Tahir Kərimli: Ərazi bütövlüyünü təmin edən Azərbaycan öz inkişafının yeni mərhələsinə qədəm qoyub

Bakı:

24 °C

53 %

3 m/s

AZ RU EN

Ana səhifə / Siyasət / Tahir Kərimli: Ərazi bütövlüyünü təmin edən Azərbaycan öz inkişafının yeni mərhələsinə qədəm qoyub

Tahir Kərimli: Ərazi bütövlüyünü təmin edən Azərbaycan öz inkişafının yeni mərhələsinə qədəm qoyub

26.01.2021 [09:05]

“Sentyabrın 27-dən noyabrın 10-dək davam edən 44 günlük Vətən müharibəsində işğalçı Ermənistan üzərində şanlı qələbə qazanan, düşməni kapitulyasiyaya məcbur edən və ərazi bütövlüyünü təmin edən Azərbaycan öz inkişafının yeni mərhələsinə qədəm qoyub. Təbii ki, qələbənin əldə olunmasında böyük payı olan şəhidlərimizin ailələrinin və qazilərimizin sosial problemlərinin həlli prioritet məsələlərdəndir. Vurğulamalıyam ki, indiyə qədər də şəhid ailələrinin, I Qarabağ müharibəsi əlillərinin sosial rifahının yüksəldilməsi üçün mühüm addımlar atılıb. Yeni dönəmdə isə belə tədbirlərin əhatə dairəsinin daha da genişləndirilməsi təmin ediləcək”. Bunu qəzetimizə açıqlamasında Vəhdət Partiyasının sədri, millət vəkili Tahir Kərimli deyib.
Onun sözlərinə görə, Prezident İlham Əliyev Şuşaya səfəri zamanı bildirib ki, şəhid ailələrinin sosial müdafiəsi gücləndirilir. I Qarabağ müharibəsində həlak olmuş 9 min şəhidin ailəsinə dövlət tərəfindən mənzillərin və fərdi evlərin verildiyini bildirən T.Kərimli II Qarabağ müharibəsində yaralanan hərbi qulluqçuların reabilitasiyası istiqamətində də əsaslı addımların atıldığını dilə gətirib. “Cənab Prezidentin vurğuladığı kimi, əlil olmuş hərbçilərin reabilitasiyası, onların müasir protezlərlə təmin edilməsi məsələsi öz həllini tapır. Ümumiyyətlə, ölkəmizdə postkonflikt dövrünün sosial siyasətinin əsası, əslində, 2020-ci ilin sonlarından qoyulub. Belə ki, Prezident İlham Əliyev şəhid ailələrinin, Vətən müharibəsi əlillərinin sosial müdafiəsinin gücləndirilməsinə hesablanan bir sıra sənədlər imzalayıb. 2020-ci ilin dekabrında təsdiq olunmuş yeni sosial dəstək paketinə əsasən, şəhid ailələrinə və 20 Yanvar şəhidlərinin ailələrinə aylıq müavinətlər 300 manatdan 500 manatadək artırılıb ki, bu da 66,7 faiz artım deməkdir. Həmçinin “Azərbaycan Respublikasının Milli Qəhrəmanı” üçün aylıq Prezident təqaüdü 1500 manatdan 1800 manata qaldırılıb. “Vətən Müharibəsi Qəhrəmanı” adı verilmiş şəxslərə aylıq 2 min manat ödənilməsi qərarı verilib. Bundan başqa, əlillik dərəcəsinə görə verilən müavinətlər 40 faiz artırılıb. Müvafiq kateqoriyadan olan insanların sosial rifahının yüksəldilməsinə xidmət edən bu kimi addımlar Vətən uğrunda döyüşən əsgər və zabitlərimizə verilən yüksək dəyərin göstəricisidir”.
PƏRVİZ

Paylaş:

Baxılıb: 544 dəfə