BBQ-nin "hesabatı" müxalifət qəzetlərinin "qara piar"ını xatırladır

Bakı:

24 °C

74 %

15 m/s

Əlaqə

AZ RU EN

Ana səhifə / Siyasət / BBQ-nin "hesabatı" müxalifət qəzetlərinin "qara piar"ını xatırladır

BBQ-nin "hesabatı" müxalifət qəzetlərinin "qara piar"ını xatırladır

09.09.2010 [10:10]

Sanki “hesabat”da irəli sürülən iddiaların böyük əksəriyyəti bu qəzetlərin səhifələrində yer almış yalan və böhtanların surətidir
Bu gün hər kəsə bəllidir ki, erməni lobbisinin və işğalçı Ermənistanın maraqlarını müdafiə edən xarici dairələr, təşkilatlar ardıcıl olaraq Azərbaycana qarşı qərəzli iddialar irəli sürür, beynəlxalq aləmdə ölkəmizin mənfi imicinin formalaşdırılmasına çalışırlar. Bu qüvvələr fürsət düşən kimi, müxtəlif vasitələrdən istifadə edərək özlərinin qara məqsədlərini həyata keçirməyə başlayırlar. Həmin qərəzli dairələrin siyasi sifarişlərini həyata keçirən təşkilatlar içərisində Beynəlxalq Böhran Qrupu (BBQ) da var. Məlum olduğu kimi, həmin maraq qruplarının niyyətlərini reallaşdırmağa kömək edən sözügedən təşkilat bu günlərdə Azərbaycanla bağlı əsası olmayan, heç bir araşdırma faktlarına əsaslanmayan, yalan və böhtanlardan ibarət “hesabat” hazırlayıb. Təbii ki, Azərbaycanın ictimaiyyət nümayəndələri, dərhal “hesabat”ın qərəzli və obyektivlikdən uzaq olması ilə bağlı öz fikirlərini söyləyiblər.
Bununla belə, bəzi məqamlar var ki, onların üzərində dayanmaq vacibdir. Məsələn, əsas təəssüf doğuran məqam ondan ibarətdir ki, Azərbaycandakı bəzi siyasi qurumlar, mətbuat orqanları milli maraqlarımızı nəzərə almayaraq, anti-Azərbaycan qüvvələrinin dəyirmanına su tökür, onların anti-təbliğat kampaniyasına yardım göstərirlər. Belə ki, müxalifət qəzetləri Azərbaycanda seçkiqabağı siyasi kapital qazanmaq məqsədilə BBQ-nin həmin “hesabatı”nı dərc ediblər.
Digər tərəfdən, təşkilatın hesabatına nəzər saldıqda belə bir təəssürat yaranır ki, sanki orada irəli sürülən iddiaların böyük əksəriyyəti Azərbaycandakı radikal müxalifətə yaxın qəzetlərin səhifələrində yer almış yalan və böhtanların surətidir. “Hesabat” bəzi müxalifət partiyalarının, onların nəzarətində olan qəzetlərin dezinformasiya, “qara piar” kampaniyasının elementlərinə əsaslandığından, irəli sürülən iddiaların böyük əksəriyyəti məhz “sarı mətbuat”ın, “bulvar” qəzetlərinin yazı stilini yada salır. Bir sözlə, ümumilikdə, BBQ-nin “hesabatı” müxalifət qəzetlərinin “qara piar”ını xatırladır...
Bu cür oxşarlıqların ortaya çıxması isə Azərbaycan ictimaiyyətində bir sıra suallar yaradır:
Görəsən, BBQ-nin “hesabatı” ilə müxalifət qəzetlərinin dərc etdiyi materiallar arasında niyə bu qədər çox oxşarlıqlar var? Nə üçün hər zaman jurnalistikanın prinsiplərindən, qərəzsizlikdən və obyektivlikdən dəm vuran müxalifət qəzetləri “hesabat”la bağlı araşdırma aparmadan onu qəzet səhifəsində yerləşdiriblər? Nə üçün Azərbaycanın uğurlarından bir kəlmə belə yazmayan bu qəzetlər, ölkəmizin imicinə zərər vuran xarici dairələrin “hesabat”larını təmtəraqlı şəkildə nəşr edirlər?
Son olaraq qeyd edək ki, radikal müxalifətə yaxın qəzetlərin bu mövqeyi Azərbaycan ictimaiyyəti tərəfindən heç də normal qəbul olunmur. Azərbaycan xalqı Prezident İlham Əliyevin yürütdüyü siyasəti dəstəkləyir və hər zaman da bunu sübut edib. ölkəmiz xalqla hakimiyyətin birliyi nəticəsində böyük uğurlara nail olub. Müxalifət qəzetləri isə ölkəmizdə mövcud olan söz və fikir azadlığından sui-istifadə etdiyinə görə, hər zaman ictimai qınaqla üzləşəcək.
Ramil VƏLİBƏYOV

Paylaş:

Baxılıb: 1159 dəfə