ATƏT-ə üzv dövlətlərin nümayəndələri Ermənistanın humanitar atəşkəsi pozması barədə ətraflı məlumatlandırılıblar

Bakı:

24 °C

56 %

5 m/s

AZ RU EN

Ana səhifə / Siyasət / ATƏT-ə üzv dövlətlərin nümayəndələri Ermənistanın humanitar atəşkəsi pozması barədə ətraflı məlumatlandırılıblar

ATƏT-ə üzv dövlətlərin nümayəndələri Ermənistanın humanitar atəşkəsi pozması barədə ətraflı məlumatlandırılıblar

17.10.2020 [08:27]

Oktyabrın 16-da Vyanada ATƏT-in Daimi Şurasının iclasında Ermənistanın Azərbaycana qarşı hərbi təcavüzü və yaşayış məntəqələrini atəşə tutması müzakirə olunub.

AZƏRTAC xəbər verir ki, iclasda Azərbaycanın ATƏT yanında daimi nümayəndəliyi vəziyyətlə bağlı iştirakçı ölkələrin təmsilçilərini məlumatlandırıb. Bildirilib ki, Rusiyanın vasitəçiliyi ilə münaqişə tərəfləri oktyabrın 10-da Moskvada humanitar atəşkəsə dair razılaşma əldə ediblər. Lakin bu razılaşmaya baxmayaraq, Ermənistanın silahlı qüvvələri cəbhə xətti boyunca Azərbaycanın mülki əhalisi və mülki obyektlərə qarşı birbaşa hücumları davam etdirib, 1949-cu il Cenevrə Konvensiyası da daxil olmaqla, beynəlxalq humanitar hüquqla daşıdığı öhdəlikləri kobudcasına pozub. Bu faktlar onu göstərir ki, Ermənistanın atəşkəsi dəstəkləməsi və ona əməl etməsi barədə vədləri həqiqəti əks etdirmir. Şübhəsiz ki, Ermənistanın məqsədi insanların həyatını xilas etmək və münaqişəni sülh yolu ilə həll etmək deyil, atəşkəs pərdəsi altında növbəti təcavüzə hazırlaşmaq olub.

Beləliklə, Ermənistan atəşkəsdən dərhal sonra Azərbaycanın yaşayış məntəqələrini atəşə tutmağa başlayıb, eyni zamanda, Hadrut və Cəbrayıl istiqamətində hücuma keçməyə çalışıb, eləcə də həlak olmuş əsgərlərin cəsədini toplayan tibbi heyəti də atəşə tutmaqdan çəkinməyib. Eyni zamanda, humanitar atəşkəs elan edildikdən dərhal sonra, yəni oktyabrın 11-nə keçən gecə Azərbaycanın ikinci böyük şəhəri Gəncənin raket hücumuna məruz qalması geniş şəkildə iclas iştirakçılarının diqqətinə çatdırılıb. Qeyd edilib ki, cəbhə bölgəsindən kənarda yerləşən və “SCUD“ ballistik raketi ilə atəşə tutulan şəhərdə 10 mülki şəxs öldürülüb, 40-dək mülki şəxs yaralanıb. Bu hücum ATƏT-in iştirakçı dövlətinin “SCUD“dan istifadə etməklə mülki əhaliyə hücumunu əks etdirən ilk tarixi hadisə kimi tarix kitablarına düşəcəkdir.

Bildirilib ki, Azərbaycanın mühüm infrastruktur obyektləri və böyük şəhərləri müxtəlif istiqamətlərdən raket və top atəşinə tutulmaqdadır, mülki insan tələfatı günbəgün artmaqdadır. Bununla yanaşı, MDB və Yaxın Şərq ölkələrindən Ermənistana gizli şəkildə silah daşınması, eləcə də “könüllülər” adı altında terrorçu və muzdlu döyüşçülərin Ermənistana göndərilməsi bu ölkənin yeni hücum əməliyyatlarına hazırlaşdığını sübut edir. Qeyd edilib ki, bu fəaliyyətlərin həyata keçirildiyi və ya maliyyələşdirildiyi ATƏT-ə üzv dövlətlər də məsuliyyət daşıyırlar. Bu baxımdan ATƏT-ə üzv dövlətlərin müvafiq orqanları istər öz vətəndaşı, istərsə də tranzit olaraq bu ölkənin ərazisindən keçərək Ermənistana gedənlərlə, həmçinin artan “səyahət” intensivliyi ilə bağlı lazımi səy göstərməli və profilaktik sərhəd nəzarəti tədbirləri görməli, ərazilərinin Azərbaycanın suverenliyinə və ərazi bütövlüyünə qarşı terror fəaliyyətlərini dəstəkləmək və ya maliyyələşdirmək üçün istifadə edilməsinin qarşısını alan addımlar atmalıdır.

Çıxışda, həmçinin qeyd edilib ki, Ermənistanın mülki şəxslərə yönəlmiş hücumları, mülki şəxslərin öldürülməsi və yaralanması, eləcə də mülki şəxs və obyektlərə ayrı-seçkilik qoymadan zərər vurulması müharibə cinayətidir. Azərbaycan Müdafiə Nazirliyi Azərbaycan Silahlı Qüvvələrinin hücum əməliyyatları aparmadığını və humanitar atəşkəsə riayət etdiyini dəfələrlə vurğulayıb. Azərbaycan humanitar atəşkəs şərtlərinə sadiq qalır, lakin Ermənistanın mülki əhaliyə və şəhərlərə hücumlarına biganə qalmayacaqdır. Azərbaycan Silahlı Qüvvələri beynəlxalq humanitar hüquqa uyğun olaraq mülki əhaliyə ziyan vurmamaq üçün hər cür səy göstərir. Ermənistanın hərəkətləri isə təkcə Azərbaycan mülki əhalisinə deyil, həm də Azərbaycanın işğal altındakı Dağlıq Qarabağ bölgəsində yaşayan erməni mənşəli Azərbaycan vətəndaşlarına zərər vurmağa hədəflənib. Azərbaycan Müdafiə Nazirliyi dəfələrlə işğal olunmuş ərazilərdəki mülki əhaliyə döyüş bölgəsindən uzaq durmağa çağırsa da, Ermənistan tərəfi işğal olunmuş ərazilərdə sərbəst gediş-gəliş üçün məhdudiyyətlər tətbiq edib və çağırış yaşındakı kişi əhalinin ərazini tərk etməsini qadağan edib.

Azərbaycanın münaqişənin dinc yolla və beynəlxalq hüququn norma və prinsiplərinə uyğun şəkildə həllinə tərəfdar olduğu da vurğulanıb, bunun üçün BMT-nin müvafiq qətnamələri və digər beynəlxalq təşkilatların qərarlarının icra edilməli olduğu diqqətə çatdırılıb. Qeyd edilib ki, münaqişənin həlli Azərbaycanın beynəlxalq hüquq çərçivəsində onun beynəlxalq səviyyədə tanınan sərhədləri daxilində suverenliyinə və ərazi bütövlüyünə tam hörmət etməklə mümkündür və Azərbaycan bu çərçivədən kənarda heç bir siyasi həll yolunu qəbul etmir.

Paylaş:

Baxılıb: 338 dəfə