Azərbaycanda insan hüquq və azadlıqlarının təmini dövlətin prioritet vəzifəsidir

Bakı:

26 °C

61 %

6 m/s

Əlaqə

AZ RU EN

Ana səhifə / Siyasət / Azərbaycanda insan hüquq və azadlıqlarının təmini dövlətin prioritet vəzifəsidir

Azərbaycanda insan hüquq və azadlıqlarının təmini dövlətin prioritet vəzifəsidir

15.05.2010 [08:31]

Dünən Ombudsman Aparatında Azərbaycan Respublikasında İnsan Hüquqlarının Müdafiəsi üzrə Milli Fəaliyyət Planının (MFP) 2009-cu ildə tətbiq edilməsi vəziyyətinə həsr olunmuş konfrans keçirilib. Sayca üçüncü olan konfransa Azərbaycan Respublikasının Prezidenti Administrasiyasının məsul əməkdaşları, Milli Məclisin deputatları, MFP-nin həyata keçirilməsi üçün icraçı olan dövlət orqanlarının, qeyri-hökumət təşkilatlarının, habelə beynəlxalq qurumların nümayəndələri, kütləvi informasiya vasitələrinin təmsilçiləri qatılıblar. MFP-nin həyata keçirilməsi üzrə İşçi Qrupunun rəhbəri E.Süleymanova ölkəmizdə insan hüquqlarının müdafiəsi və təmini istiqamətində görülən mühüm işlər, milli qanunvericiliyin beynəlxalq normalara uyğunlaşdırılması və insan hüquqlarının daha səmərəli həyata keçirilməsinə yönəlmiş qanunların qəbul edilməsi, mükəmməl normativ-hüquqi bazanın yaradılması, Ombudsman təsisatının da bu istiqamətdə fəaliyyəti barədə məlumat verib. Ombudsman ölkə Prezidentinin 28 dekabr 2006-cı il tarixli Sərəncamı ilə qəbul edilmiş MFP-nin insan hüquq və azadlıqlarının müdafiəsinin səmərəli və daha etibarlı təmini baxımından əhəmiyyət kəsb etdiyini bildirib, təsdiq edilməsindən ötən üç il ərzində bu sahədə xeyli iş görüldüyünü, müntəzəm olaraq müzakirələr aparıldığını diqqətə çatdırıb. İnsan hüquqlarının, o cümlədən vətəndaş və siyasi, iqtisadi və sosial, mədəni hüquqların müdafiəsi işinin dövlət orqanları və qeyri-hökumət təşkilatları ilə səmərəli əməkdaşlıq şəraitində qurulması, həmçinin, milli qanunvericiliyin daha da təkmilləşdirilməsi, vətəndaş cəmiyyətinin formalaşdırılması, milli prioritet təşkil edən məsələlərin həlli naminə cəmiyyətin bütün qüvvələrinin səfərbər edilərək bir araya gəlməsində MFP-nin rolu vurğulanıb. Avropa Şurası İnsan Hüquqları üzrə Komissarının bu Milli Fəaliyyət Planını yüksək qiymətləndirdiyi və bütün Avropa ölkələrinə tövsiyə etdiyi nəzərə çatdırılıb.
Azərbaycan Respublikası Prezidenti Administrasiyasının Hüquq-mühafizə orqanları ilə iş şöbəsinin müdiri Fuad Ələsgərov Milli Fəaliyyət Planının həyata keçirilməsi ilə əlaqədar ölkəmizdə bütün istiqamətlər üzrə əhəmiyyətli tədbirlərin görüldüyünü vurğulayıb.
Diqqətə çatdırıb ki, nüfuzlu beynəlxalq təşkilatlar qarşısında götürdüyü öhdəlikləri tam şəkildə yerinə yetirən Azərbaycanda insan hüquq və azadlıqlarının təmini, demokratik hüquqi dövlət quruculuğu ölkəmizin prioritet seçimlərindən biridir. Konstitusiyaya beynəlxalq normalara uyğun dəyişikliklər edilib, insanların siyasi, sosial-iqtisadi və mülki, həmçinin mədəni hüquqlarının müdafiəsi istiqamətində qanunvericilik bazası müasirləşdirilib. Ermənistanın təcavüzünə baxmayaraq, ölkədə demokratik islahatlar yüksələn xətlə inkişaf edib, işğal altında qalmış torpaqlarımızın azad edilməsi istiqamətində zəruri tədbirlərin görülməsi prosesi davam edib.
ATƏT-in Bakı ofisinin rəhbəri Ali Bilgə Cankorel Azərbaycanda insan hüquqlarının müdafiəsi yönündə görülmüş işləri müsbət qiymətləndirib, bu sahədə Avropa Şurasının tövsiyə və məsləhətlərinə əməl olunduğunu önə çəkib. Konfransda Milli Məclisin deputatı Rəfael Cəbrayılovun “Qanunvericiliyin insan hüquq və azadlıqları baxımından təkmilləşdirilməsi dinamikası”, ədliyyə nazirinin müavini Toğrul Musayevin “Əhalinin müxtəlif qruplarının hüquqlarının müdafiəsinin təmini sahəsində həyata keçirilən islahatlar”, Azərbaycan Respublikası Baş Prokurorunun müavini Namiq Əsgərovun “Dövlət orqanlarının fəaliyyətinin insan hüquqlarının təmini baxımından təkmilləşdirilməsi” mövzularında məruzələri dinlənilib.

Paylaş:

Baxılıb: 1205 dəfə