qaytarılması təklif oluna bilər

Bakı:

26 °C

59 %

4 m/s

Əlaqə

AZ RU EN

Ana səhifə / Siyasət / Azərbaycanda istifadəsiz qalmış şəxsi torpaq sahələrinin dövlətə qaytarılması təklif oluna bilər

Azərbaycanda istifadəsiz qalmış şəxsi torpaq sahələrinin dövlətə qaytarılması təklif oluna bilər

08.12.2010 [10:04]

“Azərbaycanda əkinə yararlı olan, lakin istifadəsiz qalmış torpaq sahələri daha məsuliyyətli şəxslərə verilməlidir”.
Bunu APA-ya açıqlamasında Dövlət Torpaq və Xəritəçəkmə Komitəsinin sədri Qərib Məmmədov bildirib. Komitə sədrinin sözlərinə görə, indi Azərbaycandakı torpaq sahiblərindən bir hissəsi torpaqları sadəcə alıb saxlamağa üstünlük verir, həmin torpaq sahələri heç bir təsərrüfat məqsədilə istifadə olunmur: “Bəziləri 200-300 hektar torpağı alıb sadəcə saxlayırlar. Nəticədə, həmin sahədə heç bir təsərrüfat işləri aparılmır. Hətta bəzən bu torpaqlar əkilsə də, oradan lazımi məhsul alınmır”.
Respublikada çox sayda olmasa da, belə halların mövcud olduğunu bildirən Q.Məmmədovun sözlərinə görə, əksər hallarda belə torpaqların sahibləri paytaxt sakinləridir: “çox vaxt belələri Bakı sakinləri və ya ahıl insanlar olur ki, onlar da təsərrüfat işlərindən tamamilə xəbərsizdir”.
Komitə sədrinin fikrincə, belə torpaq sahələrinin daha təcrübəli insanların istifadəsində olması məqsədəuyğundur: “Əhaliyə verilən torpaqdan istifadə olunmalıdır, əks halda bu torpaq daha məsuliyyətli və təsərrüfatcıl şəxslərə verilməlidir ki, burada məhsul becərilsin”.
Komitə sədri torpaqlardan səmərəli istifadəni təmin etmək üçün şəxsi mülkiyyətdə olan torpaq sahələrinin müsabiqə və hərraclar yolu ilə satılmasını təklif edir: “Xüsusi mülkiyyətdə olan kənd təsərrüfatına yararlı torpaqları satmaq arzusunda olan şəxslərin arzu və təkliflərinə müvafiq olaraq bu torpaqların daha yüksək qiymətə və onu sözün əsl mənasında əkib-becərmək bacarığı və istəyi olan alıcılara satılmasını təmin etmək məqsədilə torpaqların müsabiqə və hərrac vasitəsilə satışı təşkil olunmalıdır”.
Q.Məmmədovun sözlərinə görə, torpaqlardan istifadə olunması həm də ölkənin ərzaq təhlükəsizliyi üçün vacibdir: “ölkədə istehsal olunan kənd təsərrüfatı məhsulları da ayrı-ayrı təsərrüfat və torpaq sahiblərinin istehsal etdiyi mallardan ibarətdir”.
Yeri gəlmişkən, qonşu Rusiyada mövcud qanunvericiliyə əsasən, əkinə yararlı torpaqlardan 3 il ərzində istifadə etməyən torpaq sahibləri həmin ərazini dövlətə qaytarmalıdır.
Q.Məmmədov bu təcrübənin gələcəkdə Azərbaycanda da tətbiq olunacağını istisna etmir, hərçənd bunun üçün təşəbbüsü hökumət qaldıra bilər. Hələliksə, bununla bağlı ölkədə heç bir rəsmi müzakirə aparılmır.

Paylaş:

Baxılıb: 1146 dəfə