Hikmət Babaoğlu: Anlaşma Memorandumu regionda yeni tərəfdaşlığın inkişaf perspektivləri baxımından əhəmiyyətlidir

Bakı:

16 °C

88 %

4 m/s

AZ RU EN

Ana səhifə / Siyasət / Hikmət Babaoğlu: Anlaşma Memorandumu regionda yeni tərəfdaşlığın inkişaf perspektivləri baxımından əhəmiyyətlidir

Hikmət Babaoğlu: Anlaşma Memorandumu regionda yeni tərəfdaşlığın inkişaf perspektivləri baxımından əhəmiyyətlidir

22.01.2021 [09:42]

Yanvarın 21-də Azərbaycan və Türkmənistan arasında Xəzər dənizində “Dostluq” yatağının karbohidrogen ehtiyatlarının birgə kəşfiyyatı, işlənməsi və mənimsənilməsi haqqında Anlaşma Memorandumunun imzalanması olduqca mühüm hadisədir. Bu, istər iki dost və qardaş ölkənin enerji sahəsində əməkdaşlığının möhkəmləndirilməsi, istərsə də bütövlükdə, regionumuzda yeni tərəfdaşlığın və tranzit kommunikasiyalarının inkişaf perspektivləri baxımından əhəmiyyətlidir. Memorandum həm də Xəzər ekvatoriyasında yeni tərəfdaşlıq və əməkdaşlıq platformasının yaradılması ilə əlamətdardır.
Bunu AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib.
Deputat qeyd edib ki, Türkmənistan və Azərbaycanın dəniz sərhədlərinin kəsişməsində yerləşən mühüm karbohidrogen ehtiyatları yatağının çox da uzaq olmayan keçmişdə bəzi mərkəzlər tərəfindən siyasi istismar mövzusuna çevrilməsinə cəhd edilirdi. Ancaq bu gün “Dostluq” yatağı iki ölkə arasında dostluq və qardaşlığın rəmzinə çevrilir. Əslində, Xəzər dənizinin bu gün sülh və əməkdaşlıq dənizinə çevrilməsi hələ ötən əsrin 90-cı illərində böyük dövlət xadimi, Ümummilli Lider Heydər Əliyev tərəfindən həyata keçirilən neft strategiyası ilə bağlıdır. Xəzərdə iqtisadi maraqların önə çəkilməsi onun millitarizə edilməsinin qarşısını aldı. “Əsrin müqaviləsi”nin imzalanması isə bu istiqamətdə yeni mərhələ açdı. Xəzər hövzəsinə külli miqdarda investisiyanın cəlb olunması onun təhlükəsizliyini təmin edən tədbirlərlə nəticələndi. Bundan sonra Xəzərin hüquqi statusunun müəyyən edilməsi istiqamətində intensiv tədbirlər həyata keçirildi. Əvvəlcə Xəzər dənizinin şimal hissəsinin səthinin bölünməsi ilə bağlı Azərbaycan Qazaxıstan və Rusiya ilə razılaşma əldə edə bildi. Bundan sonra nəhayət, 2018-ci ildə Xəzərin hüququ statusu müəyyən edildi və beləliklə də Xəzər dənizinin şərqində yerləşən qardaş Türkmənistanla yeni əməkdaşlıq perspektivləri yarandı.
Deputat bildirib ki, Azərbaycan Prezidenti İlham Əliyevin 2008-ci və 2018-ci illərdə Türkmənistana səfər etməsi, eyni zamanda, Türkmənistan Prezidentinin Azərbaycana səfərləri qarşılıqlı etimada əsaslanan yeni keyfiyyət mərhələsi yaratdı. Yəni Azərbaycan Xəzər dənizinin əməkdaşlıq və sülh dənizinə çevrilməsində mühüm enerji strategiyası müəyyənləşdirə bildi və hazırda tərəfdaş ölkələrlə birlikdə bunun nəticələrini görür.
Nəticələr isə bütün Xəzərətrafı ölkələrin xalqlarının rifahı və inkişafı üçün mühüm əhəmiyyətə malikdir. Ona görə də “Dostluq” karbohidrogen ehtiyatları yatağının birgə istismarı ilə bağlı əldə edilən razılaşma əlamətdar tarixi hadisə kimi qiymətləndirilməlidir.

Paylaş:

Baxılıb: 624 dəfə