Səbail rayonunun Badamdar qəsəbəsindəki 236 nömrəli məktəb Heydər Əliyev Fondunun dəstəyi ilə əsaslı təmir və yenidənqurmadan sonra istifadəyə verilib

Bakı:

25 °C

65 %

4 m/s

AZ RU EN

Ana səhifə / Siyasət / Səbail rayonunun Badamdar qəsəbəsindəki 236 nömrəli məktəb Heydər Əliyev Fondunun dəstəyi ilə əsaslı təmir və yenidənqurmadan sonra istifadəyə verilib

Səbail rayonunun Badamdar qəsəbəsindəki 236 nömrəli məktəb Heydər Əliyev Fondunun dəstəyi ilə əsaslı təmir və yenidənqurmadan sonra istifadəyə verilib

08.09.2010 [09:45]

Dünən Bakının Səbail rayonunun Badamdar qəsəbəsindəki 236 nömrəli orta məktəbin binası Heydər Əliyev Fondunun dəstəyi ilə əsaslı təmir və yenidənqurmadan sonra istifadəyə verilib. Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva mərasimdə iştirak edib. 1966-cı ildə inşa olunmuş və 1940 şagirdin təhsil aldığı 236 nömrəli orta məktəbin binasının əsaslı təmir və yenidənqurma işlərinə cari ilin mayından başlanılıb. ümumi sahəsi 4960 kvadratmetr olan bu köhnə məktəb binası Heydər Əliyev Fondunun təşəbbüsü ilə qısa müddətdə müasir tələblər səviyyəsində əsaslı təmir olunub. Mövcud üç mərtəbədən əlavə, 4050 kvadratmetr sahədə mansard tipli dam örtüyü quraşdırılıb. Məktəbin ətrafı abadlaşdırılaraq, gözəl görkəm alıb.
Təhsil ocağının 31 sinif otağında, 7 fənn kabinetində və müxtəlif təyinatlı 11 otağında müasir təhsil üçün hər cür şərait yaradılıb, siniflər yeni avadanlıq və dərs ləvazimatı ilə təmin olunub.
İlk dəfədir ki, təhsil ocağında belə yüksək səviyyədə təmir işləri aparılıb. İndi burada həm müəllimlərin yüksək səviyyədə fəaliyyəti, həm də şagirdlərin biliklərin əsaslarına yiyələnmələri üçün hər cür şərait yaradılıb.
Geniş və işıqlı foyedə Ulu öndər Heydər Əliyevin, dövlətimizin başçısı İlham Əliyevin, Azərbaycanın birinci xanımı Mehriban Əliyevanın ölkəmizdə təhsilə diqqət və qayğısının artırılması istiqamətində gördükləri işləri və məktəbin təmirində böyük dəstəyi olan Heydər Əliyev Fondunun fəaliyyətini əks etdirən fotostendlər zövqlə tərtib edilib, dövlət atributları əks olunub.
Həm şagirdlərin, həm də müəllimlərin açılışını səbirsizliklə gözlədikləri bu bilik ocağında keyfiyyət, müasirlik və yüksək zövq vəhdət təşkil edir. İndi bu məktəb maddi-texniki bazasının zənginliyinə görə ölkəmizdə müasir təhsil komplekslərindən birinə çevrilib.
Məktəbin şagirdləri Heydər Əliyev Fondunun prezidentinə gül dəstəsi təqdim ediblər.
Mehriban xanım Əliyeva məktəbin təmirdən əvvəlki vəziyyətini əks etdirən fotostendə baxıb. Fondun prezidenti məktəblə tanış olub.
Səbail rayon İcra hakimiyyətinin başçısı Asif Əsgərov Heydər Əliyev Fondunun prezidenti Mehriban xanım Əliyevaya məlumat verib ki, məktəbdə təhsilin beynəlxalq standartlara uyğun qurulması üçün müasir fənn kabinetləri yaradılıb. Kimya, biologiya və fizika kabinetləri müxtəlif təcrübələrin aparılması üçün lazımi avadanlıq və əyani vəsaitlərlə təchiz olunub.
Bildirilib ki, məktəbdə yaradılmış iki kompyuter kabinetində müasir kompyuterlər quraşdırılıb. Kompyuterlərin internet şəbəkəsinə qoşulması və şagirdlərin informatika biliklərinin artırılması üçün kompyuterlər lazımi proqramlarla təchiz edilib. Təhsil ocağının gənclərin çağırışa qədər hazırlığı kabineti isə orduda xidmətə hazırlaşan gənclərin hərbi hazırlığının yüksək səviyyədə təşkili məqsədi ilə lazımi ləvazimat, stendlərlə təmin olunub, mini kazarma yaradılıb. Məktəbdə 200 nəfərlik akt zalında kütləvi tədbirlərin keçirilməsi üçün hər cür şərait var. Yeni musiqi otağı isə musiqi alətləri və Almaniyanın istehsalı olan royal ilə təchiz olunub. Gənc nəslin sağlam böyüməsi üçün məktəbdə yaradılmış geniş zalda şagirdlər idmanın bütün növləri ilə məşğul ola biləcəklər. Burada fəaliyyət göstərən müasir kitabxana isə bütün dərsliklər, bədii ədəbiyyat, müxtəlif lüğətlər və s. ilə təchiz edilib.
Təhsil ocağında yaradılan şərait müəllim kollektivinin böyük sevincinə səbəb olub. Məktəbin direktor müavini Yaqut İslamova göstərilən diqqət və qayğıya görə Prezident İlham Əliyevə və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya pedaqoji kollektiv adından təşəkkür edərək deyib: “Sevincimiz böyükdür. Aldığımız bu böyük hədiyyə bizi səylə işləməyə, dövlətimizə layiqli gənclər yetişdirməyə ruhlandırır. Biz möhtərəm Prezidentimiz İlham Əliyevin siyasətini bəyənirik və onun ardınca gedirik. Prezidentimizi həddindən artıq çox sevirik. Onun yaxın silahdaşı kimi Sizə də dərin təşəkkürümüzü bildiririk ki, incəsənətimizə, mədəniyyətimizə, təhsilimizə, səhiyyəmizə bu cür gözəl qayğı göstərirsiniz”.
Heydər Əliyev Fondunun prezidenti Mehriban xanım Əliyeva ölkəmizin təhsil sisteminin müasir və beynəlxalq standartlara cavab verməsi üçün lazımi tədbirlərin görüldüyünü və bunun gələcəkdə də davam etdiriləcəyini vurğulayaraq deyib: “Azərbaycanın bütün məktəbləri yüksək səviyyədə olmalıdır. Demək olar ki, bu gün artıq biz bu yol ilə gedirik. Siz bilirsiniz ki, son dörd il ərzində 1800 yeni məktəb inşa və təmir olunub, ən yüksək standartlara cavab verir. Yüksək səviyyədə təhsil üçün bütün nə lazımdırsa bu məktəbdə var”.
Sonda xatirə şəkli çəkdirilib.

Paylaş:

Baxılıb: 1261 dəfə