Ermənistanda qəzəb oxları Paşinyana tuşlanıb

Bakı:

25 °C

70 %

16 m/s

Əlaqə

AZ RU EN

Ana səhifə / Siyasət / Ermənistanda qəzəb oxları Paşinyana tuşlanıb

Ermənistanda qəzəb oxları Paşinyana tuşlanıb

31.12.2020 [09:59]

44 gün davam edən müharibədə Azərbaycanın qarşısında darmadağın olaraq biabırçı məğlubiyyətə uğrayan Ermənistanda vəziyyət olduqca gərginləşib. İllərdir, aclıq və səfalət içində yaşayan erməni xalqı bu rüsvayedici məğlubiyyətdən sonra kütləvi mitinqlər keçirir, mövcud hakimiyyəti istefaya çağırır. Paytaxtda və regionlarda narazı kütlə “Satqın Nikol”, “İstefa”, “Paşinyan qatildir” şüarları ilə baş nazir və onun quldur dəstəsini dərhal hakimiyyətdən uzaqlaşmağa çağırırlar. Təsadüfi deyil ki, bu zamana qədər etirazçılarla polis dəstələri arasında ciddi toqquşmalar baş verib. “Daşnaksutyun”, “Çiçəklənən Ermənistan”, “Vətən” kimi Paşinyanın təzyiqlərinə məruz qalan müxalif partiyalar isə xalqı etirazları səngitməməyə, ölkə boyunca tətillər keçirməyə səsləyir.
Paşinyan etirazçılara qarşı təzyiq və repressiya metodunu seçib
Nikol Paşinyan isə düşdüyü bu acınacaqlı vəziyyətdən çarəsiz şəkildə çıxış yolu axtarır. O, kapitulyasiya aktını imzaladıqdan sonra bütün Ermənistanı bürüyən etiraz dalğasından yaxa qurtarmaq üçün repressiya metoduna baş vurub. Qeyd etdiyimiz kimi, işğalçı və məğlub ölkənin, demək olar ki, bütün vilayətləri öz ağuşuna almış etiraz dalğalarında çox sayda nümayişçi həbs edilir və güc strukturları tərəfindən şiddətə məruz qalır. Eyni zamanda, baş nazir bir çox müxalifət liderini həbsə atdırıb. Lakin onun bu addımı məğlubiyyətin ağrısı canından çıxmayan erməni xalqının daha da hiddətlənməsinə səbəb olub. Bu faktlar isə onu göstərir ki, ağılsız diktator Paşinyan öz postunu qorumaq üçün gözünü qırpmadan xalqını, ölkəsini növbəti fəlakətə sürükləyir.
Özünü “demokrat” kimi təqdim edən Nikolun siyasi şousunun ömrü uzun olmadı
Yeri gəlmişkən, Ermənistan mətbuatı özünü “demokrat” kimi təqdim edən Paşinyanın yaratdığı siyasi şounun ömrünün uzun olmadığını yazır. Vurğulanır ki, xalqın ona zərrə qədər etimadı qalmayıb. Erməni ekspertlər isə qeyd edirlər ki, Nikolun düşünülməmiş, uğursuz siyasəti ölkədəki gərginliyi daha da artırmaqdadır. Hakimiyyətə gəlmədən öncə öz xam xəyalları ilə erməni xalqının başını qatan Paşinyan verdiyi heç bir vədə əməl edə bilmədiyi üçün artıq hər tərəfdən dalana sıxışıb. Beləliklə, hadisələrin gedişi onu göstərir ki, Paşinyan və onun quldur dəstəsi üçün ölkəni idarə etmək nəinki çətinləşib, hətta artıq vəziyyət tamamilə nəzarətdən çıxıb.
Məğlub ölkənin gələcəyi sual altında...
Yeri gəlmişkən, Ermənistan mediası bu ölkənin gələcəyinin sual altında olduğunu yazır. Vurğulanır ki, siyasi böhranla yanaşı, ölkənin xarici investorlar üzünə həsrət qalan dövlətlərdən biri olması, korrupsiyanın, inhisarçılığın mövcudluğu, məmur özbaşınalığının pik həddə çatması vəziyyətin daha da acınacaqlı olacağını göstərir.
Göründüyü kimi, iqtisadi cəhətdən can çəkişən, tənəzzülün hökm sürdüyü Ermənistan Azərbaycanın qarşısında ağır məğlubiyyətə düçar olduqdan sonra xaos və qarşıdurma meydanına çevrilib. Ekspertlərin də vurğuladıqları kimi, Ermənistan əzici məğlubiyyətdən dərs çıxarmasa, yeni reallıqlarla barışmasa, daha böyük fəlakətlərlə üzləşəcək.
Əfəndi İbrahimli
Yeni Azərbaycan Partiyası
Səbail rayon təşkilatının
baş məsləhətçisi