Ankara masası yeni fürsətdir

Bakı:

14 °C

94 %

10 m/s

Əlaqə

AZ RU EN

Ana səhifə / Siyasət / Ankara masası yeni fürsətdir

Ankara masası yeni fürsətdir

02.02.2022 [10:39]

Türkiyə Prezidentinin Ukraynaya səfəri regiondakı gərginliyin azaldılması baxımından önəmlidir

Nardar BAYRAMLI

Türkiyə Prezidenti Rəcəb Tayyib Ərdoğan fevralın 3-də Ukraynaya səfər edəcək. Qardaş ölkə mətbuatı səfər zamanı Ankara ilə Kiyev arasında diplomatik münasibətlərin qurulmasının 30-cu ildönümünün qeyd olunacağı barədə məlumat yaysa da, əsas müzakirə mövzusunun Ukrayna ətrafında yaranan gərginliklə bağlı olacağı şübhəsizdir. Türkiyə Prezidenti Kiyevə səfərində ukraynalı həmkarı ilə regiondakı mövcud vəziyyəti geniş müzakirə edəcək.

Mövzu ilə bağlı qəzetimizə açıqlama verən siyasi şərhçi Asif Nərimanlı bildirib ki, Türkiyə-Ukrayna əlaqələrinin tarixi kökləri var. Onun sözlərinə görə, hər iki ölkə arasında normal münasibətlər mövcuddur və Rəcəb Tayyib Ərdoğanın Kiyevə səfəri qarşılıqlı əlaqələrin gücləndirilməsi baxımından önəmlidir: “Amma şübhəsiz ki, səfər zamanı Ukrayna ətrafında yaşanan gərginlik diqqət mərkəzində olacaq. Bilirsiniz ki, Türkiyə Prezidenti hər iki tərəfə öz vasitəçiliyini təklif edib. Bunun üçün Ərdoğan Rusiya Prezidenti Vladimir Putini ölkəsinə dəvət edib. Öz növbəsində, Putin Ərdoğanın Ukrayna məsələsini müzakirə etmək üçün Türkiyəyə dəvətini qəbul etdi. Səfərin vaxtı bəlli deyil, qarşıdurmanın kəskinləşməsi fonunda bunun qısa zamanda baş tutması gözləniləndir. Hərçənd ki, Kremlin açıqlaması diqqəti fərqli məqama da çəkir. Kremlin sözçüsü Peskov bildirir ki, epidemioloji vəziyyət və qrafiklər imkan verən kimi Putin Türkiyəyə gedəcək. Bu o deməkdir ki, Moskva Ukrayna məsələsində Türkiyənin təklif etdiyi masa ilə bağlı yekun qərarı verməyib və səfərin vaxtı proseslərin inkişafına uyğun müəyyən ediləcək. Yəni Qərblə qarşıdurma daha da kəskinləşəcəksə, Putinin Türkiyəyə səfəri tezləşə bilər və Moskva bununla Ankaranın ona əks cəbhədə yer almamasına çalışacaq. Eyni zamanda, Ukrayna Prezidenti Zelenski də toqquşmanın tərəfdarı olmadığını, Putinlə təmas qurmaq istədiyini açıqlayıb. Ankara masası Kiyev üçün yeni fürsətdir, lakin burada ABŞ və Avropanın yanaşması da həlledici rol oynaya bilər. ABŞ Avropanın Rusiyaya qarşı cəbhədə birləşməsini, Fransa və Almaniya isə Vaşinqtonun marağında olmayan “Normand formatı”nın bərpasını istəyir. Qərb yarımkürəsi Rusiyaya qarşı məsələdə fikir ayrılığı yaşasa da, Türkiyənin qurmaq istədiyi masa məsələsində birləşə bilər. Yəni Avropa “Normand formatı”na alternativə, ABŞ Rusiya və Ukraynanın anlaşmasına qarşıdır. Putin Ankaraya bütün hallarda səfər edəcək. Hərçənd ki, Moskvanın hazırda əsas prioriteti “Normand formatı”nın aktivləşməsi, bununla NATO-da Avropa-ABŞ çatının dərinləşməsidir və bu istiqamətdə işləyəcək”.

A.Nərimanlı qeyd edib ki, proseslərin inkişafından asılı olmayaraq, Kremlin dəvəti qəbul etməsi Ankaranın alternativ masa təklifində müəyyən irəliləyiş hesab oluna bilər: “Ukraynaya səfər edən Rəcəb Tayyib Ərdoğanın vasitəçiliyi ilə münaqişənin həllində irəliləyişə nail olmaq çətin olsa da, yeni eskalasiyanın qarşısını almaq mümkündür. Bununla da Türkiyənin anti-Rusiya cəbhəsində yer almaq riski azalacaq. Ankara Qara dəniz bölgəsində geniş toqquşmaya imkan verməməklə Şərqi Aralıq dənizindəki ssenarinin təkrarlanmasının qarşısını ala bilər. Həmçinin alternativ masada istənilən irəliləyiş masanın qurulmasını həyata keçirən Ankara və Bakının regional oyunçu olmaq gücünü artıracaq. Türkiyə masası Ukrayna üçün ən azı toqquşmanın qarşısını almaq baxımından ən unikal variant hesab edilə bilər. Bu baxımdan, Rəcəb Tayyib Ərdoğanın Ukraynaya səfəri və səfər zamanı aparılacaq müzakirələr böyük əhəmiyyət kəsr edir”.

Paylaş:

Baxılıb: 1307 dəfə