Mübariz Qurbanlı: Azərbaycan diplomatiyası münaqişənin həlli üçün bütün vasitələrdən istifadə edir və bu da öz müsbət nəticələrini verməkdədir

Bakı:

26 °C

60 %

5 m/s

AZ RU EN

Ana səhifə / Siyasət / Mübariz Qurbanlı: Azərbaycan diplomatiyası münaqişənin həlli üçün bütün vasitələrdən istifadə edir və bu da öz müsbət nəticələrini verməkdədir

Mübariz Qurbanlı: Azərbaycan diplomatiyası münaqişənin həlli üçün bütün vasitələrdən istifadə edir və bu da öz müsbət nəticələrini verməkdədir

07.12.2010 [09:25]

ATƏT-in Astanada keçirilən sammitində Ermənistanın yenidən qeyri-konstruktiv mövqedən çıxış etməsi və bunun nəticəsində də Dağlıq Qarabağ münaqişəsinin həlli ilə bağlı nəzərəçarpan irəliləyişlərin əldə olunmaması, beynəlxalq ictimaiyyətin və dünyanın güc mərkəzlərinin isə İrəvana təzyiqlər göstərməməsi münaqişənin gələcək həll perspektivləri haqqında müxtəlif proqnozların səslənməsinə yol açıb. O cümlədən, bir sıra siyasi dairələr ATƏT-in Minsk qrupunun münaqişənin həllinə vasitəçiliyi ilə uzun illərdir ki, heç bir nəticəyə nail olunmamasını əsas götürərək danışıqların başqa formatlar altında davam etdirilməsi, həmçinin, bu missiyasının BMT-nin mandatı altında həyata keçirilməsi yönündə təkliflər irəli sürürlər.
Məsələyə münasibət bildirən Yeni Azərbaycan Partiyası İcra katibinin müavini, millət vəkili Mübariz Qurbanlı isə www.yap.org.az saytına müsahibəsində deyib ki, Astana sammiti Dağlıq Qarabağ münaqişəsinin həlli yolunda növbəti mərhələni təşkil edir. Bu sammitdə Azərbaycan diplomatiyası siyasi, psixoloji, ideoloji cəhətdən Ermənistan diplomatiyasından üstün olduğunu bir daha nümayiş etdirdi. Bu sammitdə Prezident İlham Əliyevin dəmir məntiqə söykənən və həddindən artıq praqmatik şəkildə etdiyi çıxış Astanaya toplaşan bütün dövlət başçıları və nümayəndə heyətləri tərəfindən diqqətlə dinlənildi və məmnuniyyətlə qarşılandı: “Prezident İlham Əliyevin həmin çıxışında bir sıra istiqamətləri biz müşahidə etdik. Birincisi, cənab Prezident Azərbaycanın münaqişənin sülh yolu ilə həllinə hazır olduğunu nümayiş etdirdi. İkincisi, Prezident İlham Əliyev çıxışında ATƏT-in Minsk qrupunun fəaliyyətinin sürətləndirilməsinin zəruriliyini vurğuladı. Eyni zamanda, dövlətimizin başçısı ATƏT-in bu münaqişəni həll edə bilməməsinin bütövlükdə beynəlxalq münasibətlər sisteminə, həmçinin, ATƏT-in imicinə böyük xələl gətirdiyini qeyd etdi. Prezident bildirdi ki, münaqişənin həlinə və sülh danışıqlarına vasitəçilik missiyasını ardıcıl həyata keçirməyə borclu olan qurum ATƏT-in Minsk qrupudur ki, bu qrup da fəaliyyət göstərdiyi illərdə müəyyən irəliləyişlər əldə olunsa da, yekun nəticəyə nail olunmayıb. Bu çıxış Azərbaycanın həyata keçirdiyi hücumçu diplomatiya taktikasına söykənirdi və Azərbaycanın mənəvi, psixoloji, ideoloji, diplomatik üstünlüyü ilə müşayiət olunurdu”.
Daha sonra Mübariz Qurbanlı deyib ki, ATƏT-in Minsk qrupunun çatışmazlıqları Azərbaycan tərəfindən dəfələrlə bəyan olunub. Məlumdur ki, münaqişə başlandığı vaxtda BMT Təhlükəsizlik Şurası (TŞ) problemin həllinə dair müvafiq qətnamələr qəbul edib. Lakin bu qətnamələr hələ də yerinə yetirilməyib. Amma perspektivdə Azərbaycan tərəfi münaqişənin BMT tribunasında daha yüksək səviyyədə müzakirəsi üçün müvafiq addımları atmaq iqtidarındadır və bu, ölkəmizin hüququdur. “Azərbaycan diplomatiyası yalnız, ATƏT-lə məhdudlaşmayıb. Avropa Şurası, İslam Konfransı Təşkilatı, BMT-nin Baş Assambleyası səviyyəsində Dağlıq Qarabağ münaqişəsi ilə əlaqədar dəfələrlə məsələlər qaldırılıb. O cümlədən, Ermənistan tərəfindən işğal olunmuş ərazilərimizdə vəziyyətlə bağlı qərar qəbul olunmasına nail olunubdur. Perspektivdə prosesin ATƏT çərçivəsində davam edəcəyi gözlənilir və bu, elə BMT TŞ-nin tövsiyyəsidir. Lakin Azərbaycan diplomatiyası bütün vasitələrdən istifadə edir və hesab edirəm ki, bu da öz müsbət nəticələrini verir”, - deyə M.Qurbanlı vurğulayıb.
ATƏT-in Minsk qrupunun vasitəçiliyindən tamamilə imtina məsələsinə gəldikdə isə YAP İcra katibinin müavini indiki şəraitdə bu addımın real və düzgün olmadığını söyləyib. Onun sözlərinə görə, bütün hallarda Azərbaycan diplomatiyası çevik addımlar atacaq və ATƏT çərçivəsində, BMT çərçivəsində bütün vasitələrdən səmərəli istifadə edə biləcək.

Paylaş:

Baxılıb: 1192 dəfə