DTXK-da 2009-cu ilin yekunları müzakirə olunub

Bakı:

15 °C

72 %

11 m/s

Əlaqə

AZ RU EN

Ana səhifə / Siyasət / DTXK-da 2009-cu ilin yekunları müzakirə olunub

DTXK-da 2009-cu ilin yekunları müzakirə olunub

03.02.2010 [09:17]

Qərib Məmmədov: Möhtərəm Prezident İlham Əliyevin xüsusi qayğısı nəticəsində aqrar sektorda dinamik inkişaf müşahidə edilir
Dövlət Torpaq və Xəritəçəkmə Komitəsində (DTXK) 2009-cu ilin yekunları barədə kollegiya iclası keçirilib. İclasda 2009-cu ildə görülmüş və 2010-cu ildə görülməsi nəzərdə tutulmuş işlər, əsas istiqamətlər və vəzifələr barədə geniş məlumat verilib. Tədbiri giriş nitqi ilə açan DTXK-nın sədri Qərib Məmmədov qeyd edib ki, möhtərəm Prezident İlham Əliyevin rəhbərliyi ilə Komitənin üzərinə qoyulmuş mühüm dövlət vəzifələrinin icrası ölkəmizdə aqrar sektorun inkişafına layiqli töfhələr verib: “Heç şübhəsiz, ölkəmizdə uğurla həyata keçirilən iqtisadi siyasətin tənzimlənməsində əsas istehsal vasitəsi olaraq torpaqla bağlı siyasətin böyük rolu var, bundan sonra da bu siyasətin düzgün və səmərəli şəkildə tənzimlənməsi sahəsində qanunvericiliklə müəyyən edilmiş səlahiyyətləri çərçivəsində Dövlət Torpaq və Xəritəçəkmə Komitəsinin üzərinə təxirəsalınmaz vəzifələr qoyulmuşdur”.
Daha sonra Q.Məmmədov həyətyanı torpaqların sənədləşdirilməsi, “Torpaqlardan səmərəli istifadə olunması və mühafizəsinə dövlət nəzarəti” proqramı çərçivəsində görülən işlər, torpaq bazarında tənzimləmə işinin həyata keçirilməsi, bir sıra sahələrdə xüsusi dövlət tapşırıqlarının yerinə yetirilməsi və digər istiqamətlər barədə mühüm məqamları diqqətə çatdırıb. DTXK-nın sədri bildirib ki, bu ilin “Ekologiya ili” elan olunması ilə bağlı torpaqların ekoloji qiymətləndirmə işləri davam etdirilməli və bu işlərin nəticələrindən irəli gələn aidiyyətı icra hakimiyyəti orqanları ilə qarşılıqlı əməkdaşlıq işləri daha da gücləndirilməlidir: “Cənab Prezident İlham Əliyevin təşəbbüsü ilə 2010-cu il ölkəmizdə “Ekologiya ili” elan olunub və bu istiqamətdə zəruri tədbirlər həyata keçirilir. ümumiyyətlə isə, torpaqların ekologiyası sahəsində 2009-cu il də daxil olmaqla, respublikanın vahid torpaq fondunun 15 rayonunun (Şəmkir, Xızı, Qax, Ağdaş, Dəvəçi, Qusar, Siyəzən, Neftçala, Zaqatala, Salyan, Quba və Ucar) inzibati ərazisində mülkiyyət növlərindən asılı olmayaraq torpaq tədqiqatı işləri aparılıb”.
“Azərbaycan Respublikası regionlarının 2009-2013-cü illərdə sosial-iqtisadi inkişafı üzrə Dövlət Proqramı” yönündə respublika üzrə görülməsi nəzərdə tutulan ümumi tədbirlər çərçivəsində torpaq islahatlarının davam etdirilməsi məsələsinə toxunan Komitə sədri qeyd edib: “Torpaqların məhsuldarlığının artırılması, onların eroziyasının, şorlaşma və şorakətləşməsinin qarşısının alınması məqsədilə torpaq və geobotaniki tədqiqat işlərinin aparılması və Bakı şəhəri üzrə vətəndaşların qanuni istifadəsindəki torpaqların kadastr sənədlərinin hazırlanması Komitənin üzərinə vəzifə kimi qoyulub”.
“2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı”nın reallaşdırılması üzrə Komitəyə xüsusi tapşırıqların verildiyini vurğulayan Q.Məmmədov qeyd edib ki, hər iki proqram üzrə nəzərdə tutulan tədbirlər Komitə tərəfindən yerinə yetirilir və müvafiq hesabatlar ümumiləşdirilməsi üçün İqtisadi İnkişaf Nazirliyinə və digər aidiyyətı orqanlara təqdim edilir: “Belə ki, 34 rayonda torpaqların texniki uçotunun, 19 rayonda torpaqların bonitirovkasının və 36 rayonda torpaqların iqtisadi qiymətləndirilməsinin elektron variantda işlənilib xəritələşdirilməsi üzrə işlər aparılıb”.
Daha sonra DTXK-nın sədri bildirib ki, Dünya Bankının vəsaiti ilə “Azərbaycan Respublikasında Daşınmaz Əmlakın Qeydiyyatı layihəsi” uğurla reallaşdırılmaqdadır: “Peyk çəkilişi əsasında hazırlanması nəzərdə tutulmuş ortofoto xəritələrin həm peyk çəkilişi materialları, həm də emal materialları 80 faiz həcmində tamamlanıb”.
Bundan başqa, Q.Məmmədov Koreya Respublikasının maliyyə dəstəyi ilə həyata keçirilən “Azərbaycan Torpaq Kadastrı Sisteminin təkmilləşdirilməsi layihəsi” haqqında geniş məlumat verib: “Layihədə Azərbaycanda şəhər kadastrı nümunəsində torpaq kadastrı sisteminin təkmilləşdirilməsi, Dövlət Torpaq və Xəritəçəkmə Komitəsinin Dövlət Torpaq Kadastrı və Monitorinqi Mərkəzi ilə birgə Azərbaycan Respublikasının Bakı şəhərinin Əzizbəyov rayonunun Zirə ərazisində 1000 hektar sahədə pilot şəhər kadastrı layihəsinin həyata keçirilməsi və müasir kadastr sisteminin yaradılması, habelə, torpaq kadastrı üçün münasib metodologiyanın öyrənilməsi və tətbiqi, işçilərin potensialının gücləndirilməsi nəzərdə tutulub. Layihə Koreyanın Beynəlxalq Əməkdaşlıq Agentliyi (KOCİA) tərəfindən ayrılmış 1,5 milyon ABŞ dolları məbləğində qrant hesabına 18 ay ərzində həyata keçiriləcək. Layihə üzrə işlərə 21 sentyabr 2009-cu il tarixində başlanılıb”.
Bunlarla yanaşı, Q.Məmmədov torpaq bazarında ümumi işin tənzimlənməsi yönündə görülən işlərə də diqqəti çəkib: “2009-cu ildə qısa müddətdə tərkibi bələdiyyə şurası sədrlərindən, ictimaiyyət nümayəndəsindən, yerli icra hakimiyyətlərinin, həmçinin, 2 nəfər Komitənin rayon və şəhər şöbələrinin nümayəndələrindən ibarət komissiyalar formalaşdırıldı. Eləcə də, komissiyaların səlahiyyətləri ilə bağlı sənəd nümunələri hazırlanaraq təsdiq edildi və hesabat ilində respublikanın ayrı-ayrı bələdiyyələri üzrə 749 hərrac və müsabiqə təşkil olundu”.
Qərib Məmmədov qeyd edib ki, “Torpaqlardan səmərəli istifadə olunması və mühafizəsinə dövlət nəzarəti” proqramının reallaşdırılması yönündə bir sıra qanunazidd hallara rast gəlinib və bu hallarla ciddi mübarizə aparılır: “2009-cu ildə dövlət, bələdiyyə və xüsusi mülkiyyətdə olan torpaqlar üzrə 1160 torpaq qanunvericiliyinin tələblərinin pozulması halı aşkar edilib. Bunlardan 702 hal xəbərdarlıq-bildiriş verilməklə aradan qaldırılıb, 458 hal ilə bağlı məsələ isə inzibati qaydada sənədləşdirilərək cərimə tətbiq edilib. Bildiririk ki, torpaq qanunvericiliyinin tələblərini pozanlardan 1149-u fiziki, 4-ü hüquqi və 7-i vəzifəli şəxslərdir”.
Nurlan QƏLƏNDƏROV

Paylaş:

Baxılıb: 1156 dəfə