İşğaldan əziyyət çəkən soydaşlarımız hər zaman olduğu kimi, bu gün də dövlətin diqqət və qayğısını hiss edirlər

Bakı:

20 °C

52 %

4 m/s

AZ RU EN

Ana səhifə / Siyasət / İşğaldan əziyyət çəkən soydaşlarımız hər zaman olduğu kimi, bu gün də dövlətin diqqət və qayğısını hiss edirlər

İşğaldan əziyyət çəkən soydaşlarımız hər zaman olduğu kimi, bu gün də dövlətin diqqət və qayğısını hiss edirlər

16.09.2010 [09:45]

Azərbaycan hökuməti əhalinin sosial qayğıya ən çox ehtiyacı olan təbəqəsini təşkil edən qaçqın və məcburi köçkünlərin normal yaşayışını, həyat şəraitini təmin etmək üçün diqqət və qayğısını heç bir zaman əsirgəmir. Qaçqın və məcburi köçkünlərin sosial təminatı hökumətin sosial siyasətinin prioritet istiqamətini təşkil edir. Uzun illərdir ki, bu sahədə dövlət səviyyəsində müxtəlif layihələr həyata keçirilir, qaçqınların sosial problemlərinin həllinə böyük miqdarda vəsaitlər ayrılır. Məcburi köçkünlərin hərtərəfli müdafiəsi istiqamətində dövlətin gördüyü işləri sistemli və ardıcıl həyata keçirmək məqsədilə, Prezident İlham Əliyevin 1 iyul 2004-cü il tarixli Sərəncamı ilə “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə” Dövlət Proqramı təsdiqlənib. Sevindirici haldır ki, proqramın uğurla həyata keçirilməsi nəticəsində, məcburi köçkün ailələrinin əksər problemləri öz həllini tapıb.
Qeyd edək ki, dövlətin həyata keçirdiyi tədbirlər ilk növbədə yurd-yuvalarından didərgin düşmüş soydaşlarımızın başlıca problemi olan mənzil-məişət şəraitinin yaxşılaşdırılmasına yönəlib. Dövlət başçısının məcburi köçkün ailələri ilə keçirdiyi görüşlərin birində vurğuladığı kimi, hazırda ölkədə bütün çadır şəhərcikləri ləğv olunub: “Dövlət Proqramı qəbul edilib və ilk mərhələdə ən ağır vəziyyətdə yaşayan soydaşlarımızın problemləri həll olunub. Artıq Azərbaycanda bir dənə də olsun çadır şəhərciyi yoxdur. İndiki mərhələdə digər yerlərdə yararsız binalarda yaşayan soydaşlarımızın problemləri həll olunmalıdır. Bakıda, digər rayon mərkəzlərində məcburi köçkünlər üçün çoxmərtəbəli evlər tikilir”.
Hələ 2003-cü ildə dövlət başçısı İlham Əliyev 2008-ci ilədək respublikadakı bütün çadır şəhərciklərinin ləğv ediləcəyini bildirmişdi. ölkə başçısının bilavasitə rəhbərliyi ilə həyata keçirilən tədbirlər sayəsində 2007-ci ilin dekabrında Saatlı və Sabirabad rayonlarındakı son 3 çadır düşərgəsinin ləğvi ilə respublikada mövcud olan 12 çadır düşərgəsi tamamilə aradan qaldırıldı. çadır şəhərciklərinin ləğvindən sonra isə qaçqınların məişət şəraitinin yaxşılaşdırılması istiqamətində tədbirlərin növbəti mərhələsinin icrasına başlanıldı. Bu çərçivədə fin tipli qəsəbələrdə, yataqxanalarda, ictimai binalarda, təhsil müəssisələri binalarında, uşaq bağçalarında və digər yerlərdə yaşayan məcburi köçkün və qaçqınların müasir tələblərə cavab verən yeni qəsəbələrdə yerləşdirilir. Təkcə ötən il 1416 ailə, yəni təqribən 7 min nəfər yeni mənzillərə köçürülüb. Əvvəlki illərdə olduğu kimi, bu il də “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə” Dövlət Proqramı və Azərbaycan Respublikası Prezidentinin müvafiq Sərəncamı ilə Dövlət Proqramına edilmiş əlavələrdən irəli gələn tələblər uğurla davam etdirilib, soydaşlarımızın mənzil-məişət şəraitinin yaxşılaşdırılması istiqamətində planlaşdırılan işlər vaxtında yüksək səviyyədə icra olunub. Belə ki, bu ilin birinci yarısı ərzində respublikanın müxtəlif şəhər və rayonlarında qaçqın və məcburi köçkün ailələri üçün yeni yaşayış binaları tikilərək istifadəyə verilib. Görülən işlərin davamı olaraq Ağdam rayonu ərazisində məskunlaşmış 689 məcburi köçkün ailəsi üçün hər cür infrastrukturu olan müasir tipli qəsəbənin, Naftalan şəhərindəki “Qarabağ” sanatoriyasında 164 məcburi köçkün ailəsi üçün Goranboy rayonunun ərazisində 3 ədəd beşmərtəbəli yaşayış binalarının, Yevlax rayonunda 612 məcburi köçkün ailəsi üçün ərazisində 10 ədəd beşmərtəbəli binadan ibarət məhəllənin tikinti işləri vüsətlə davam etdirilir. Həyata keçirilən layihələrin maliyyələşdirilməsində Dövlət Neft Fondunun dəstəyini ayrıca vurğulamaq lazımdır. ümumiyyətlə, Azərbaycanın artan maliyyə imkanları digər sosial məsələlərdə olduğu kimi, evlərindən didərgin düşümüş soydaşlarımızın da problemlərinin sürətlə aradan qaldırılmasına imkan verir.
Qaçqın və məcburi köçkün ailələrinin sosial vəziyyətinin yaxşılaşdırılması yönündə görülən işlərin mühüm hissəsini belə ailələrdən olan insanların işsizlik probleminin aradan qaldırılması təşkil edir. Məcburi köçkünlərin məşğulluğunun artırılması və yoxsulluğun aradan qaldırılması məqsədilə yeni iş yerlərinin yaradılması diqqət mərkəzindədir. Təkcə bu ilin birinci yarısı ərzində 702 nəfər Əmək və Əhalinin Sosial Müdafiəsi Nazirliyi ilə birgə fəaliyyət nəticəsində işlə təmin olunub. Bundan əlavə, 134 nəfərə işsizlik müavinəti təyin olunub, 253 nəfər əmək bazarının tələblərinə uyğun olaraq peşə hazırlığı kurslarına, 217 nəfər isə haqqı ödənilən ictimai işlərə cəlb olunub. Məcburi köçkünlərin maddi durumunun yaxşılaşmasına kömək məqsədilə atılan addımlardan biri kimi bu ay Prezident İlham Əliyevin imzaladığı “Məcburi köçkünlərə yemək xərci üçün verilən aylıq müavinətin artırılması haqqında” Sərəncamı da göstərmək olar. Görülən işlərin nəticəsi olaraq məcburi köçkünlər arasında yoxsulluq həddi minimuma enib.
Qaçqın və məcbur köçkün ailələri dövlətin onlar üçün yaratdığı geniş imtiyazlardan istifadə edirlər. Soydaşlarımız hər zaman olduğu kimi, bu gün də dövlətin hərtərəfli diqqət və qayğısını hiss edirlər və hökumət bu sahədə tədbirləri problemlər tam aradan qalxanadək davam etdirəcək.
Hülya MƏMMƏDLİ

Paylaş:

Baxılıb: 1066 dəfə