"Bəzi təşkilatlar yardım kampaniyası aparır, buna heç bir ehtiyac yoxdur"

Bakı:

22 °C

60 %

4 m/s

Əlaqə

AZ RU EN

Ana səhifə / Siyasət / "Bəzi təşkilatlar yardım kampaniyası aparır, buna heç bir ehtiyac yoxdur"

"Bəzi təşkilatlar yardım kampaniyası aparır, buna heç bir ehtiyac yoxdur"

13.05.2010 [10:45]

“Mayın 7-dən başlayaraq uçan bəndin bərpası ilə məşğuluq. Təxminən 300 metrədək yol və bənd bərpa olunub. Köçürülən 9 kəndə su axını azalmağa başlayıb. Yəqin ki orda bəzi bərkitmə işləri tam qurtarandan sonra su dayanacaq”. APA-nın Mil-Muğan bürosunun təbii fəlakət zonasında olan müxbirinin xəbərinə görə, bunu jurnalistlərə açıqlamasında fövqəladə hallar naziri Kəmaləddin Heydərov bildirib.
Nazir deyib ki, Mürsəlli kəndi istiqamətində bir neçə gün ardıcıl iş aparılıb: “Polisin və FHN-in şəxsi heyəti, texnikanın gücü ilə orada bərkitmə işləri aparılır. Təəssüf ki, həm Kürün üstündə olan bəndin, həm də digər bəndlərin torpağı çox yumşalmışdı. Bunun nəticəsində də orda bir neçə yerdən torpaq boşaldı, su basma oldu, 9 kəndi köçürməli olduq. İndi orda da bərpa işləri başlanıb. Texnikalar da ora göndərilib. Hesab edirik ki, iki gün ərzində oranı da tam bərpa edəcəyik”.
K.Heydərov ətraf rayonlar üçün elə bir təhlükə olmadığını deyib: “Yenə də deltadan başlayaraq, Kür boyunca vəziyyəti təhlil edirik. Rayon icra hakimiyyətlərinin başçıları, FHN ekspertləri, “Meliorasiya və Su Təsərrüfatı” ASC-nin mütəxəssisləri ilə əraziyə baxmışıq. Ətraf rayonlara elə bir ciddi təhlükə yoxdur”.
Nazir deyib ki, hazırda Xəzər Dəniz Gəmiçiliyinin iki gəmisi Kürün deltasında işləyir: “İlkin müşahidələr göstərir ki, lilin dibdən qaldırılıb suya buraxılması nəticəsində çayın dənizə tökülmə sürəti bir az artıb. Qabaqlayıcı tədbirlər görülür. Amma bütünlükdə böyük təhlükə gözləmirik”.
K.Heydərov bildirib ki, yaxın günlərdə köçürülən 9 kəndin 5-nin sakinləri geri qayıdacaqlar: “Bu kəndlərdə subasma olmayıb. Sadəcə, biz təhlükənin ola biləcəyini nəzərə alıb onları köçürmüşük. Mürsəlli kəndi ətrafındakı bəndin bərkidilməsindən sonra da 60 güclü nasosla suyun çəkilməsinə başlanılacaq. Əgər güclü yağıntılar olmasa, qısa müddətdə bu insanlar öz kəndlərinə qayıda biləcəklər”.
Nazir bəzi təşkilatların və fərdlərin təbii fəlakətdən ziyan çəkənlərə yardım kampaniyasına başlamalarına da münasibət bildirib: “Azərbaycan Prezidenti özü bölgədə oldu, bura köçürülmüş adamlarla görüşdü, bizə tapşırıqlar verdi. Prezident bəyan etdi ki, hər bir vətəndaşına dəyən ziyan dövlət tərəfindən ödəniləcək. İndi mətbuatda baxırıq ki, bəzi təşkilatlar yardım kampaniyaları aparırlar, buna heç bir ehtiyac yoxdur. Azərbaycan Prezidentinin tapşırığı ilə artıq FHN-ə vəsait ayrılıb. Mal, material, ərzaq, yataq dəstləri, əhalini yeməklə təmin etmək, tibbi xidmət, iaşə xidmətləri göstərilir. Biz həmin təşkilatlara da, vətəndaşlara da təşəkkür edirik. Amma yardıma ehtiyac yoxdur. Bu missiyanı dövlət özü yerinə yetirəcək”.

Paylaş:

Baxılıb: 1361 dəfə