Azərbaycanda əhalinin rifahının daha da yüksəldilməsinə xidmət edən sosial siyasət ardıcıl xarakter daşıyır

Bakı:

25 °C

54 %

3 m/s

AZ RU EN

Ana səhifə / Siyasət / Azərbaycanda əhalinin rifahının daha da yüksəldilməsinə xidmət edən sosial siyasət ardıcıl xarakter daşıyır

Azərbaycanda əhalinin rifahının daha da yüksəldilməsinə xidmət edən sosial siyasət ardıcıl xarakter daşıyır

15.04.2020 [10:29]

Prezident İlham Əliyevin imzaladığı müvafiq Sərəncam xüsusi karantin rejimi dövründə vətəndaşlara sosial xidmətlərin səmərəli təşkilinə xidmət edən şəxslərə, ümumiyyətlə, sosial xidmət işçilərinin əməyinə verilən yüksək dəyərin və onlara dövlət qayğısının ifadəsidir

Sosial dövlət olan Azərbaycanda koronavirus pandemiyası səbəbindən yaranan indiki şəraitdə insanların gəlir imkanlarının təmin edilməsi, iş yerlərinin qorunması və bu qəbildən olan digər mühüm məsələlər aidiyyatı dövlət və özəl qurumların qarşısına xüsusi vəzifə kimi qoyulub. Respublikamızda əhalinin müəyyən qruplarına, o cümlədən də ahıl və tənha yaşayan yaşlı insanlara isə daha həssas yanaşma sərgilənir və onlara dövlət qayğısının miqyası getdikcə genişləndirilir. Prezident İlham Əliyev ölkəmizdə yeni növ koronavirus (COVİD - 19) infeksiyasına ilk yoluxma faktı qeydə alınandan etibarən pandemiyanın mənfi təsirlərinə məruz qalan insanların sosial müdafiəsinin təmin edilməsini hədəfləyən çoxsaylı sənədlər imzalayıb. Bəhs olunan sənədlərə əsasən respublikamızda pandemiyanın sosial sferaya mənfi təsirlərinin qarşısının qabaqcadan alınması məqsədilə zəruri tədbirlərin həyata keçirilməsi nəzərdə tutulub və bu istiqamətdə müvafiq addımlar atılır.

Bu məqamda vurğulamaq yerinə düşər ki, ölkəmizdə əhalinin sosial müdafiəsinin gücləndirilməsi istiqamətində tədbirlər davam etdirilir. Azərbaycan Respublikasının Prezidenti İlham Əliyev 14 aprel 2020-ci il tarixində “Xüsusi karantin rejimi dövründə sosial xidmətlər göstərilməsində iştirak edən işçilərin sosial müdafiəsinin gücləndirilməsi haqqında” müvafiq Sərəncam imzalayıb. Bəhs olunan Sərəncam xüsusi karantin rejimi dövründə vətəndaşlara sosial xidmətlərin səmərəli təşkilinə xidmət edən şəxslərə, ümumiyyətlə, sosial xidmət işçilərinin əməyinə verilən yüksək dəyərin və onlara dövlət qayğısının ifadəsidir.

Məlum olduğu kimi, pandemiya səbəbindən respublikamızda tətbiq edilən karantin rejimi ilə əlaqədar ciddi sosial təcridetmə tədbirləri görülür. Bu tədbirlərin görülməsində əsas məqsəd pandemiyanın ölkə ərazisində daha geniş miqyasda yayılmasının qarşısını almaq və insanların həyatını xilas etməkdən ibarətdir. Təsadüfi deyildir ki, Prezident İlham Əliyevin bilavasitə rəhbərliyi ilə reallaşdırılan operativ tədbirlər ölkə vətəndaşları tərəfindən rəğbətlə qarşılanır. O cümlədən karantin rejiminin davam etdiyi dövrdə ahıl və tənha yaşayan yaşlı insanlara qayğının ifadəsi olaraq onlara yaşadıqları ünvanlarda sosial xidmətlər təşkil edilib. Bəhs olunan Sərəncamda koronavirus pandemiyasına qarşı mübarizə sahəsində ölkədə elan edilmiş xüsusi karantin rejimi dövründə sosial xidmətlər göstərilməsinə cəlb edilən Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) rayon (şəhər) şöbələrində və tabeliyindəki sosial xidmət müəssisələrində çalışan işçilərin əməkhaqlarına aylıq vəzifə (tarif) maaşının bir misli miqdarında müddətli əlavə müəyyən edilməsi nəzərdə tutulur. Sərəncam DSMF-nin rayon (şəhər) şöbələrindəki 1400 və Fondun tabeliyindəki sosial xidmət müəssisələrində çalışan 600 nəfəri, ümumilikdə isə, 2 min sosial xidmət işçisini əhatə edir.

Qeyd edək ki, xüsusi karantin rejimi dövründə yaşı 65-dən yuxarı şəxslərin pandemiyadan qorunması məqsədilə sosial xidmət işçiləri səfərbər edilib, gücləndirilmiş iş rejimi şəraitində həmin kateqoriyadan olan inasnlar evlərində gündəlik sosial xidmətlərlə təmin olunurlar. Hazırda 15 mindən çox tənha yaşlıya evlərində sosial xidmətlər (ev təsərrüfatı ilə bağlı işlərdə, əsas tələbat mallarının, dərman vasitələrinin alınmasında, kommunal ödənişlərin edilməsində və s.) göstərilir. DSMF-nin 9 sosial xidmət müəssisəsində isə 1000-dən çox şəxs stasionar şəraitdə reabilitasiyayönümlü sosial xidmətlərlə təmin olunurlar.

Əhalinin sağlamlığının və təhlükəsizliyinin qorunması məqsədilə respublikamızda qlobal pandemiyanın yayılmasının qarşısının alınması ilə bağlı ölkə Prezidenti cənab İlham Əliyevin rəhbərliyi ilə zəruri preventiv və profilaktik işlər aparılır, karantin rejiminin elan olunması ilə əlaqədar həssas əhali qruplarının qayğıları xüsusilə diqqətdə saxlanılaraq onların sosial ehtiyaclarının ödənilməsi istiqamətində lazımi tədbirlər görülür. Eyni zamanda, ölkə ictimaiyyəti, ayrı-ayrı dövlət və özəl təşkilatlar koronavirus infeksiyası ilə mübarizə tədbirlərində sosial həmrəylik nümayiş etdirir, dövlət başçısının və Azərbaycanın Birinci vitse-prezidenti Mehriban xanım Əliyevanın azərbaycanlıların hər zaman, xüsusilə çətin anlarda bir-birilərinə, böyüklərimizə mərhəmətlə, qayğı və həssaslıqla yanaşılması ilə bağlı çağırışlarına qoşularaq aztəminatlı ailələrə, ahıl və tənha vətəndaşlara baş çəkir, onların zəruri ehtiyaclarının qarşılanmasında köməkliklərini əsirgəmirlər.

Nəticə etibarilə, Azərbaycanda həyata keçirilən uğurlu sosial siyasət əhalinin bütün təbəqələrini əhatə edir, insanların rifahının daha da yüksəldilməsinə xidmət edən məqsədyönlü tədbirlər ardıcıl xarakter daşıyır.

Mübariz ABDULLAYEV

Paylaş:

Baxılıb: 417 dəfə