Azərbaycanın parlament nümayəndə heyəti İran prezidenti ilə görüşüb

Bakı:

24 °C

78 %

11 m/s

Əlaqə

AZ RU EN

Ana səhifə / Siyasət / Azərbaycanın parlament nümayəndə heyəti İran prezidenti ilə görüşüb

Azərbaycanın parlament nümayəndə heyəti İran prezidenti ilə görüşüb

23.02.2010 [08:21]

AzərTAc xəbər verir ki, Milli Məclisin sədri Oqtay Əsədovun rəhbərliyi ilə Tehranda səfərdə olan Azərbaycanın parlament nümayəndə heyəti fevralın 21-də İran Prezidenti Mahmud Əhmədinejad ilə görüşüb. Prezident Mahmud Əhmədinejad son illər İran ilə Azəraycan arasında əlaqələrin sürətlə inkişaf etməsinin əhəmiyyətindən danışıb. Oqtay Əsədov yüksək qonaqpərvərliyə və mehriban münasibətə görə nümayəndə heyəti adından təşəkkürünü bildirib, Azərbaycan Respublikasının Prezidenti İlham Əliyevin salamlarını Mahmud Əhmədinejada çatdırıb. Xoş sözlərə görə dərin ehtiramını ifadə edən İran Prezidenti onun da səmimi salamlarını Prezident İlham Əliyevə və dost Azərbaycan xalqına çatdırmağı xahiş edib. Görüşdə Ermənistan-Azərbaycan, Dağlıq Qarabağ münaqişəsinin həlli istiqamətində aparılan sülh danışıqları, regional proseslər, Azərbaycan ilə İran arasında iqtisadi, mədəni və humanitar əlaqələrin genişləndirilməsi yolları və digər məsələlər barədə müzakirələr aparılıb. Ermənistan hərbi biləşmələrinin işğal etdikləri Azərbaycan torpaqlarının azad edilməsinin regionda uzunmüddətli sülhün və sabitliyin yaranmasına təsir edən başlıca amil olduğunu diqqətə çatdıran Oqtay Əsədov qeyd edib ki, münaqişə üç yolla nizamlana bilər. Birinci yol beynəlxalq təşkilatların səyi nəticəsində beynəlxalq hüquq normalarının tətbiqidir. İkinci iqtisadi təsir vasitəsidir və region dövlətləri bu sahədə geniş imkanlara malikdirlər. Sonuncu isə məsələnin güc yolu ilə həll edilməsidir. Azərbaycan münaqişənin sülh yolu ilə həllinə tərəfdardır və bu istiqamətdə səylərini davam etdirməkdədir.
İranda səfərdə olan Azərbaycan Respublikası Milli Məclisinin sədri Oqtay Əsədov fevralın 21-də İranın xarici işlər naziri Mənuçehr Mottəki ilə görüşüb. M.Mottəki bildirib ki, Azərbaycan ilə İran arasında münasibətlər bütün sahələrdə inkişaf edəcək. O.Əsədov deyib ki, Azərbaycan-İran əlaqələrinin daha sürətli inkişafı üçün mövcud imkanlardan səmərəli istifadə olunmalıdır. Görüşdə, Ermənistan-Azərbaycan, Dağlıq Qarabağ münaqişəsinin nizamlanması istiqamətində aparılan sülh danışıqları, regional məsələlər, ölkələrimiz arasında iqtisadi, mədəni və humanitar sahələrdə əməkdaşlığın genişləndirilməsi və digər məsələlər ətrafında fikir mübadiləsi aparılıb.
Milli Məclisin sədri Oqtay Əsədovun rəhbərliyi ilə Tehranda səfərdə olan nümayəndə heyəti fevralın 21-də Azərbaycan Respublikasının İrandakı səfirliyində olub. Nümayəndə heyəti ümummilli lider Heydər Əliyevin səfirlikdəki büstü önünə əklil qoyub, Ulu öndərimizin həyat və fəaliyyətini əks etdirən guşə ilə də tanış olub.
Milli Məclisin sədri Oqtay Əsədovun rəhbərliyi ilə İranda səfərdə olan Azərbaycan parlamentinin nümayəndə heyəti dünən Təbriz şəhərinə gəlib. Nümayəndə heyəti Təbrizdə İranın Şərqi Azərbaycan vilayətinin başçısı Əhməd Əlirza Beygi ilə görüşüb. Görüşdə Azərbaycan-İran əlaqələrinin daha da möhkəmləndirilməsi, eyni zamanda, həmsərhəd bölgələrdə iqtisadi, ticarət və mədəni əlaqələrin genişləndirilməsi imkanlarına dair fikir mübadiləsi aparılıb. Bununla da, Milli Məclisin sədrinin İrana səfəri başa çatıb.

Paylaş:

Baxılıb: 1311 dəfə