Aqressiv və radikal erməni vandalizminin daha bir nümunəsi

Bakı:

20 °C

60 %

3 m/s

Əlaqə

AZ RU EN

Ana səhifə / Siyasət / Aqressiv və radikal erməni vandalizminin daha bir nümunəsi

Aqressiv və radikal erməni vandalizminin daha bir nümunəsi

24.07.2020 [09:11]

Ekspertlərin qeyd etdikləri kimi, Azərbaycanın xarici ölkələrdəki diplomatik nümayəndəliklərinin binalarına edilmiş hücumlar, eləcə də dinc azərbaycanlı nümayişçilərə qarşı törədilən təxribatlar özündə terror elementlərini ehtiva edir
İyulun 12-dən başlayaraq Ermənistan-Azərbaycan dövlət sərhədinin Tovuz rayonu istiqamətindən erməni silahlı qüvvələrinin törətdiyi hərbi təxribatların qarşısının Azərbaycan Ordusu tərəfindən qətiyyətlə alınması, düşmənə layiqli cavab verilməsi təcavüzkar ölkənin bütün mənfur planlarını alt-üst edib. Bundan sonra ermənilər fərqli təxribatlar axtarışına çıxıblar. Son bir həftə ərzində Azərbaycanın bir sıra ölkələrdəki diplomatik nümayəndəliklərinə və Ermənistanın hərbi təxribatlarına qarşı etiraz olaraq xarici ölkələrdə aksiya keçirən dinc azərbaycanlılara qarşı radikal ermənilər tərəfindən hücumlar edilməsi bunun bariz nümunəsidir.
Məsələ ilə bağlı fikirlərini bölüşən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elşad Mirbəşiroğlu bildirib ki, son günlərdə Azərbaycanın Fransa, Böyük Britaniya, İsveç, Polşa, Avstraliya, ABŞ, Niderland, Belçikada diplomatik nümayəndəliklərinə, həmçinin xarici ölkələrdə yaşayan və Ermənistanın iyulun 12-dən başlayaraq növbəti təxribatlarına etiraz məqsədilə aksiya keçirən dinc azərbaycanlılara qarşı radikal erməni qüvvələri tərəfindən aqressiv təxribatçı əməllər törədilir. Millət vəkili qeyd edib ki, Azərbaycanın diplomatik nümayəndəliklərinin binalarına, eləcə də dinc azərbaycanlı nümayişçilərə qarşı törədilən təxribatlar özündə vandalizm və terror elementlərini ehtiva edir.
Onun sözlərinə görə, ermənilərin törətdikləri əməllər cinayət məsuliyyəti doğurur: “Dinc aksiyaçılara hücum edən erməni terorrçuları bir daha əsl mahiyyətlərini ortaya qoyurlar. Qeyd edim ki, bu hücumlar nəticəsində çoxsaylı aksiya iştirakçılarına ermənilər tərəfindən fiziki güc tətbiq olunur, onlara xəsarətlər yetirilir, soydaşlarımızın sərbəst toplaşmaq və öz fikirlərini ifadə etmək hüquqları pozulur. 1961-ci il Diplomatik Əlaqələr haqqında Vyana Konvensiyasına əsasən diplomatik nümayəndəliklərin hər hansı müdaxilə və zərərdən mühafizəsinin təmin edilməsi, eləcə də diplomata, onun şəxsiyyətinə, azadlığına və şərəfinə qarşı hər hansı hücumun qarşısının alınması qəbul edən ölkənin məsuliyyətindədir. Azərbaycanın diplomatik nümayəndəliklərinə və dinc aksiya iştirakçılarına qarşı törədilən bu təxribatların, vandalizm aktlarının qarşısı alınmalı, belə hallar həmin ölkələrin aidiyyəti orqanları tərəfindən araşdırılmalı və bu cinayətləri törədənlərin hərəkətlərinə hüquqi qiymət verilməlidir”.
Milli Məclisin Beynəlxalq münasibətlər və parlamentlərarası əlaqələr komitəsinin üzvü, millət vəkili Ramil Həsən isə bildirib ki, ermənilərin bu tipli təxribatları, eləcə də terrorçu fəaliyyəti yeni hal deyil: “1970-1980-ci illərdə ASALA və digər erməni terror təşkilatları 70-dən çox insanı qətlə yetirib, ümumilikdə, 22 ölkədə 235-dən çox terror aktı törədib və 24 türk diplomatı həlak olub. Bu gün xarici ölkələrdə Azərbaycanın diplomatik nümayəndəliklərinə, o cümlədən erməni təcavüzünü pisləyən dinc aksiya iştirakçılarına qarşı zorakılıq tətbiq edilməsi ermənilərin terrorçu və təcavüzkar mahiyyətindən xəbər verir.
Adətən belə vandalizm, insan hüquq və azadlıqlarına qəsd kimi hallara qarşı barışmaz mövqe nümayiş etdirən beynəlxalq qurumların, beynəlxalq hüquq-müdafiə təşkilatlarının susqunluğu anlaşılan deyil. Bu, həmin təşkilatlarda ikili standartların və selektiv yanaşmanın hökm sürdüyünü aydın göstərir”.
Pərviz SADAYOĞLU

Paylaş:

Baxılıb: 299 dəfə