Arzuman Abdulkərimov: Aparılan uğurlu siyasət nəticəsində Azərbaycan qələbəyə nail oldu

Bakı:

22 °C

59 %

11 m/s

Əlaqə

AZ RU EN

Ana səhifə / Siyasət / Arzuman Abdulkərimov: Aparılan uğurlu siyasət nəticəsində Azərbaycan qələbəyə nail oldu

Arzuman Abdulkərimov: Aparılan uğurlu siyasət nəticəsində Azərbaycan qələbəyə nail oldu

27.11.2020 [09:02]

“44 günlük Vətən müharibəsi Böyük Zəfərimizlə başa çatdı. Azərbaycan Ordusunun həyata keçirdiyi uğurlu əks-hücum əməliyyatları işğalçı Ermənistanın kapitulyasiyası ilə nəticələndi. Hərbi əməliyyatların məqsədi ilk gündən sülhə məcburetmə əməliyyatı kimi göstərilirdi və biz məqsədimizə çatdıq. Müzəffər Ali Baş Komandan başda olmaqla rəşadətli Ordumuz işğalçı Ermənistanı sülhə məcbur etdi. Döyüş meydanında qazanılmış qələbələr siyasi müstəvidə də qələbəni şərtləndirdi. Azərbaycan, Rusiya və Ermənistan rəhbərlərinin imzaladığı birgə bəyanat Azərbaycanın döyüş meydanında qazandığı parlaq qələbəni siyasi-diplomatik müstəviyə daşıdı”. Bu fikirləri qəzetimizə açıqlamasında Ana Vətən Partiyasının (AVP) sədr müavini Arzuman Abdulkərimov deyib.
A.Abdulkərimov bildirib ki, ölkəmiz ötən illər ərzində bütün beynəlxalq platformalarda ərazi bütövlüyümüzü dəstəkləyən sənədlərin qəbuluna nail olmaqla münaqişənin həllinə hüquqi zəmin yaratdı. Prezident İlham Əliyevin rəhbərliyi ilə aparılan uğurlu xarici siyasət nəticəsində dünyanın bütün aparıcı beynəlxalq təşkilatları münaqişə ilə bağlı ədalətli qətnamələr, qərarlar qəbul edərək birmənalı şəkildə Dağlıq Qarabağı Azərbaycanın ayrılmaz hissəsi kimi tanıdı. Məhz aparılan uğurlu siyasət nəticəsində Azərbaycan bugünkü qələbəyə nail oldu. Azərbaycan Respublikasının ərazi bütövlüyü tam təmin edilməklə Ermənistan-Azərbaycan Dağlıq Qarabağ münaqişəsinə son qoyuldu və bütün ərazilərimiz erməni işğalından azad edildi. Ermənilərin illərlə planlaşdırdığı Dağlıq Qarabağda dövlət yaratmaq arzusu alt-üst edildi. Bununla bütün məcburi köçkünlərimiz öz doğma yurdlarına qayıdacaq, azad olunmuş ərazilərdə yaşayan ermənilər Azərbaycan Respublikasının vətəndaşlığını qəbul edəcək, həmin ərazilərimizdə olan bütün inzibati binalarda yalnız Azərbaycan Respublikasının üçrəngli bayrağı dalğalanacaq, yalnız Azərbaycan Respublikasının qanun və normativ hüquqi aktları tətbiq olunacaq, yalnız Azərbaycan manatı dövriyyəyə buraxılacaq, azad olunmuş bütün torpaqlarımızda Azərbaycan polisi xidmət göstərəcək.
Onun sözlərinə görə, bu qələbə ilə ermənilərin uzun illər işğal altında saxladıqları 132 kilometrlik Azərbaycan-İran sərhədi də azad edildi. Eyni zamanda, Azərbaycan üçün çox böyük tarixi, siyasi və iqtisadi əhəmiyyətə malik olan Naxçıvan Muxtar Respublikası ilə bütün kommunikasiya xətləri bərpa ediləcək, Azərbaycanla Ermənistan arasında yalnız dövlət sərhəd xətti mövcud olacaq, onu da Azərbaycan Respublikasının Dövlət Sərhəd Xidməti qoruyacaq.
N.BAYRAMLI

Paylaş:

Baxılıb: 514 dəfə