40-dan artıq ölkə birləşir...

Bakı:

21 °C

62 %

1 m/s

Əlaqə

AZ RU EN

Ana səhifə / Siyasət / 40-dan artıq ölkə birləşir...

40-dan artıq ölkə birləşir...

29.04.2022 [10:37]

Moskvaya qarşı yeni koalisiya

P.İsmayılov

NATO və tərəfdaşlarından ibarət anti-Rusiya koalisiyası Kreml ətrafındakı çəmbəri daraldır. İndiyə qədər iqtisadi sanksiyalar vasitəsilə Moskvanı iddialarından geri çəkilməyə məcbur etməyə çalışan Qərb təsir imkanlarını daha da genişləndirmək fikrindədir. Belə ki, artıq Rusiyaya qarşı hərbi ittifaqın genişləndirilməsinə start verilib. Xarici KİV-in yaydığı məlumata görə, Almaniyadakı “Ramştayn” hərbi aviabazasında NATO üzvləri və Rusiyaya qarşı olan digər ölkələrin müdafiə nazirlərinin, hərbi rəhbərliklərinin qapalı toplantısı keçirilib. Toplantıda çıxış edən ABŞ ordusunun generalı Mark Millinin fikrincə, qarşıdakı həftələr Ukraynanın Rusiyaya qarşı dirənişi baxımından həlledici olacaq və buna görə də Qərb dövlətləri bütün potensiallarından istifadə edərək, Ukraynaya kömək etməlidirlər: “Zaman Ukraynanın tərəfində deyil. Qarşıda kritik həftələr var. Bu döyüşün nəticəsi bu gün buradakı, bu toplantıdakı adamların qərarlarından asılıdır”.

Məlumata əsasən, qapalı toplantıda iştirak edən ABŞ təmsilçilərinin bildirdiyinə görə, Rusiyanın öz artilleriya və digər silah üstünlüyündən istifadə edərək, Ukrayna Silahlı Qüvvələrinin özəyini məhv etmək məqsədi var. Lakin bununla yanaşı, amerikalı generallar hesab edirlər ki, rus bölmələrinin tükənməsi və bəzi hissələrin şəxsi heyətinin 30 faizə yaxınının məhv edilməsi səbəbindən Rusiyanın öz istəyinə nail olacağı inandırıcı görünmür. Onların fikrincə, Rusiya iqtisadiyyatı və hərbi potensialı hələ ki, əməliyyatları davam etdirməyə imkan versə də, ordunun məruz qaldığı ağır itkilər ciddi uğur qazanmağa imkan yaratmır. Bununla yanaşı, Ukrayna tərəfinin öz ərazisində savaşması və ərazini yaxşı tanıması, eləcə də Qərbin silah və kəşfiyyat məlumatları ilə təminatı situasiyanı dəyişdirir. Nəzərə alsaq ki, son dövrlərdə artıq Rusiya ərazilərindəki bəzi strateji obyektlər Ukrayna tərəfindən zərbələrə məruz qoyulur, demək ki, anti-Rusiya koalisiyası yeni mərhələdə Moskvaya qarşı demarşa hazırlaşır.

Bu görüşün ən mühüm məqamlarından biri ABŞ Müdafiə Nazirliyi tərəfindən Almaniyanın Ştutqart şəhərində Ukraynaya hərbi yardımın koordinasiyasını həyata keçirəcək xüsusi idarəetmə mərkəzinin yaradılmasıdır. Mərkəzdə ABŞ-la yanaşı, 15 ölkənin yüksək rütbəli hərbçiləri fəaliyyət göstərir. Həmin mərkəz Ukraynaya hərbi yardım göstərən və “Ramştayn”a toplanan 40-dan çox ölkədən ibarət şəbəkəni idarə edəcək. Bu ölkələrin arasında Asiya qitəsindən olanlar da var. Bundan başqa, yaranan koalisiya İkinci Dünya müharibəsində Hitler Almaniyasına qarşı yaradılan beynəlxalq koalisiyadan sonra ikinci birlikdir. Həmin vaxt anti-Hitler birliyində 53 ölkə təmsil olunurdusa, Rusiyaya qarşı yaranan koalisiyada birləşənlərin sayı artıq 40-ı ötüb.

Məsələ ilə bağlı fikirlərini bölüşən politoloq Qabil Hüseynli bildirib ki, “Ramştayn”da keçirilən bu görüş Ukraynanın müdafiəsi üçün Qərbin gücünü səfərbər edəcək: “Son dövrlərdə Rusiyanın bəzi rəsmi şəxsləri tərəfindən səsləndirilən nüvə təhlükəsi məsələsi də diqqətə alınası məqamlardandır. Kreml artıq neçənci dəfədir ki, nüvə silahından istifadə ilə bağlı mesaj verir. Təbii ki, digər dövlətlər oturub bu mənzərəni seyr etmək fikrində deyillər. Münaqişənin sülh yolu ilə tənzimlənməsi istiqamətində də addımlar atılır. BMT baş katibi Quterreşin prezident Putinlə keçirdiyi görüş buna misaldır. Əslində, bu toplantı Moskva üçün xəbərdarlıq mesajı idi”.

Paylaş:

Baxılıb: 586 dəfə