Azərbaycanda qeyd ediləcək "Dünya Ürək Günü" ilə bağlı mətbuat konfransı olub

Bakı:

20 °C

88 %

3 m/s

Əlaqə

AZ RU EN

Ana səhifə / Siyasət / Azərbaycanda qeyd ediləcək "Dünya Ürək Günü" ilə bağlı mətbuat konfransı olub

Azərbaycanda qeyd ediləcək "Dünya Ürək Günü" ilə bağlı mətbuat konfransı olub

23.09.2010 [10:37]

Dünən “Dünya ürək Günü” ilə bağlı mətbuat konfransı keçirilib.
Azərbaycan ürək və Damar Cərrahiyyəsi Cəmiyyətinin sədri Kamran Musayev bildirib ki, cəmiyyətin təşəbbüsü ilə Azərbaycanda ilk dəfə olaraq “Dünya ürək Günü” geniş səviyyədə qeyd ediləcək. Əlamətdar günlə əlaqədar silsilə tədbirlər həyata keçiriləcək. Belə ki, “Dünya ürək Günü” çərçivəsində Körpələr evində uşaqlar kardioloji müayinədən keçiriləcək, Azərbaycan Tibb Universitetində tələbələrin iştirakı ilə seminar təşkil olunacaq. Eyni zamanda, ticarət mərkəzlərində aksiyalar təşkil ediləcək. Aksiyalar zamanı insanlara ürək-damar xəstəlikləri haqqında kitabçalar paylanacaq, müayinələr aparılacaq. Mərkəzi Klinik Xəstəxanada aztəminatlı vətəndaşlar üçün kampaniya təşkil olunacaq. Sentyabrın 25-də isə “Mən ürəklə işləyirəm” adlı beynəlxalq elmi konfrans keçiriləcək. Natiq qeyd edib ki, artıq 10 ildir ki, Dünya ürək Federasiyası tərəfindən “Dünya ürək Günü” dünyanın 200-dən artıq ölkəsində qeyd edilir. Azərbaycanda dövlət tərəfindən səhiyyə sahəsinə göstərilən diqqət və qayğının nəticəsidir ki, ölkəmizdə tibbin hər sahəsində, o cümlədən, kardiologiyada yüksək nailiyyətlər əldə olunub. Biz çox sevinirik ki, bu əlamətdar günü ciddi bir bazaya əsaslanıb qeyd edə bilirik. Kardioloq bildirib ki, tədbirin məqsədi ictimaiyyətin diqqətini ürək-damar xəstəliklərinin profilaktikasına yönəltməkdir. Kardioloq üzeyir Rəhimov vurğulayıb ki, ürək damar xəstəlikləri dünyada çox geniş yayılıb. Azərbaycanda risk faktorlarının daha çox mövcud olduğundan bu xəstəlik ölüm və əlilliklə nəticələnir. ürək və Damar Cərrahiyyəsi Cəmiyyətinin üzvü Firdovsi İbrahimov qeyd edib ki, dünyada ölüm hallarının 50 faizi ürək-damar xəstəlikləri ilə bağlıdır. Bu xəstəliklərin yaranmasına təsir edən faktorların qarşısını almaqla, insanları maarifləndirməklə bu xəstəlikdən asanlıqla qorunmaq mümkündür.
Tədbirdə bildirilib ki, Azərbaycanda əsasən ürəyin işemiyası, ürək çatışmazlıqları, anadangəlmə qüsurlar, aritmiya daha geniş yayılıb.
Mətbuat konfransında Dünya ürək Federasiyasının hazırladığı 10 tövsiyə haqqında məlumat verilib. Belə ki, insanlara meyvə və tərəvəzdən istifadə, fəal həyat tərzi və sağlam qida seçimi çəkini nəzarətdə saxlamaq, spirtli içkilərdən və siqaretdən imtina etmək, stressdən uzaq olmaq tövsiyə olunur.

Paylaş:

Baxılıb: 1247 dəfə