İnşa yazı müsabiqəsinin qalibləri mükafatlandırıldı

Bakı:

30 °C

50 %

2 m/s

Əlaqə

AZ RU EN

Ana səhifə / Siyasət / İnşa yazı müsabiqəsinin qalibləri mükafatlandırıldı

İnşa yazı müsabiqəsinin qalibləri mükafatlandırıldı

07.05.2010 [10:19]

600 mindən çox şagirdin qatıldığı bilik yarışının 21 qalibi oldu
Dünən ümummilli liderimiz Heydər Əliyevin anadan olmasının 87-ci ildönümü münasibəti ilə məktəblilər arasında təşkil olunan inşa yazı müsabiqəsi qaliblərinin mükafatlandırılması mərasimi keçirilib. Yeni Azərbaycan Partiyası (YAP), Heydər Əliyev Fondu, Təhsil Nazirliyi, Azərbaycan Həmkarlar İttifaqları Konfederasiyası, Rabitə və İnformasiya Texnologiyaları Nazirliyinin birgə təşkilatçılığı ilə keçirilən tədbirdə dövlət və hökumət nümayəndələri, millət vəkilləri, təhsil işçiləri və ictimaiyyətin nümayəndələri iştirak edib. Təhsil naziri Misir Mərdanov müsabiqə ilə bağlı məlumat verərək bildirib ki, 600 mindən çox şagirdin qatıldığı yarışma üç mərhələdə keçirilib. Yarışmanın son mərhələsinə 96 şagird seçilib. Münsiflər Heyətinin qərarına əsasən, 21 nəfər müsabiqənin qalibi olub. Onlardan 5 nəfəri I yerə, 5 nəfəri II yerə, 11 nəfəri III yerə layiq görülüb. 56 nəfərin inşası isə fəxri fərmanlarla fərqləndirilib.
M.Mərdanovun sözlərinə görə, müsabiqə iştirakçılarından 87 məktəblinin yazısı kitabça halında nəşr olunub: “Bu müsabiqədə iştirak edən məktəblilərin sayı ilbəil artır. Azərbaycan məktəbliləri Heydər Əliyevin şəxsiyyətinə öz ehtiramlarını bildirirlər. Bizim əsas məqsədimiz, müstəqil Azərbaycan dövlətinin qurucusu haqqında gənclərimizin biliyini artırmaqdır”.
Nazir onu da qeyd edib ki, ümummilli liderə sevginin nəticəsidir ki, müsabiqəyə qatılanların sayı getdikcə artır. İştirakçıların və təşkilatçı qurumların sayının artdığını vurğulayan M.Mərdanov bunu müsabiqənin yüksələn nüfuzu ilə izah edib. Təhsilin səviyyəsinin də ilbəil qalxdığını vurğulayan nazir deyib ki, təhsilə göstərilən qayğı nəticəsində son on ildə şagirdlərin dərsliklə bağlı bütün problemləri həll edilib. 400 adda milli dərsliklər buraxılıb.
YAP-ın Sədr müavini - İcra katibi, millət vəkili Əli Əhmədov qeyd edib ki, belə müsabiqələr Ulu öndər Heydər Əliyev irsini öyrənməyə xidmət edən hərəkatdır: “Azərbaycan təhsilinin inkişafında yeni mərhələ yaşanır. Bu müsabiqədə iştirak edən şagirdlər Heydər Əliyevin siyasi kursuna və ideallarına tərəfdar olduqlarını göstərirlər”.
Ə.Əhmədov müsabiqədə fəal olan 12 nəfərə ali məktəblərə daxil olduqları təqdirdə YAP tərəfindən təqaüdlərin veriləcəyini də qeyd edib.
Tədbirdə çıxış edən Heydər Əliyev Fondunun icraçı direktoru Anar Ələkbərov müsabiqə iştirakçılarını Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın adından təbrik edib. Uşaqlara təhsildə uğurlar arzulayan natiq bildirib ki, Fond müsabiqədə nəzərdə tutulan mükafatlardan əlavə qaliblərin xaricə səfərlərini təşkil edəcək. Belə ki, şagirdlər bu ilin iyununda Belçika, Fransa və Almaniyaya bir həftəlik gəzintiyə göndəriləcək.
Rabitə və informasiya texnologiyaları nazirinin müavini Elmir Vəlizadə nazir Əli Abbasovun təbrikini çatdırıb və bildirib ki, təşkilatçı kimi qurum qaliblərə kompüter hədiyyə edəcək. Müsabiqədə qalib gəlmiş şagirdlərin hər birinə 1 ədəd “noutbook” hədiyyə olunub. Bundan başqa, xaricə gəzinti zamanı bir həftə ərzində gördüklərini əbədiləşdirmək üçün 21 şagirdin hər birinə 1 ədəd fotoaparat hədiyyə ediləcək.
Bundan başqa Azərbaycan Dövlət İqtisad Universitetinin rektoru, millət vəkili Şəmsəddin Hacıyev 2 qalibin hər birini 500 manat, təhsil naziri Misir Mərdanov isə 1 şagirdi 1000 manat pul mükafatı ilə sevindirib.
RUHİYYƏ

Paylaş:

Baxılıb: 1348 dəfə