Zaporojye AES partlayarsa...

Bakı:

27 °C

50 %

2 m/s

Əlaqə

AZ RU EN

Ana səhifə / Siyasət / Zaporojye AES partlayarsa...

Zaporojye AES partlayarsa...

05.03.2022 [10:12]

Xəzər də çirklənəcək

Dünya okeanının zəhərlənmə ehtimalı yaranır

Pərviz SADAYOĞLU

SSRİ Nazirlər Sovetinin 1977-ci ildə imzaladığı müvafiq qərara əsasən tikintisinə başlanılan və öz gücünə görə Avropanın birinci, dünyanın isə üçüncü Atom Elektrik Stansiyası sayılan Zaporojye AES təhlükədədir. Dünən səhər saatlarında Rusiya hərbçilərinin açdığı atəş nəticəsində AES-də güclü yanğın baş verib. Yanğın 2 min kvadratmetr sahəni əhatə edib. Bununla bağlı Ukrayna prezidenti Vladimir Zelenski dünya birliyinə müraciət edib. O bildirib ki, 6 blokdan ibarət olan bu stansiya partlayacağı təqdirə, böyük fəlakətlər yaşanacaq. Zelenski Rusiyadan başqa heç bir dövlətin indiyədək nüvə enerji bloklarını atəşə tutmadığını da diqqətə çatdırıb.

Bu arada, Ukrayna KİV-i də Zaporojye ərazisində baş verənlərlə bağlı məlumatlar yayıb. Ukraynanın Nüvə Tənzimlənməsi üzrə Dövlət Müfəttişliyinin məlumatına görə, Zaporojye AES-in inzibati binası və stansiyanın girişi rus qoşunlarının nəzarətində olsa da, stansiyanın şəxsi heyəti enerji bloklarında işlərini davam etdirir, nüvə qurğularının stabil işləməsini təmin edirlər.

Məsələ ilə bağlı fikirlərini bölüşən Milli Məclisin deputatı Arzu Nağıyev bildirib ki, müharibə dövründə strateji zonalar, o cümlədən atom stansiyaları və radiaktiv problemlər yarada biləcək obyektlər çox ciddi şəkildə qorunur. Hətta Ukrayna ilə Rusiya arasında müharibə başlayan vaxt prioritetlərdən biri Çernobıl AES-in qorumasını həyata keçirmək məsələsi idi. Millət vəkilinin fikrincə, Rusiyanın Zaporojye AES-ə qarşı apardığı əməliyyat qorxu yaratmağa hesablanıb: “Zaporojye AES-ə edilən hücum xaos və qorxu yaratmaq üçün nəzərdə tutulub. Bu, heç bir müharibə qanunlarına uyğun deyil. Rusiya qorxu hissini yaratmaq, insanları bu ərazidən çəkindirmək, qaçırtmaq üçün bu kimi vasitədən istifadə edir. Hələ ki, fəsadlar haqda ciddi bir məlumat yoxdur. Düşünürəm ki, bu, ilk növbədə, əhali arasında qarışıqlıq yaratmağa hesablanmış addımdır. Rusiya istəyir ki, insanlar o ərazidən uzaqlaşsın və qoşunlar da həmin əraziləri rahat şəkildə tuta bilsin. Fikrimcə, Rusiya AES-i partlatmaq niyyətində deyil. Çünki bu, müharibə qanunlarına ziddir”.

AMEA Radiasiya Problemləri İnstitutunun baş direktoru İslam Mustafayev isə bildirib ki, altı blokdan ibarət Zaporojye AES partlayarsa, onun fəsadları Çernobıl hadisələrindən daha güclü ola bilər: “Rusiya qoşunları iddia edir ki, onların məramı atom reaktorunu mühafizə etməkdir ki, ora başqa interversiyalar olmasın. Artıq məsələ beynəlxalq səviyyədə müzakirə edilir. Atom Enerjisi üzrə Beynəlxalq Agentliyin rəhbəri Rafael Qrossi də açıqlamasında bildirib ki, AES-i qorumaq lazımdır. Onun partlaması Çernobıldan 10 dəfə artıq ziyan verə bilər”.

İ.Mustafayev onu da bildirib ki, bu reaktorun partlaması regiona, o cümlədən də Xəzər hövzəsinə müəyyən təsirlər yarada bilər. “Düzdür, öldürücü olmasa da, hava yolu ilə gələ bilər və müəyyən təsirlər göstərər. Nəzərə alınmalıdır ki, Volqa çayı Xəzər dənizi ilə əlaqəlidir və reaktiv maddələrin sularla bizim regiona gəlmə ehtimalı mövcuddur. Bu məsələ beynəlxalq həyəcana da səbəb olub. Bu reaktiv maddələr Qara dəniz vasitəsilə dünya okeanına axsa, böyük fəlakətlər yaşanacaq”, - deyə alim əlavə edib.

Paylaş:

Baxılıb: 867 dəfə