Erməni vandalizminin bariz nümunəsi, yaxud bəşər sivilizasiyasına qarşı törədilən cinayət əməlləri

Bakı:

26 °C

55 %

2 m/s

AZ RU EN

Ana səhifə / Siyasət / Erməni vandalizminin bariz nümunəsi, yaxud bəşər sivilizasiyasına qarşı törədilən cinayət əməlləri

Erməni vandalizminin bariz nümunəsi, yaxud bəşər sivilizasiyasına qarşı törədilən cinayət əməlləri

11.09.2020 [09:44]

Azərbaycanın işğal olunmuş ərazilərində tarixi, dini-mədəni abidələrin dağıdılması işğalçı ölkənin təcavüzkar mahiyyətini nümayiş etdirir
Ermənistanın Azərbaycana qarşı davam edən təcavüzünün qurbanları təkcə soydaşlarımız deyil, həm də yaşı minilliklərlə ölçülən tarixi, dini və mədəni abidələrimizdir. İşğal edilmiş Azərbaycan ərazilərində erməni vandalları tərəfindən çoxsaylı məscid, muzey, maddi-mədəniyyət nümunəsi yerlə yeksan olunub, həmçinin maddi və mənəvi sərvətlərimiz olan bu abidələrin özününküləşdirilməsi cəhdləri edilib.
İşğal altında olan Azərbaycan ərazilərində dünya mədəniyyəti incilərindən olan çoxsaylı dövlət və yerli əhəmiyyətli abidə dağıdılıb, talan edilib
İnkaredilməz həqiqətdir ki, Ermənistan 1992-1993-cü illərdə Azərbaycanın ərazisinin 20 faizini işğal etdikdən sonra qeyri-qanuni olaraq respublikamızın daşınmaz tarix və mədəniyyət abidələrinin memarlıq quruluşunda və interyerində dəyişikliklər edib, divar yazılarını korlayıb, abidələrin divarları üzərində olan çoxlu sayda daş yazıları, eləcə də alban dövrünə məxsus bədii üslubda işlənmiş ornament və simvolları tamamilə silib, onların bir çoxunun isə formalarını dəyişdirərək tanınmaz hala salıblar. Bu ərazilərdə ermənilər qanunsuz arxeoloji qazıntılar aparır, xaraba qalmış kəndlərdə kilsələr tikir, toponimləri dəyişdirir, Azərbaycanın maddi-mədəniyyət nümunələrini mənimsəməyə çalışırlar.
Məlumata əsasən, bütövlükdə, işğal altında olan Azərbaycan ərazilərində dünya mədəniyyəti incilərindən olan, həmçinin dövlət və yerli əhəmiyyətli çoxsaylı abidə dağıdılıb, talan edilib. Bundan başqa, işğal olunmuş ərazilərdə bir çox eksponatın saxlandığı muzeylər, eləcə də kitabxanalar, klublar, teatrlar, konsert salonları, istirahət və mədəniyyət parkları, incəsənət qalereyaları, musiqi məktəbləri, minlərlə musiqi aləti və sair qiymətli mal-material dağıdılıb və ya mənimsənilib.
Tarixi abidələrimizə qarşı saxtakarlıq və cinayət əməlləri beynəlxalq hüquq normalarına, müvafiq konvensiyaların tələblərinə ziddir
Təcavüzkar ölkənin vandalizminə qarşı beynəlxalq təşkilatlar tərəfindən müvafiq qətnamə və qərarların olmasına baxmayaraq, buna məhəl qoyulmur. Ümumiyyətlə, ermənilərin işğal olunmuş Azərbaycan torpaqlarında tarixi-dini abidələrimizə qarşı saxtakarlıq və cinayət əməlləri beynəlxalq səviyyədə təsbit olunmuş “Silahlı münaqişə baş verdikdə mədəni dəyərlərin qorunması haqqında” 1954-cü il Haaqa Konvensiyasının, “Arxeoloji irsin mühafizəsi haqqında” 1992-ci il Avropa Konvensiyasının və “Ümumdünya mədəni və təbii irsin mühafizəsi haqqında” UNESKO-nun 1972-ci il Konvensiyasının tələblərinə ziddir.
Əlbəttə, Ermənistanın işğal olunmuş Azərbaycan ərazilərində xalqımıza məxsus maddi-mədəni irsi məhv etməsi yalnız ölkəmizə qarşı yönəlməyib, bu, ümumbəşəri sivilizasiyaya qarşı törədilən vəhşilik, cinayət əməlidir. Bütövlükdə isə, Azərbaycanın işğal olunmuş ərazilərində tarixi, dini-mədəni abidələrin dağıdılması erməni vandalizminin bariz nümunəsidir.
Nurlan QƏLƏNDƏRLİ

Paylaş:

Baxılıb: 395 dəfə