Bakıda İslam İnkişaf Bankının İslam maliyyəçiliyinə dair 5-ci Qlobal Forumu olub

Bakı:

19 °C

94 %

3 m/s

Əlaqə

AZ RU EN

Ana səhifə / Siyasət / Bakıda İslam İnkişaf Bankının İslam maliyyəçiliyinə dair 5-ci Qlobal Forumu olub

Bakıda İslam İnkişaf Bankının İslam maliyyəçiliyinə dair 5-ci Qlobal Forumu olub

22.06.2010 [08:57]

Dünən Bakıda “Gülüstan” sarayında İslam İnkişaf Bankının (İİB) İslam maliyyəçiliyinə dair “Qlobal sabitlik və inteqrasiyaya doğru” mövzusuna həsr olunmuş 5-ci Qlobal Forumu öz işinə başlayıb. Forum İslam Tədqiqat və Tədris İnstitutunun (İTTİ) təşəbbüsü ilə, İİB-in əlaqədar şöbələri və digər təşkilatlarla sıx əlaqədə keçirilir. Məqsəd İİB-in fəaliyyət dairəsinə daxil olan ölkələrdə strateji siyasət dialoqunun və İslam Maliyyə Xidmətləri (İMX) sənayesinin müxtəlif seqmentlərinin inkişafı, qarşıya çıxan problemlərin birgə müəyyən edilməsi və İMX-nin inkişafının rəqabətədavamlı və sabit inkişafı naminə çətin problemlərin sistemli həlli yolunda bilik mübadiləsi, qarşılıqlı əlaqələrin gücləndirilməsinin təşviqi ilə əlaqədar institusional təcrübə mübadiləsini təmin etməkdir. Forum İTTİ tərəfindən 2006-cı ildən bəri keçirilən silsilə forumların davamıdır.
Forumun birinci sessiyasının açılış mərasimində “Qurani-Kərim”dən surə oxunduqdan sonra İTTİ-nin Baş direktoru Bambang P.Brodjonegoro, CIBAFI sədri Şeyx Salah Kamel, Azərbaycan Respublikası Mərkəzi Bankı İdarə Heyətinin sədri Elman Rüstəmov çıxış ediblər. Qeyd edilib ki, təkrarlanan maliyyə və iqtisadi böhranlar, o cümlədən sonuncu böhran da daxil olmaqla, nəinki təkcə maliyyə institutlarına təsir göstərib, onlar eyni zamanda əhalinin yoxsul təbəqəsinin həyat səviyyəsinin daha da ağırlaşmasına səbəb olub. İndiki maliyyə böhranında İslam maliyyə institutları özlərinin nisbətən daha dayanıqlı olduqlarını nümayiş etdiriblər. Lakin sonralar onlar da ümumi iqtisadi tənəzzülün və daşınmaz əmlak sektorunda durğunluğun təsirini hiss ediblər. Bütün bunları nəzərə alaraq İİB-in 5-ci Qlobal Forumu, ilk növbədə, islam maliyyə sektorunun tələblərinin və səviyyəsinin sabitliyinin qiymətləndirilməsini ön plana çəkəcək. Azərbaycan Respublikası Mərkəzi Bankı İdarə Heyətinin sədri Elman Rüstəmov tədbirin aktuallığını vurğuladıqdan sonra deyib ki, son üç il ərzidə dünya iqtisadiyyatı özünün ağır dövrünü yaşayır. Artıq böhranın ilk dərsləri, səbəb və nəticələrin qiymətləndirilməsi deməyə əsas verir ki, böhranaqədərki dövrdə liberal iqtisadi siyasət və əhəmiyyətli maliyyə innovasiyalarının adekvat tənzimləmə potensialı ilə müşayiət olunmaması qlobal böhranın əsas səbəblərindən biri olub. Hələ ötən il mərkəzi banklar və hökumətlər iqtisadiyyata irihəcmli dəstək verərkən resessiyanın tez bir zamanda bitəcəyini vəd edirdilər. Buna baxmayaraq, dünya iqtisadiyyatının bərpası ləng və qeyri-bərarbər gedir.
Elman Rüstəmov vurğulayıb ki, Azərbaycan böhranı kifayət qədər hazırlıqlı qarşılayıb. 2003-2008-ci illərdə Prezident İlham Əliyevin uğurla həyata keçirdiyi iqtisadi doktrina ölkənin fundamental inkişafını təmin edib. Bu dövrdə ölkənin ümumi daxili məhsulu (üDM) 3 dəfəyə yaxın artıb, adambaşına düşən milli gəlir həmin vaxtın qiymətləri ilə 9 min ABŞ dollarını ötüb, Azərbaycan inamla ortagəlirli ölkələr qrupuna daxil olub. ölkənin strateji valyuta ehtiyatları 13 dəfə artaraq üDM-in yarısını ötüb keçib. Bu ehtiyatlar dövlətin xarici borclarını 6 dəfə üstələyir. Sürətli iqtisadi inkişaf fonunda bank-maliyyə sistemi də yüksək dinamiklik nümayiş etdirib. Azərbaycan bank sektoru, onun həcmi, potensialı 10 dəfəyə yaxın artıb. Belə bir iqtisadi və maliyyə inkişafı makroiqtisadi potensial yaratmaqla, Azərbaycanın qlobal böhrana yüksək dözümlülüyünü təmin edib.
Natiq qlobal böhranın Azərbaycan iqtisadiyyatına təsirindən də söz açıb.
İİB Qrupunun prezidenti Əhməd Məhəmməd Əli salamlama nitqində foruma uğurlar arzulayıb.
Sonra birinci sessiyanın əsas məruzəsi - doktor Məhəmməd Əli Elqarinin “İslam maliyyə sisteminin etik hüdudları - maliyyə böhranının dərsləri” məruzəsi dinlənilib.
Forum öz işini daha dörd sessiyada davam etdirib.

Paylaş:

Baxılıb: 1406 dəfə