Azərbaycan Respublikası Ali Məhkəməsinin məlumatı

Bakı:

25 °C

76 %

10 m/s

Əlaqə

AZ RU EN

Ana səhifə / Siyasət / Azərbaycan Respublikası Ali Məhkəməsinin məlumatı

Azərbaycan Respublikası Ali Məhkəməsinin məlumatı

09.12.2010 [09:54]

Son vaxtlar bəzi kütləvi informasiya vasitələrində Eynulla Fətullayevin işi ilə əlaqədar İnsan hüquqları üzrə Avropa Məhkəməsinin 2010-cu il oktyabrın 4-də qüvvəyə minmiş 2010-cu il 22 aprel tarixli qərarı əsasında Azərbaycan Respublikası Ali Məhkəməsinin Plenumu tərəfindən 2010-cu il noyabrın 11-də məhkumun haqqında iki iş üzrə qəbul edilmiş qərarlar barəsində dərc edilən məqalələrdə və onun müdafiəçisi vəkil E.Sadıqovun verdiyi müsahibələrdə bilə-bilə yanlış, ictimaiyyətdə düzgün olmayan təsəvvür yaratmağa yönəldilən məlumatlar öz əksini tapıb. Bir sıra qəzetlərdə dərc olunmuş yazılarda Plenumun E.Fətullayevin barəsində qəbul etdiyi 2010-cu il 11 noyabr tarixli qərarla ona təyin edilmiş azadlıqdan məhrumetmə cəzalarının müddətlərinin guya artırılması, bununla da məhkumun vəziyyətinin ağırlaşdırılması, digər tərəfdən isə Avropa Məhkəməsinin qərarına əməl edilməyərək onun əsassız olaraq həbsdə saxlanılması göstərilib.
Azərbaycan Respublikasının Ali Məhkəməsi ilk növbədə bildirir ki, cinayət-prosessual qanunvericiliyinin tələblərinə görə, həm kassasiya instansiyası məhkəməsinin, həm də Ali Məhkəmənin Plenumunun hər hansı bir məhkum olunmuş şəxsə təyin edilmiş cəzanın artırılması və ya onun vəziyyətinin başqa cür ağırlaşdırılması haqqında qərar qəbul etmək səlahiyyəti yoxdur. Ali Məhkəmə və onun Plenumu baxdığı bütün işlər üzrə qanunun aliliyi prinsipini rəhbər tutaraq bu tələblərə daim əməl edir, ədalət mühakiməsinin həyata keçirilməsi zamanı qanuni, obyektiv və ədalətli qərarların qəbul edilməsinə nail olur.
E.Fətullayevin barəsində Plenum tərəfindən qəbul edilmiş 2010-cu il 11 noyabr tarixli qərarlarla bağlı qeyd edilməlidir ki, birinci qərarla məhkumun haqqında xüsusi ittiham qaydasında iş üzrə kassasiya instansiyası məhkəməsinin qərarı ləğv edilməklə həmin işin icraatına xitam verilib. Eyni tarixli ikinci qərarla E.Fətullayevin barəsindəki kassasiya kollegiyasının qərarı yalnız iki ittiham üzrə (Azərbaycan Respublikası CM-in 214.1-ci və 283.2.2-ci maddələri ilə) hissəsi ləğv edilib və bu hissələrdə cinayət işinin icraatına xitam verilib. Həmin iş üzrə E.Fətullayev, həmçinin vergidən yayınma cinayətini törətdiyinə görə də 4 (dörd) ay müddətə azadlıqdan məhrumetmə cəzasına məhkum edilib. Bu cinayəti o, Yasamal Rayon Məhkəməsinin 2006-cı il 26 sentyabr tarixli hökmü ilə (həmin hökmlə E.Fətullayevə 2 (iki) il müddətə azadlıqdan məhrumetmə cəzası təyin edilmişdir) tətbiq olunmuş şərti məhkumetmə dövründə törətdiyinə görə, Plenum hökmlərin məcmusu qaydasında cəzaların təyin edilməsini tənzimləyən cinayət qanunu normalarına əsaslanaraq (CM-in 67.1-ci maddəsi) məhkumun haqqında birinci hökmlə və sonuncu hökmlə təyin edilmiş cəzaları qismən birləşdirməklə onun üzərində qəti olaraq 2 (iki) il 3 (üç) ay müddətə azadlıqdan məhrumetmə cəzası saxlayıb. Bu cəzanı tam çəkdiyini, habelə xüsusi ittiham qaydasında iş üzrə icraata xitam verilməsini nəzərə alaraq Plenum baxılmış işlər üzrə E.Fətullayevin həbsdən azad edilməsini qərara alıb.
Göründüyü kimi, E.Fətullayevin barəsindəki cinayət işi üzrə Plenumun qəbul etdiyi 2010-cu il 11 noyabr tarixli qərar Avropa Məhkəməsinin 2010-cu il 22 aprel tarixli qərarında müəyyən edilmiş tələblərə tam uyğun olub və həmin qərarla məhkuma istər vergidən yayınma cinayətinə görə, istərsə də hökmlərin məcmusu üzrə təyin edilmiş cəzaların müddətləri nəinki artırılmayıb, əksinə qəti cəzanın müddəti azaldılıb, bununla da məhkumun vəziyyəti yüngülləşdirilib.
Azərbaycan Respublikası Ali Məhkəməsinin Plenumu tərəfindən E.Fətullayevin barəsində qəbul edilmiş qərarlar Avropa Şurası Nazirlər Komitəsinin 2010-cu il 3 dekabr tarixli iclasında müzakirə olunub və həmin qərarlardan Komitənin məmnun qalması haqqında qərar qəbul edilib.
E.Fətullayevin həbsdə saxlanılması onun cəzaçəkmə müəssisəsində törətdiyi başqa cinayətlə əlaqədar olub və həmin cinayətlə bağlı yalnız birinci instansiya məhkəməsi tərəfindən baxılmış iş Azərbaycan Respublikası Ali Məhkəməsi Plenumunun müzakirə predmeti olmayıb.

Paylaş:

Baxılıb: 1126 dəfə