Türk Dövlətləri Təşkilatı nüfuzlu beynəlxalq platformaya çevrilir

AZ RU EN

Ana səhifə / Siyasət / Türk Dövlətləri Təşkilatı nüfuzlu beynəlxalq platformaya çevrilir

Türk Dövlətləri Təşkilatı nüfuzlu beynəlxalq platformaya çevrilir

08.12.2021 [10:19]

Nardar BAYRAMLI

Son illər türk dövlətləri arasında əlaqələr əhəmiyyətli dərəcədə güclənməkdədir. Qarşılıqlı əlaqələrin genişlənməsi ümumilikdə türk dövlətlərinin birliyinin daha da güclənməsinə xidmət edir. Ötən ay Türkiyədə keçirilən Türkdilli Ölkələrin Əməkdaşlıq Şurasının VIII Zirvə görüşündə təşkilatın adının dəyişdirilərək Türk Dövlətləri Təşkilatı (TDT) adlandırılması, qəbul edilən önəmli qərarlar, nəzərdə tutulan perspektiv layihələr türk birliyinin uğurlu gələcəyindən xəbər verir.

Türk Dövlətləri Təşkilatı beynəlxalq müstəvidə cərəyan edən proseslərə çevik reaksiya verir

Artıq Türk Dövlətləri Təşkilatı regional güc mərkəzi kimi özünü təsdiq etməkdədir. Təşkilata üzv ölkələr öz aralarında münasibətləri möhkəmləndirməklə yanaşı, beynəlxalq müstəvidə də cərəyan edən proseslərə çevik reaksiya verir, eləcə də humanitar təşəbbüslərlə çıxış edir. Belə ki, Türk Dövlətləri Təşkilatı adından yeni növ koronavirus (COVID-19) infeksiyasına qarşı mübarizə məqsədilə Afrikanın Burkina-Faso və Toqo ölkələrinə vaksin göndərilməsi də buna sübutdur. Yardım üçün Azərbaycan, Türkiyə, Özbəkistan və Macarıstan tərəfindən ümumilikdə 611 min 200 doza vaksin toplanıb. Azərbaycan bu məqsədlə yardım karvanına 100 min doza “Sinovac” peyvəndi ayırıb. TDT adından təyyarə ilə göndərilən humanitar tibbi yardım mənzil başına çatıb.

Azərbaycanın təşəbbüsünə daha bir dəstək

Türk Dövlətləri Təşkilatının bu humanitar təşəbbüsünün əhəmiyyəti barədə qəzetimizə açıqlama verən politoloq Ramiz Alıyev bildirib ki, Azərbaycan da daxil olmaqla türk dövlətləri hər zaman koronavirus pandemiyasına qarşı peyvənd millətçiliyinə qarşı olublar və mövqelərini açıq, qəti şəkildə ifadə ediblər. Onun sözlərinə görə, ötən ilin aprel ayında Azərbaycan Prezidenti İlham Əliyevin təşəbbüsü ilə türkdilli ölkələrin koronavirus pandemiyasına qarşı mübarizəyə həsr olunmuş onlayn formada zirvə görüşü keçirilmişdi: “Həmin zirvə görüşündən sonra da türk dövlətləri dəfələrlə Azərbaycanın pandemiya ilə mübarizə istiqamətində təşəbbüslərini yüksək qiymətləndiriblər. Türk Dövlətləri Təşkilatı Afrika ölkələrinə vaksin göndərməklə bilavasitə Azərbaycanın təşəbbüslərinə real dəstək ifadə edir. Belə ki, Burkina-Fasoya 400 min “Sinovac” peyvəndi və Toqoya 211 min 200 doza “Sinofarm” peyvəndi çatdırılıb. Bütün bunlar, Azərbaycanın da daxil olduğu Türk Dövlətləri Təşkilatının humanist addımının ifadəsidir. Nəzərə alsaq ki, Afrika ölkələri yoxsuldur və onların peyvəndə əlçatanlığı aşağıdır, belə olan təqdirdə, türk dövlətlərinin insanlığa xidmət edən bu addımının əvəzi yoxdur”.

Azərbaycan və Türkiyənin rolu kifayət qədər böyükdür

Politoloqun fikrincə, Türk Dövlətləri Təşkilatının bu addımı humanitar xarakterli olsa da, siyasi önəmi də böyükdür. Çünki TDT artıq özünü dünyada vacib beynəlxalq platforma kimi təqdim edir. R.Aliyev hesab edir ki, türk dövlətlərinin birliyinin daha da güclənməsi ilə bağlı planlar böyükdür: “TDT-nin həyata keçirdiyi humanitar təşəbbüs təşkilatın siyasi çəkisini də artırır. Düşünürəm ki, gələcəkdə TDT nüfuzlu beynəlxalq siyasi təşkilat kimi dünyada öz mövqelərini möhkəmləndirəcək. Bunun üçün türk dövlətlərinin sosial, iqtisadi, mədəni və mənəvi birliyinin güclənməsi şərtdir. Artıq bu istiqamətdə əməli addımlar atılır. B? xüsusilə son bir neçə il ərzində özünü göstərir. Təşkilatın sıraları genişlənir, siyasi, iqtisadi və mədəni əlaqələr davamlı olaraq genişlənir. Burada Azərbaycan və Türkiyənin rolu kifayət qədər böyükdür. VIII Zirvə görüşündə Zəngəzur dəhlizinin önəmi xüsusilə diqqət mərkəzində oldu. Zəngəzur dəhlizinin açılması Türk dünyasını coğrafi cəhətdən birləşdirəcək ki, bu amil türk dövlətləri arasında bütün sahələr üzrə əlaqələri gücləndirəcək. Bununla da TDT regional birlikdən qlobal güc mərkəzinə çevrilə bilər. Hesab edirəm ki, bu, qaçılmaz prosesdir. Belə olduqda isə TDT gələcəkdə daha çox beynəlxalq səviyyəli humanitar və digər xarakterli təşəbbüslərlə çıxış edəcək. Bütün bunlar isə Türk Dünyasının qlobal səviyyədə yerini möhkəmləndirəcək və rolunu artıracaq”.

Paylaş:

Baxılıb: 833 dəfə