Əli Əhmədov: 4 iyun hadisələrinin səbəbi o zamankı hakimiyyətin yeritdiyi siyasət və bu siyasətin bütövlükdə xalqın maraqlarına uyğun olmaması idi

Bakı:

26 °C

59 %

4 m/s

AZ RU EN

Ana səhifə / Siyasət / Əli Əhmədov: 4 iyun hadisələrinin səbəbi o zamankı hakimiyyətin yeritdiyi siyasət və bu siyasətin bütövlükdə xalqın maraqlarına uyğun olmaması idi

Əli Əhmədov: 4 iyun hadisələrinin səbəbi o zamankı hakimiyyətin yeritdiyi siyasət və bu siyasətin bütövlükdə xalqın maraqlarına uyğun olmaması idi

07.06.2010 [10:02]

“Azərbaycan özünün milli və dövlət müstəqilliyini əldə etdikdən sonra həm ölkə daxilində cərəyan edən proseslər, həm də xaricdən olan təzyiqlər ölkənin dövlət müstəqilliyinə çox ciddi təhlükə yaratmışdı. O zamankı hakimiyyət bu təhlükələrin sovuşdurulması istiqamətində lazımi tədbirləri görmək iqtidarında deyildi”. Bu sözləri YAP Sədrinin müavini-İcra katibi Əli Əhmədov 1993-cu ilin 4 iyun hadisələrinə münasibət bildirərkən deyib.
Əli Əhmədov bildirib ki, həmin dövrdə ölkə daxilində cərəyan edən proseslər, ölkədəki gərginlik və bu gərginlik nəticəsində yaranmış böhran total xarakter almışdı. İqtisadiyyatdakı tənəzzül, sosial problemlərin həddindən artıq dərinləşməsi və kəskinləşməsi, ictimai-siyasi sabitliyin pozulması ölkənin həm müstəqilliyinə ciddi təhlükə yaradırdı, həm də bütövlükdə hər bir vətəndaşın təhlükəsizliyinin təmin edilməsi ilə əlaqədar problemləri ortaya çıxarırdı. İnsanlar öz gələcəyindən narahat olurdular. Heç kim gələcəyinin necə olacağına təminat verə bilmirdi. Onun sözlərinə görə, bütün bunların hamısı ölkə daxilindəki böhranlı vəziyyətin ayrı-ayrı səciyyəvi cəhətləri idi.
“Təbii ki, bütün bunlara görə də, Azərbaycan vətəndaşları həm ölkəmizin müstəqilliyinin başının üstünü almış təhlükəni sovuşdurmaqdan ötrü, həm də digər təhdidlərin qarşısının alınması üçün real addımların atılmasını gözləyirdilər. Xalq bu vəziyyətə görə o zamankı hakimiyyətdən kəskin narazı idi. Bu narazılığı aradan qaldıra bilməyənlər 4 iyun olaylarını yaratmış oldular. Qiyam adlandırıla biləcək 4 iyun hadisələri əslində mövcud olan narazılıqların spesifik şəkildə ortaya çıxması demək idi. Bu narazılıq da mövcud hakimiyyətdə, hakmiyyətin apardığı siyasətdə, bu siyasətin milli maraqlara uyğun gəlməməsindən ibarət idi” deyə, YAP Sədrinin müavini vurğulayıb. Əli Əhmədov qeyd edib ki, bu hadisələrin səbəbi o zamankı hakimiyyətin yeritdiyi siyasət və bu siyasətin bütövlükdə xalqın maraqlarına uyğun olmaması idi.
Onun sözlərinə görə, 4 iyun hadisələri o zamankı hakimiyyətin dəyişdirilməsi üçün çox ciddi təkan verdi. çünki bu hadisələr ölkə daxilində olan ziddiyyətlərin və total böhranın kulminasiya nöqtəsinə çatmasından xəbər verirdi. “Azərbaycan xalqı yaranmış vəziyyətdən xilas yolunu Ulu öndər Heydər Əliyevə müraciət etməkdə görürdü. Baxmayaraq ki, bundan əvvəl də Heydər Əliyevə cəmiyyətin müxtəlif təbəqələrinin nümayəndələri müraciət etmişdilər, Onun partiyası yaranmışdı. Lakin 4 iyun hadisələrindən sonra hakmiyyətin dəyişdirilməsi çox obyektiv zərurətə çevrildi. çünki ölkədə hadisələrin gedişi vətəndaş qarşıdurması həddinə gəlib çıxmışdı. Bu qarşıdurmanın aradan qaldırılması üçün bütün xalqın qəbul edəcəyi bir şəxsiyyətə ehtiyacı var idi ki, bu şəxsiyyət də yalnız Heydər Əliyev idi. Ulu öndər Heydər Əliyev hakimiyyətə qayıtdıqdan sonra ölkədə əmin-amanlıq, sabitlik yarandı, mövcud olan ziddiyyətlərin aradan qaldırılması istinamətində ciddi və əhəmiyyətli tədbirlər görüldü. Beləliklə də, 4 iyunun yaratdığı nəticələr aradan götürüldü”, deyə YAP Sədrinin müavini vurğulayıb.

Paylaş:

Baxılıb: 1145 dəfə