Yuri Zbitnev: Azərbaycan Cənubi Qafqazda sabitliyin qarantı ola bilər

Bakı:

16 °C

77 %

2 m/s

Əlaqə

AZ RU EN

Ana səhifə / Siyasət / Yuri Zbitnev: Azərbaycan Cənubi Qafqazda sabitliyin qarantı ola bilər

Yuri Zbitnev: Azərbaycan Cənubi Qafqazda sabitliyin qarantı ola bilər

27.02.2010 [21:51]

ümumukrayna “Novaya sila” Partiyasının lideri, həkim və hüquqşünas, birinci çağırış Ali Radanın deputatı, Ukrayna prezidenti vəzifəsinə sabiq namizəd Yuri Zbitnev AzərTAc-a müsahibəsində bildirib ki, iqtisadi böhran dövründə Azərbaycan rəhbərliyinin siyasəti Avropa ölkələrinin çoxu üçün nümunə sayıla bilər. Y.Zbitnev deyib: “Dövlətin nüfuzu haqqında fikirlər çoxdur. Bəziləri bunu mədəniyyətlə, digərləri millət və iqtisadiyyatla əlaqələndirir. Şəxsən mən əminəm ki, dövlətin nüfuzu ilk növbədə rəhbərin müdrikliyi və nüfuzu deməkdir. Bir neçə il bundan əvvəl mən Ukrayna hökumət nümayəndə heyətinin tərkibində Bakıda oldum, orada davamlı və sabit inkişaf edən dövlət nümunəsi gördüm. 2009-cu ildə Azərbaycanda sənaye məhsulu istehsalının həcmi 8,6 faiz artmışdır. Bu, MDB ölkələri arasında ən yaxşı göstəricilərdən biridir. Azərbaycanda müsbət demoqrafik dinamika, təhsil və tibb sahəsində sanballı uğurlar onu göstərir ki, onun BMT-nin yüksək insan potensialı indeksinə malik ölkələr qrupuna daxil olması üçün hər cür əsas vardır. Bu uğurlar, şübhəsiz, Prezident İlham Əliyevin hərtərəfli düşünülmüş iqtisadi siyasətinin nəticəsidir”.
Y.Zbitnev bu gün Azərbaycanda gündəmdə olan və ölkə rəhbərliyinin uğurla həll etdiyi geosiyasi və geostrateji məsələlərə xüsusi diqqət yetirib. O, deyib: “Beynəlxalq siyasətdə iki yanaşma - praqmatik və romantik yanaşma həmişə əlaqəlidir. Sonuncu yanaşmada həmişə romantik piramidalar qurulur, birinci yanaşmada isə dövlətlərin milli mənafeləri nəzərə alınmaqla yeni paradiqmalar, beynəlxalq münasibətlərin yeni arxitektonikası yaradılır. Azərbaycanın siyasətini məhz bu cür düşünülmüş praqmatik yanaşmaya aid etmək olar. Ukrayna kimi, Azərbaycan da bir çox geosiyasi qüvvə mərkəzlərinin kəsişdiyi məkanda yerləşir. Buna görə də ölkə rəhbərliyi təkcə öz dövlətinin güclənməsinə deyil, həm də regionda sabitliyin qorunub saxlanmasına yönəlmiş dəqiq və çevik siyasət yeridir. Dünyada vəziyyətin sürətlə dəyişməsi, ərazi, resurslar və iqlimlə bağlı problemlər Cənubi Qafqazda təhlükəsizliyin yeni arxitekturasının yaradılması məsələsini zəruri edir. BMT-nin nüfuzunun azalması (təəssüf ki, onun qəbul etdiyi qətnamələrin heç də hamısı üzv ölkələr tərəfindən icra edilmir), dövlətlərarası qurumların yetərincə səmərəli olmaması böhrandan sonrakı dövrdə dövlətlərin qarşısında prinsipcə məsul vəzifələr qoyan yeni reallıqlara dəlalət edir.
Bu şəraitdə güclü bir dövlət kimi məhz Azərbaycan, təkcə Dağlıq Qarabağ probleminin tənzimlənməsi istiqamətində deyil, həm də enerji daşıyıcıları ilə təchizat, nəqliyyat dəhlizlərinin yaradılması, Xəzər dənizinin statusu və bir sıra başqa məsələlərlə əlaqədar düzgün və düşünülmüş addımlar atır. Rusiya, Türkiyə, İran, Avropa İttifaqı başa düşür ki, Cənubi Qafqazla bağlı məsələlərdə çox şey, bəlkə də hər şey məhz Azərbaycandan asılıdır. Mənim fikrimcə, tezliklə biz Azərbaycanın yeni geosiyasi təşəbbüslərinin şahidi ola bilərik - Azərbaycan çox güman ki, Ukrayna ilə birlikdə Şanxay Əməkdaşlıq Təşkilatı ilə “dialoq üzrə tərəfdaşlar” kimi çıxış edə bilər. Yaxud başqa bir misal: dövlətlərin ərazi bütövlüyü və sərhədlərin toxunulmazlığı problemlərinin təkmilləşdirilməsinə və tamamlanmasına həsr edilmiş, şərti adı “Helsinki-2” olan beynəlxalq konfrans keçirmək olar. Axı “dondurulmuş münaqişələr” problemi təkcə Qafqazın problemi deyil, həm də Ukraynanın, Avropanın, bütövlükdə dünyanın problemidir.
Əminəm ki, Azərbaycan Cənubi Qafqazda sülhün və sabitliyin qarantı ola bilər və olmalıdır. Ona görə ki, biz tarixi yaxşı bilirik və sülhün qədrini bilməliyik”.
Ukraynalı siyasətçi onun ölkəsindəki vəziyyət barədə sualı şərh edərək deyib: “Ukraynanın yeni Prezidenti Viktor Yanukoviçin qarşısında, ilk növbədə iqtisadi inkişaf və səmərəli şaquli idarəetmənin tənzimlənməsi sahəsində çox mürəkkəb vəzifələr durur. Əsla şübhə yoxdur ki, Azərbaycan ilə münasibətlərdə həm indiyə qədər qəbul edilmiş sazişlərin yerinə yetirilməsində varislik prinsipi qorunub saxlanacaq, həm də beynəlxalq əməkdaşlığın yeni məqamları yaranacaq”.

Paylaş:

Baxılıb: 1312 dəfə