Anons verildi: Müharibə şiddətlənəcək

Bakı:

21 °C

61 %

1 m/s

Əlaqə

AZ RU EN

Ana səhifə / Siyasət / Anons verildi: Müharibə şiddətlənəcək

Anons verildi: Müharibə şiddətlənəcək

13.05.2022 [10:23]

Rusiyaya qarşı uzunmüddətli plan işə düşür

Pərviz SADAYOĞLU

Rusiya ilə Ukrayna arasındakı gərginliyi aradan qaldırmaq, prosesi danışıqlar masasına daşımaq üçün edilən cəhdlər nəticə vermir. Aparıcı beynəlxalq təşkilatlar da bu faktı təəssüflə təsdiqləyirlər. Məsələn, sülh prosesinin yaranması üçün cəhd göstərən BMT Baş katibi Antonio Quterreş “The Guardian” nəşrinə müsahibəsində məsələyə pessimist yanaşma sərgiləyib. O bildirib ki, yaxın vaxtlarda sülh olmayacaq. “Vaxt gələcək ki, Rusiya ilə Ukrayna arasında sülh danışıqları başlayacaq. Bu müharibə sonsuzadək davam etməyəcək. Sülh danışıqlarının aparılacağı vaxt gələcək. Lakin mən bunun yaxın gələcəkdə olacağını düşünmürəm”, - o söyləyib.

Son proseslər isə Rusiyaya qarşı ittifaqın yeni planlar üzərində çalışdığını deməyə əsas verir. Ukraynaya dəstək olan Qərb ölkələri Kremllə olan problemi nəinki danışıqlar masasında həll etmək, müharibəni daha da şiddətləndirmək istəyirlər.

Məsələ ilə bağlı fikirlərini “Yeni Azərbaycan”a bölüşən politoloq İlyas Hüseynov bildirib ki, BMT kimi universal bir təşkilatın rəhbərinin bu fikirləri səsləndirməsi vəziyyətin ciddiliyindən xəbər verir. O qeyd edib ki, Antonio Quterreş Rusiya və Ukrayna səfərinin ardından da bildirmişdi ki, müharibə Rusiya istədiyi zaman bitəcək. Politoloqun fikrincə, Türkiyənin vasitəçiliyi ilə aparılan danışıqlarda müəyyən irəliləyişlərə nail olunsa da, Buça və İrpendə baş verən hadisələr təmasların dayanması ilə nəticələndi. Bu hadisələr müharibənin müddətini bir qədər də artırdı və diplomatik sahədə olan intensivliyi azaltdı: “Hazırkı durumda isə ABŞ tərəfindən Lend-Liz qanununun imzalanması, G-7 sammitində Rusiya neftindən və qazından mərhələli şəkildə imtina edilməsi bəzi məsələləri üzə çıxarır. Rusiyanın hərbi sahədə məğlubiyyətini yaxınlaşdırmaq, iqtisadi sahədə tənəzzülünə nail olmaq üçün genişmiqyaslı fəaliyyət müşahidə olunmaqdadır. Görünür Rusiyaya qarşı uzunmüddətli plan işə düşüb. ABŞ prezidentinin Lend-Liz qanununu imzalaması Rusiya-Ukrayna müharibəsinin dönüş nöqtəsi ola bilər. 40 milyard ABŞ dollarına yaxın məbləğdə yardımı və krediti nəzərdə tutan bu qanun hücum silahlarının verilməsini də özündə ehtiva edir”.

İ.Hüseynov bildirib ki, indiyə qədər Ukraynaya yalnız müdafiə qabiliyyətli silahlar ötürülürdüsə, Lend-Liz qanunu sayəsində qırıcılar, raket-artilleriya sistemləri və komplekslər də veriləcək. Yardım may ayının sonları və iyun ayının əvvəlində baş tuta bilər. “Bu baxımdan, qarşıdakı aylarda Rusiya-Ukrayna müharibəsinin ən şiddətli dövrünə şahid ola bilərik. Təbii ki, Rusiya baş verənləri görür və yəqin ki, dəyərləndirir. Rusiyanın da planlarının olması heç kimdə şübhə doğurmur. Əgər bütün dünya mediası Lend-Liz qanununu müzakirə edirsə, buna kontr-arqumentlər hazırlanıb. Hərbi-siyasi strateqlər bu proqrama qarşı öz güclərini səfərbər ediblər. Artıq iqtisadi sahədə Rusiyanın qarşısının alınması, neft və qazdan mərhələli şəkildə imtina, Lend-Liz qanunu ilə hərbi yardımların genişləndirilməsi və eyni zamanda daxildə sosial narazılıqları daha da inkişaf etdirmək fonunda zəmin formalaşdırılır. Bu üç aspektin eyni anda Rusiyaya qarşı işə düşməsi ölkənin böhran dövrünə qədəm qoymasına gətirib çıxara bilər. Amma bunu qısa zamanda etmək mümkün olmayacaq. Çünki Rusiyanın ciddi valyuta ehtiyatları vardır”, - deyə İ.Hüseynov əlavə edib.

Paylaş:

Baxılıb: 733 dəfə