ABŞ Konqresinin separatçılara maliyyə yardımı hansı məqsədlərə xidmət edir?

Bakı:

15 °C

77 %

8 m/s

Əlaqə

AZ RU EN

Ana səhifə / Siyasət / ABŞ Konqresinin separatçılara maliyyə yardımı hansı məqsədlərə xidmət edir?

ABŞ Konqresinin separatçılara maliyyə yardımı hansı məqsədlərə xidmət edir?

17.03.2022 [10:07]

Nardar BAYRAMLI

ABŞ hökuməti Ermənistana və Qarabağdakı separatçılara yardım edəcək. Bununla bağlı ABŞ Konqresinin Nümayəndələr Palatası 2022-ci maliyyə ili üçün müvafiq qanun qəbul edib. Qarabağ separatçılarına 2 milyon dollar həcmində maliyyə dəstəyi göstərilməsi nəzərdə tutulur. Bu təşəbbüslə bir müddət öncə konqresmenlər Adam Şiff, Frenk Pallon, Ceki Speyer və bir sıra digər qanunvericilər Nümayəndələr Palatasının və Senatın Təxsisatlar üzrə Alt Komitələrinə müraciət etmişdilər.

ABŞ-ın Qarabağa maliyyə yardımı ayırmasının əsası varmı? Bu yardım hansı məqsədlərə xidmət edir? Məsələ ilə bağlı qəzetimizə açıqlama verən politoloq Ramiz Alıyev bildirib ki, ABŞ Konqresində Ermənistanla “dostluq qrupu” fəaliyyət göstərir və 220-dən çox üzvü var. Onun sözlərinə görə, Konqres hər il Qarabağdakı qondarma rejimə maliyyə yardımı ayırıb: “Həm Ermənistana, həm də separatçı rejimə pul dəstəyi göstərilir. Azərbaycan tərəfi həmişə bu məsələyə etirazını bildirib. Bu, ABŞ-la Azərbaycan arasında strateji tərəfdaşlıq münasibətlərinə zidd addımdır. 44 günlük müharibədə Ermənistan kapitulyasiyaya imza atdı və belə olan halda orada indi separatçıların tör-töküntüləri fəaliyyət göstərməkdədir. Əslində, 10 noyabr razılaşmasına əsasən separatçı rejimin olan-qalan tör-töküntüləri ərazini tərk etməlidirlər. Təəssüf ki, üçtərəfli Bəyanatın bu bəndi hələ icra edilməyib. Hazırda Qarabağ və Şərqi Zəngəzur var və ABŞ Konqresi qondarma rejimə yardım ayırırsa, o zaman separatizmin dəstəklənməsi anlamına gəlir. Hansı ki, ABŞ Minsk qrupunun həmsədr dövlətlərindən biridir. Azərbaycan ictimaiyyətinin ABŞ-ın bu addımına qarşı mövqeyi kəskindir. Belə hərəkətlər bir daha göstərir ki, Minsk qrupuna ölkəmizdə heç bir etimad yoxdur. Bütün bunlar Minsk qrupunun buraxılmasını tamamilə zərurətə çevirir. Müharibə bitdikdən, tənzimləmə prosesi getdikdən sonra yenə ermənipərəst mövqe sərgilənirsə, qəbulolunmaz haldır. Vətən müharibəsinə qədər onların davranışlarını ermənipərəst mövqe adlandırmaq olardı, indisə münaqişə bitib, Amerika zəhmət çəksin, sərhədlərin dəqiqləşdirilməsi işinə, iki ölkə arasında nəqliyyat-kommunikasiyaların bərpası məsələsinə dəstək versin, separatizmə yox”.

Politoloq qeyd edib ki, ABŞ Konqresinin həmin vəsaitin humanitar məqsədlər, o cümlədən minatəmizləmə əməliyyatı üçün ayrıldığı bildirilir: “Amma həmin vəsaitin xərclənməsinə nəzarət varmı? Əlbəttə ki, yox. Əslində, 30 il Azərbaycan torpaqlarını işğalda saxlayan ermənilər bu torpaqlarda on minlərlə mina basdırıblar ki, indi bundan əziyyət çəkən yenə Azərbaycan xalqıdır. Müharibə bitəndən indiyə qədər isə bir erməninin minaya düşməsi faktı olmadığı halda, minaları təmizləmək adı altında Qarabağdakı separatçılara maliyyə dəstəyi göstərmək əsassızdır. Aydındır ki, bu pullar mina adı altında ermənilərin ayaqda qalması, yenidən Azərbaycana qarşı iddialar irəli sürmək gücü yığa bilməsi üçün istifadə olunur”.

Paylaş:

Baxılıb: 1088 dəfə