Əlilliyi olan uşaqların cəmiyyətə qatılması və inteqrasiyasına həsr olunmuş yay düşərgəsi açılıb

Bakı:

21 °C

88 %

6 m/s

Əlaqə

AZ RU EN

Ana səhifə / Siyasət / Əlilliyi olan uşaqların cəmiyyətə qatılması və inteqrasiyasına həsr olunmuş yay düşərgəsi açılıb

Əlilliyi olan uşaqların cəmiyyətə qatılması və inteqrasiyasına həsr olunmuş yay düşərgəsi açılıb

14.09.2010 [10:07]

Heydər Əliyev Fondu, Gənclər və İdman Nazirliyi və YUNİSEF Nabranda uşaq hüquqları, sağlam həyat tərzi və yaşam bacarıqları, əlilliyi olan uşaqların cəmiyyətə inteqrasiyası mövzularında uşaqların biliklərinin və həmyaşıddan-həmyaşıda bacarıqlarının artırılmasına töhfə verəcək yay düşərgəsi təşkil ediblər.
AzərTAc xəbər verir ki, sentyabrın 10-dan Nabrandakı “Atlant” istirahət mərkəzində təşkil edilmiş düşərgənin açılış mərasimində Xaçmaz rayon İcra hakimiyyətinin başçısı Şəmsəddin Xanbabayev, YUNİSEF-in nümayəndəsi Natiq Umarov, “Dan” İctimai Birliyinin sədri Gülarə Teymurova və başqaları çıxış edərək son illər ölkəmizdə uşaqların hərtərəfli inkişafına göstərilən diqqət və qayğıdan danışıblar.
Vurğulanıb ki, uşaqların hüquq və azadlıqlarının qorunması, onların keyfiyyətli təhsil və yüksək standartlara cavab verən tibbi xidmətlərlə təmin edilməsi, hərtərəfli şəxsiyyət və layiqli vətəndaş kimi formalaşması Azərbaycan Respublikasının dövlət uşaq siyasətinin prioritet istiqamətlərini təşkil edir. Əsası ümummilli liderimiz Heydər Əliyev tərəfindən qoyulmuş və Prezident İlham Əliyevin uğurla davam etdirdiyi dövlət uşaq siyasəti artıq milli strategiya kimi formalaşmaqdadır. Bu siyasətin davamı olaraq son illərdə Prezident İlham Əliyev və ölkənin birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın uşaqlarla bağlı məsələlərə xüsusi diqqət yetirmələri həmin sahəyə qayğının daha da artmasına səbəb olub.
Diqqətə çatdırılıb ki, təhsilin inkişafına dəstək Heydər Əliyev Fondunun fəaliyyətinin prioritet istiqamətlərindəndir. Fondun reallaşdırdığı ən möhtəşəm layihələrdən biri “Yeniləşən Azərbaycana yeni məktəb” layihəsidir. Son illərdə bu proqram çərçivəsində 300-ə yaxın məktəb binası tikilib. Artıq layihənin ikinci mərhələsinə başlanılıb. Bu layihə çərçivəsində yüzlərlə məktəb yenidən bərpa olunub, ən müasir avadanlıq və kompyuterlərlə təchiz edilib.
Fondun prezidentinin təşəbbüsü ilə hazırlanmış “Uşaq evləri və internat məktəblərinin inkişaf Proqramı”na əsasən son 5 ildə ölkədə xüsusi qayğıya ehtiyacı olan uşaqların təhsil aldığı 38 internat məktəbi və uşaq evi yenidən qurulub, əsaslı təmir edilib, ən müasir avadanlıqla təchiz olunub. Bu müəssisələrdə kimsəsiz uşaqlar üçün ev şəraitinə yaxın mühit yaradılıb.
Xüsusi olaraq vurğulanıb ki, Mehriban xanım Əliyevanın ideyaları ilə gerçəkləşən hər bir işin təməlində insanlara olan sevgi dayanır. Xalq bu məhəbbəti görür və qiymətləndirir.
Məlumat verilib ki, beşgünlük düşərgənin əsas məqsədi təlim bacarıqları öyrətməklə əlil uşaqların cəmiyyətə inteqrasiyasını asanlaşdırmaq və həmyaşıdları arasında ünsiyyət vasitələrinə yiyələnmək vərdişlərini artırmaqdır. Düşərgəyə Xaçmazdan və Bakı şəhərinin rayonlarından olan 13-17 yaşlarında 50-yə yaxın yeniyetmə və gənc cəlb olunub. Düşərgədə 14 valideyn, 14 texniki işçi və mütəxəssislər çalışıb. Burada müxtəlif tədbirlər, o cümlədən idman oyunları keçirilib, filmlər nümayiş etdirilib və müzakirələr aparılıb. Bir sözlə, uşaqların mənalı istirahəti üçün hər cür şərait yaradılıb.
Qeyd edilib ki, belə tədbirlər bundan sonra da təşkil olunacaq və bu düşərgələrə daha çox yeniyetmə və gənc cəlb ediləcək.

Paylaş:

Baxılıb: 1215 dəfə