Leyla Əliyeva əlaçı tələbələrə RAGT-ın mükafatlarını təqdim edib

Bakı:

24 °C

57 %

3 m/s

Əlaqə

AZ RU EN

Ana səhifə / Siyasət / Leyla Əliyeva əlaçı tələbələrə RAGT-ın mükafatlarını təqdim edib

Leyla Əliyeva əlaçı tələbələrə RAGT-ın mükafatlarını təqdim edib

19.10.2010 [09:18]

Xəbər verdiyimiz kimi, oktyabrın 16-da Moskvadakı “Bakı” kinoteatrında Heydər Əliyev Fondunun Rusiya nümayəndəliyinin rəhbəri, Rusiyanın Azərbaycanlı Gənclər Təşkilatının (RAGT) sədri Leyla Əliyevanın və ümumrusiya Azərbaycanlıları Konqresinin (üAK) rəhbərlərinin Rusiya ali məktəblərində təhsil alan azərbaycanlı tələbələrlə görüşü keçirilib. Görüşdə Azərbaycan gənclərinin xaricdə təhsili üzrə Dövlət Proqramı, habelə üAK xətti ilə Moskvanın və Rusiya regionlarının ali məktəblərinə daxil olmuş azərbaycanlı tələbələr iştirak ediblər. Bu, RAGT-ın rəhbəri Leyla Əliyevanın azərbaycanlı tələbələrlə ikinci görüşüdür. Görüşü üAK-ın prezidenti, Rusiya Tibb Elmlər Akademiyasının akademiki Məmməd Əliyev açaraq Azərbaycan rəhbərliyinin gənclərin xaricdə, o cümlədən, Rusiyada təhsilinə, habelə üAK xətti ilə Rusiya ali məktəblərinə daxil olmuş tələbələrə diqqət və qayğısından danışıb. Heydər Əliyev Fondunun Rusiya nümayəndəliyinin rəhbəri, RAGT-ın sədri Leyla Əliyeva tədbirin iştirakçılarını salamlayaraq deyib: “Mən əminəm ki, bu il bizim üçün uğurlu, parlaq və maraqlı olacaqdır və biz həm təhsildə, həm də RAGT-ın bütün layihələrinin həyata keçirilməsində müvəffəqiyyət qazanacağıq”.
Leyla Əliyeva Rusiyanın Azərbaycanlı Gənclər Təşkilatının çoxşaxəli fəaliyyəti və müxtəlif sahələrdə planları barədə ətraflı məlumat verib. O, vurğulayıb ki, bu il mayın 22-də Moskvada RAGT-ın yaradılmasının 1-ci ildönümünə həsr olunmuş konfrans keçirilib. Tədbirə təkcə Moskva və Sankt-Peterburqdan deyil, İvanovodan, Tverdən, Vladivostoktdan, Yekaterinburqdan və Rusiyanın digər regionlarından yüzlərlə qonaq gəlmişdi. Leyla Əliyeva deyib: “Gördüyünüz kimi, RAGT-ın coğrafiyası daim genişlənir və bu, çox sevindirici haldır. Bu gün Azərbaycanın gənclər klubları Rusiyanın bir çox təhsil müəssisəsində fəaliyyət göstərir və gənclərimizin Vətənimizi müxtəlif ali məktəblərdə layiqincə təmsil etmək imkanı vardır”.
RAGT-ın fəaliyyətindən danışan L.Əliyeva bildirib ki, təşkilat müxtəlif sahələrdə mütəmadi olaraq çoxlu tədbirlər - konsertlər, seminarlar, konfranslar, fotosərgilər, Azərbaycan mədəniyyəti günləri və həftələri keçirir. Leyla Əliyeva deyib: “Təşkilatımızın fəaliyyətinin başlıca istiqamətlərindən biri Heydər Əliyev Fondu ilə birlikdə keçirilən “Xocalıya ədalət” beynəlxalq kampaniyasıdır. Tədbirdə məqsəd Azərbaycanın bu şəhərində 1992-ci ildə baş vermiş faciəli hadisələr barədə bütün qitələrin sakinlərinə həqiqəti çatdırmaqdır. RAGT gənclərimizin iştirakı ilə keçirilən bütün idman tədbirlərini dəstəkləyir və sağlam həyat tərzini təbliğ edir. Bu həftə Seçenov adına Moskva Dövlət Tibb Universitetində İçV/QİçS probleminə həsr olunmuş konfrans keçirilmişdir. İndi fəallarımız müxtəlif regionlarda olacaq, ayrı-ayrı ali tədris müəssisələrində və məktəblərdə gənclərə bu virus barədə məlumat verəcəklər. Bildiyiniz kimi, artıq bir neçə ildir ki, RAGT-ın saytı fəaliyyət göstərir və onun istifadəçilərinin sayı daim artır. Yaxın gələcəkdə saytda RAGT-televiziya açılacaq. Burada fəallarımızın özlərinin çəkdiyi videosüjetlər yayımlanacaqdır. Bu il RAGT-ın jurnalının birinci nömrəsi çapdan çıxıb. Nəşrdə gənclərin həyatının müxtəlif sahələrini işıqlandırmağa çalışmışıq”.
Leyla Əliyeva qeyd edib ki, jurnalın yeni nömrəsi hazırlanır. O, maraqlı ideya və təklifləri jurnala göndərməyi təklif edib və onların arasından ən maraqlılarının dərc olunacağını vəd edib. Leyla Əliyeva bildirib ki, yaxın gələcəkdə Moskvadakı Xarici Ədəbiyyat Kitabxanasında Azərbaycan zalı açılacaq. Burada Azərbaycan ədəbiyyatı geniş təmsil olunacaq. O, deyib: “RAGT orada konfranslar, seminarlar, Azərbaycan dili, tarixi dərsləri təşkil edəcəkdir. Əlbəttə, biz təkcə həmyerlilərimizi deyil, bütün dostlarımızı orada görməyə şad olarıq”.
RAGT-ın rəhbəri qeyd edib ki, 2009-cu ildə RAGT əlaçı tələbələr üçün mükafat təsis edib. Bundan əlavə, Heydər Əliyev Fondu aztəminatlı ailələrdən olan tələbələr üçün illik təqaüd ayırıb. O, deyib: “ümidvaram ki, bu, tələbələrimiz üçün əlavə stimul olacaq və təhsildə və bütün digər işlərində daha yüksək nəticələr əldə etməkdə onlara kömək edəcəkdir”.
Leyla Əliyeva bütün gəncləri RAGT ilə daha sıx əməkdaşlığa çağıraraq vurğulayıb ki, qarşıda çoxlu planlar, ideyalar və layihələr var. O, deyib: “Mən ölkəmizin, Vətənimizin rifahı naminə fəal işinizə və səylərinizə görə hamınıza təşəkkürümü bildirmək istəyirəm. RAGT-ın qapıları hamının üzünə açıqdır və biz bütün işlərinizdə sizə yardım etməyə və sizi dəstəkləməyə hazırıq”.
Sonra mükafatlar təqdim olunub. Leyla Əliyeva RAGT-ın “Əlaçı mükafatı”nı, habelə Heydər Əliyev Fondunun mükafatlarını təqdim edib. Təqdimat mərasimindən sonra Rusiya Humanitar Universitetinin 2-ci kurs tələbəsi Jalə Cavadova, Birinci Moskva Tibb Universitetinin 5-ci kurs tələbəsi, Azərbaycan gənclərinin xaricdə təhsili üzrə Dövlət Proqramı xətti ilə təhsil alan Mirtapdıq Talıbov, habelə valideyn Mahirə Cəlilova çıxış ediblər. Onlar ölkə vətəndaşlarının Rusiyada təhsili üçün yaradılan şəraitə görə Azərbaycan Prezidenti İlham Əliyevə, Heydər Əliyev Fondunun Rusiya nümayəndəliyinə, RAGT-a və üAK-a təşəkkürünü bildiriblər. üAK-ın təhsil komitəsinin sədri Tofiq Məlikov Konqres adından əlaçı tələbələri təbrik edib. O, xüsusi vurğulayıb ki, üAK-ın səyləri müsbət nəticələr verir və bu gün Rusiyanın ali məktəblərində 196 azərbaycanlı təhsil alır.
Görüşün sonunda üAK-ın prezidenti Məmməd Əliyev bildirib ki, ümummilli lider Heydər Əliyevin Azərbaycan vətəndaşlarının dünyanın ən yaxşı ali məktəblərində təhsil alması arzusu uğurla həyata keçirilir. Qeyd olunub ki, “Lukoyl” Xeyriyyə Fondu da aztəminatlı ailələrdən olan tələbələr üçün xüsusi təqaüdlər təsis edib. Bundan əlavə, üAK-ın prezidenti Məmməd Əliyev ali tibb məktəbində təhsil alan və maddi dəstəyə ehtiyacı olan iki tələbə üçün təqaüd ayırıb. Görüş tələbələrin iştirakı ilə maraqlı konsert proqramı ilə başa çatıb.

Paylaş:

Baxılıb: 1200 dəfə