Üçrəngli bayrağımız mənliyimizin, öz dövlətimizə hakimliyimizin atributudur

Bakı:

24 °C

60 %

4 m/s

Əlaqə

AZ RU EN

Ana səhifə / Siyasət / Üçrəngli bayrağımız mənliyimizin, öz dövlətimizə hakimliyimizin atributudur

Üçrəngli bayrağımız mənliyimizin, öz dövlətimizə hakimliyimizin atributudur

07.09.2010 [12:41]

Prezident İlham Əliyev: Bizim bayrağımız qürur mənbəyimizdir. Bizim bayrağımız canımızdır, ürəyimizdir

Bayraq mənliyimdir, bayraq kimliyim,
Bayraq - öz yurduma öz hakimliyim.
Bəxtiyar Vahabzadə

Məlum olduğu kimi, sentyabr ayının 1-də Bakıda Dövlət Bayrağı Meydanının açılışı olub. Açılış mərasimində Prezident İlham Əliyev, xanımı Mehriban Əliyeva və digər dövlət rəsmiləri, ölkəmizdəki xarici ölkələrin səfirləri iştirak ediblər. Həmin gün topların yaylım atəşlərinin müşayiəti ilə hündürlüyü 162 metr olan sütun üzərində üçrəngli bayrağımızın dalğalanmasını bütün dünya seyr edib. Bununla da, dünya Azərbaycan xalqının üçrəngli bayrağına olan sevgisini, hörmətini görüb...
Bayraq hər bir dövlətin beynəlxalq münasibətlər sistemində iştirak etməsi üçün vizit vərəqəsi sayılırsa, bu, xalq üçün onun mənliyini, kimliyini ifadə edən xüsusi atributdur. Bayrağın təşkil olunduğu rənglər, onun üzərindəki rəmzlər xalqın hansı etnik mənsubiyyətə, mədəniyyətə, dinə sahib olduğunu, onun hansı amallar uğrunda mübarizə apardığını göstərir. Azərbaycan bayrağı da üzərindəki, yaşıl, qırmızı və göy rənglər, eyni zamanda, aypara və səkkizguşəli ulduz özündə ehtiva etdiyi mənalarla xalqımızın tarixi keçmişindən xəbər verir.
Bu bir həqiqətdir ki, əsrlər boyu Azərbaycan xalqı müstəqil dövlət qurmaq, onun atributlarını qoruyub saxlamaq arzusunda olub. Lakin Azərbaycanın yerləşdiyi ərazinin geosiyasi əhəmiyyəti hər zaman böyük dövlətlərin bura olan marağını artırıb. Ona görə də, Azərbaycan uzun əsrlər boyu böyük dövlətlərin işğalına məruz qalıb, əsarət altında, məhz, həmin güclərin bayraqları altında yaşamaq məcburiyyətində olub. Amma tarixinə, milli adət-ənənələrinə, zəngin mədəniyyətinə bağlılığı Azərbaycan xalqının dövlətçilik ənənələrinin məhv olmasına imkan veməyib. I Dünya müharibəsindən sonra xalqımız müstəqil dövlət formalaşdırmaq şansı əldə edib və dövlətçilik ənənələrinin yaşadılması istiqamətində tarixi addımlar atıb.
üçrəngli Azərbaycanın bayrağı da ilk dəfə məhz 1918-ci ildə ADR dövründə təsis edilib. Bolşeviklərin işğalı ilə zirvələrdən qəlblərə endirilən üçrəngli bayrağımız 1990-cı ildə yenidən əbədi olaraq Naxçıvanda qaldırılıb. Bu gün isə bayrağımız Azərbaycanın qüdrətini nümayiş etdirən yüksəklikdə dalğalanır.
Azərbaycan bayrağının dünyanın ən hündür dirəyinin üzərində dalğalandırılması isə bir çox qürurverici məqamlardan xəbər verir:
- Azərbaycan xalqı bayrağının onun üçün nə qədər qiymətli olduğunu bir daha təsdiq etdi;
- Bir daha bayrağın milli-etnik mənsubiyyətindən asılı olmayaraq, hər bir azərbaycanlının qüruru, mənliyi, şərəfi olduğu sübut olundu;
- Bakıda üçrəngli Azərbaycan bayrağının ən hündür yerdə dalğalandırılması ilə ölkəmizin sahibi azərbaycanlıların olduğu bir daha dünyaya nümayiş etdirildi;
- Dünya bir daha gördü ki, bundan sonra heç bir qüvvə həmin bayrağa toxuna, ləkə yaxa bilməyəcək.
Dövlət Bayrağı Meydanının açılış mərasimində çıxış edən Prezident İlham Əliyev söyləyib ki, bizim bayrağımız qürur mənbəyimizdir. Bizim bayrağımız canımızdır, ürəyimizdir. Həqiqətən, bizim üçrəngli bayrağımız mənliyimizin, öz dövlətimizə hakimliyimizin atributudur.
Vətənin müdafiəsi zamanı həlak olmuş şəhidlərimiz torpağa tapşırılarkən, onlar uğrunda canlarını fəda etdikləri bayrağa bükülürlər. Həmin şərəfə hər kəsin sahib olmayacağını bildiyimiz üçün ən azından həyatdaikən bayrağımızın yüksək zirvələrə daşınması naminə işlər görməliyik. Status və vəzifəmizdən asılı olmayaraq, bayrağımızı şərəfimiz və qürurumuz bilib, onun daim yüksəklərdə dalğalanması üçün işlər görməliyik.
Ramil VƏLİBƏYOV

Paylaş:

Baxılıb: 1389 dəfə