Anar Məmmədov: İnanırıq ki, Azərbaycan xalqı olaraq tarixi qələbəni tezliklə qeyd edəcəyik

Bakı:

25 °C

53 %

3 m/s

Əlaqə

AZ RU EN

Ana səhifə / Siyasət / Anar Məmmədov: İnanırıq ki, Azərbaycan xalqı olaraq tarixi qələbəni tezliklə qeyd edəcəyik

Anar Məmmədov: İnanırıq ki, Azərbaycan xalqı olaraq tarixi qələbəni tezliklə qeyd edəcəyik

21.10.2020 [09:06]

“Bu gün Azərbaycan əsgəri Azərbaycan xalqının ondan gözlədiyi nəticəni əldə etmək üçün işğalçıları məhv etməkdə, onların Azərbaycan xalqına qarşı indiyə qədər sərgilədiyi münasibətinə son qoymaqdadır. Əsgərlərimiz əks-hücum əməliyyatları ilə qısa bir müddətdə xalqımıza sevincli anlar yaşatdı”. Bu fikirləri Milli Məclisin deputatı Anar Məmmədov deyib.
A.Məmmədov bildirib ki, ötən müddət ərzində bir sıra şəhər və kəndlərimizin işğaldan azad edilməsi böyük hərbi uğurdur. Azərbaycanının ərazı bütövlüyü uğrunda vuruşanlar, canını fəda edənlər heç vaxt unudulmur, onlara və ailələrinə hər zaman həssaslıqla yanaşılır. Millət vəkilinin sözlərinə görə, dövlətimizin başçısı Azərbaycan bayrağının torpaqlarımızın hər qarışında dalğalanması üçün lazım gələn bütün addımları atır, ölkəmizin iqtisadi və hərbi qüdrətini, beynəlxalq nüfuzunu gücləndirməkdən ötrü böyük inam və qətiyyətlə çalışır, torpaqlarımızın işğaldan tam azad edilməsi üçün böyük cəsarət və əzm göstərir: “Azərbaycan vətəndaşları da öz dövlətinə və Prezidentinə inanır, Ona güvənir, Azərbaycan dövlətinin və Prezidentinin dəstəyini, gücünü hiss edir və bundan qürur duyur. Bu gün maddi-texniki bazası ardıcıl olaraq möhkəmləndirilən Azərbaycan Ordusu işğal altında olan doğma torpaqlarımızın düşmən əsarətindən azad olunacağı günü hər an daha da yaxınlaşdırır”.
A.Məmmədov qeyd edib ki, ordumuzun əks-hücumlara başladığı və şiddətli döyüşlərin getdiyi ilk gündən bəri Ermənistan tərəfi yenə də öz çirkin xislətini göstərərək mülki əhalini hədəfə alır: “İşğalçı ölkənin silahlı qüvvələrinin mülki infrastruktur obyektlərini atəşə tutması nəticəsində 50-ə yaxın dinc sakin həlak olub, xeyli sayda yaralanıb. Eləcə də çoxlu sayda yaşayış evinə, mülki obyektlərə külli miqdarda ziyan vurulub. Bütün bunlar, müharibə qanunlarına ziddir, beynəlxalq cinayətdir. Ermənistan tərəfi ənənəvi şəkildə yenə də belə təxribatlara əl ataraq cəbhədəki məğlubiyyətlərini mülki əhalidən qisas almaqla unutdurmağa çalışır. Qürurverici hal isə odur ki, cəbhə zonasında yerləşən kənd və şəhərlərdə yerli əhali öz evlərini əsla tərk etmir. Onların hər biri öz dövlətinə və əsgərinə güvənir. Xalqımızın mətinliyi, dözümlülüyü və Azərbaycan əsgərinin döyüş ruhu Azərbaycan gənci üçün də bir nümunədir. Erməni ordusunda fərarilik, döyüş bölgəsindən qaçmaq baş alıb getdiyi halda, Azərbaycan qadını öz oğlunu sevinc göz yaşları ilə cəbhəyə yola salır. Haqq ilə peşəkarlıq birləşəndə qələbə qaçılmaz olur. Haqq, tarixi həqiqət, beynəlxalq hüquq Azərbaycanın tərəfindədir. İnanırıq ki, Azərbaycan xalqı olaraq tarixi qələbəni tezliklə qeyd edəcəyik”.
Nardar

Paylaş:

Baxılıb: 404 dəfə