Novruz Məmmədov: Ermənistanın tutduğu qeyri-konstrukiv mövqe regionda sülhə əngəl törədir

Bakı:

17 °C

94 %

9 m/s

Əlaqə

AZ RU EN

Ana səhifə / Siyasət / Novruz Məmmədov: Ermənistanın tutduğu qeyri-konstrukiv mövqe regionda sülhə əngəl törədir

Novruz Məmmədov: Ermənistanın tutduğu qeyri-konstrukiv mövqe regionda sülhə əngəl törədir

15.07.2010 [08:31]

“Cənab Prezident dəfələrlə qeyd edib ki, Ermənistan-Azərbaycan, Dağlıq Qarabağ münaqişəsi Azərbaycanın ən ağrılı problemidir”. Bunu Prezident Administrasiyasının beynəlxalq əlaqələr şöbəsinin müdiri Novruz Məmmədov SİA-ya müsahibəsində deyib. Onun sözlərinə görə, Azərbaycan Prezidenti İlham Əliyev Ermənistan-Azərbaycan, Dağlıq Qarabağ münaqişəsinin həlli ilə bağlı gedən proseslər barədə mütəmadi olaraq Azərbaycan xalqına məlumat verir: “Cənab Prezident həmişə qeyd edir ki, Dağlıq Qarabağ münaqişəsi Azərbaycanın ərazi bütövlüyü çərçivəsində həll olunmalıdır və münaqişənin başqa formada həlli yolu yoxdur. çünki Azərbaycanın ərazi bütövlüyü aparılan danışıqlarda müzakirə predmeti deyil. Bunun başqa bir yolu olmadığına görə ATƏT-in Minsk qrupunda həmsədər ölkələr də münaqişənin həllinə dair fəaliyyətlərini məhz bu istiqamətdə qururlar. Belə olan halda isə, Ermənistan qoşunları işğal olunmuş ərazilərdən çıxarılmalı, bütün məcburi köçkünlər və qaçqınlar öz yurd-yuvalarına qayıtmalıdır. Azərbaycan tərəfinin mövqeyi birmənalı və dəyişməzdir. ölkə başçısı dəfələrlə vurğulayıb ki, Dağlıq Qarabağın statusu Azərbaycanın ərazi bütövlüyü çərçivəsində müəyyənləşməlidir. Bu, münaqişə tərəfləri arasında aparılan danışıqların əsas müzakirə mövzusudur. Ermənistan tərəfindən isə bu ölkənin prezidenti, yaxud da xarici işlər naziri müxtəlif cəfəng bəyanatlar səsləndirirlər. Ermənistanda siyasi hakimiyyətdə olan şəxslər bu yolla müvəqqəti də olsa, rejimlərini möhkəmləndirməyə çalışırlar”.
ötən müddət ərzində Azərbaycanın mövqeyinin daha da gücləndiyini deyən N.Məmmədov “bu yaxınlarda separatçı rejim Azərbaycanın işğal altında olan Dağlıq Qarabağ ərazisində “seçkilər” keçirdi. ABŞ, Rusiya, Fransa, eləcə də, bütün dünya dövlətləri Azərbaycanın ərazi bütövlüyünü dəstəklədilər. Bu, Ermənistana güclü siyasi-diplomatik zərbədir” sözlərini də əlavə edib.
N.Məmmədov daha sonra deyib: “Ermənistan rəhbərliyi bilir ki, Dağlıq Qarabağa heç vaxt müstəqillik verilməyəcək. Buna baxmayaraq, rəsmi İrəvan Dağlıq Qarabağ münaqişəsindən siyasi vasitə kimi istifadə edir, Ermənistanda mövcud olan indiki rejim bu yolla öz hakimiyyətini qorumaq istəyir. Bu yaxınlarda ABŞ-ın Milli Təhlükəsizlik Strategiyası adlı sənədi qəbul olundu. Sənəddə münaqişənin həlli ilə bağlı məqamlar qeyd olunub və bundan əlavə, ABŞ prezidenti Barak Obamanın Azərbaycan Prezidenti İlham Əliyevə yazdığı məktubda göstərilir ki, Cənubi Qafqazda sabitlik, təhlükəsizlik və münaqişənin həlli ABŞ-ın xarici siyasətində prioritet təşkil edir. ABŞ-ın dövlət katibi Hillari Klinton bu məsələ ilə bağlı danışarkən bir neçə dəfə qeyd etdi ki, münaqişə Helsinki prinsipləri çərçivəsində həll edilməlidir. Helsinki prinsiplərində qeyd olunur ki, hər bir xalq öz müqəddaratını müəyyənləşdirməlidir. Biz Avropanı, Amerikanı bir model kimi götürürüksə, bu ölkələrdə müxtəlif azlıqlar bir-biri ilə yanaşı yaşayır və öz müqəddəratlarını da həll edibdir. Cənab Prezident qeyd edir ki, biz istəyirik ki, bütün bu danışıqlar sivil yolla həll edilsin. Son proseslərdə Azərbaycanın mövqeyi həddindən artıq güclüdür və bunun güclü olmasının bir səbəbi də odur ki, dünya ölkələri Azərbaycanın ədalətli, düzgün mövqeyini dəstəkləyirlər”.
Novruz Məmmədovun sözlərinə görə, ATƏT-in Minsk qrupunun həmsədr ölkələri - ABŞ, Rusiya və Fransa beynəlxalq hüququn təmin olunması istiqamətində öz səylərini ortaya qoyaraq Ermənistanı inandırmalıdırlar ki, bu dövlətin tutduğu qeyri-konstrukiv mövqe regionda sülhə əngəl törədir: “Ermənistan rəhbərliyi anlamalıdır ki, Dağlıq Qarabağ münaqişəsinin başqa həlli yolu yoxdur. Azərbaycan öz tarixi torpaqları olan Dağlıq Qarabağı güzəştə getməyəcək, Azərbaycan torpaqları tərəflər arasında müzakirə predmetinə çevirməyəcək”.

Paylaş:

Baxılıb: 1084 dəfə