Naxçıvanda Azərbaycan-Türkiyə biznes forumu keçirilib

Bakı:

14 °C

67 %

4 m/s

Əlaqə

AZ RU EN

Ana səhifə / Siyasət / Naxçıvanda Azərbaycan-Türkiyə biznes forumu keçirilib

Naxçıvanda Azərbaycan-Türkiyə biznes forumu keçirilib

28.10.2010 [09:22]

Dünən “Duzdağ” hotelində Azərbaycan-Türkiyə biznes forumu keçirilib. Tədbir iştirakçıları əvvəlcə muxtar respublikada istehsal olunan məhsulların sərgisinə baxıblar. Sərgidə 53 müəssisənin 270 adda məhsulu nümayiş etdirilirdi. Naxçıvan Muxtar Respublikasının tarixindən, sosial-iqtisadi inkişafından bəhs edən “Şərqdə doğan günəş” filmi göstərilib. Naxçıvan Muxtar Respublikası Ali Məclisinin sədri Vasif Talıbov forumda çıxış edərək deyib ki, ölkələrimiz arasında əlaqələrin inkişaf etdirilməsinin vacib elementi olan bu cür görüşlərin, işgüzar forumların keçirilməsi artıq sistemli xarakter alıb, ənənəyə çevrilib: “Budəfəki forumun Azərbaycanın Naxçıvan Muxtar Respublikasında keçirilməsi münasibətlərimizin daha da inkişafı baxımından mühüm əhəmiyyətə malikdir. Naxçıvan o yerdir, o diyardır ki, Azərbaycan və Türkiyə arasında yeganə quru sərhədi buradan keçir”.
Azərbaycanın Naxçıvan Muxtar Respublikası ilə Türkiyənin yaxın bölgələri arasında iqtisadi, mədəni-humanitar və sosial sahələrdə əlaqələrinin genişlənməkdə olduğunu bildirən natiq sözünə davam edərək deyib ki, hazırda Naxçıvan Muxtar Respublikasında Türkiyəyə məxsus 58 sahibkarlıq subyekti fəaliyyət göstərir ki, onlarda 832 Türkiyə vətəndaşı çalışır.
Biznes forumda çıxış edən Türkiyə Respublikasının xarici ticarət üzrə dövlət naziri Zəfər çağlayan dost və qardaş ölkələr arasında iqtisadi əlaqələrin inkişaf etməsinə Türkiyə tərəfinin xüsusi əhəmiyyət verdiyini söyləyərək deyib ki, iş adamlarından ibarət böyük bir heyətin Naxçıvana gəlməsi bunu bir daha sübut edir. Dövlət naziri vurğulayıb ki, Prezident İlham Əliyevin rəhbərliyi altında həyata keçirilən iqtisadi islahatlar nəticəsində Azərbaycan mühüm uğurlar qazanıb, Qafqaz regionunun lider dövlətinə çevrilib.
Azərbaycan Respublikasının iqtisadi inkişaf naziri Şahin Mustafayev Türkiyə Respublikası dövlət nazirinin mötəbər nümayəndə heyəti ilə Naxçıvana səfərini Türkiyənin Azərbaycanla əməkdaşlığın genişləndirilməsinə verdiyi əhəmiyyətin daha bir göstərcisi kimi dəyərləndirib, iqtisadi sahədə əməkdaşlığa dair görülmüş işlərdən bəhs edib.
Sonra Türkiyə İxracatçıları Məclisinin Şərqi Anadolu İxracatçılar Birliyinin sədri Camal Şengel, Türkiyə Respublikası Xarici Əlaqələr Qurumu Türk-Azərbaycan Şurasının sədri Cengiz Gül çıxış ediblər.
Bununla da Naxçıvanda keçirilən Azərbaycan-Türkiyə biznes forumunun rəsmi hissəsi başa çatıb. Rəsmi hissədən sonra sənədlərin imzalanma mərasimi olub.
Mərasimdə Azərbaycan Respublikası Sahibkarlar (İşəgötürənlər) Təşkilatları Milli Konfederasiyası, Azərbaycanda İnvestisiya və İxracın Təşviqi Fondu, Naxçıvan Muxtar Respublikası Sahibkarlar Konfederasiyası ilə Türkiyə Respublikası Xarici Əlaqələr Qurumu Türk-Azərbaycan Şurası arasında işbirliyi haqqında Niyyət Protokolu imzalanıb, iş adamları arasında ikitərəfli görüşlər keçirilib.
Azərbaycan-Türkiyə biznes forumunda Türkiyənin Azərbaycan Respublikasındakı fövqəladə və səlahiyyətli səfiri Hülusi Kılıç, Naxçıvandakı baş konsulu Ayhan Enginar və Azərbaycan Respublikasının Qarsdakı baş konsulu Ayxan Süleymanov, Türkiyənin dövlət rəsmiləri, Naxçıvan Muxtar Respublikası ilə sərhəd vilayətlərin valiləri, vəzifəli şəxsləri, işgüzar dairələrin 90-a yaxın nümayəndəsi iştirak ediblər.

Paylaş:

Baxılıb: 1051 dəfə