Hikmət Babaoğlu: Prezident İlham Əliyevin Soçidəki bəyanatı işğalçı ölkənin başı üstündə ildırım kimi çaxdı

Bakı:

18 °C

50 %

1 m/s

AZ RU EN

Ana səhifə / Siyasət / Hikmət Babaoğlu: Prezident İlham Əliyevin Soçidəki bəyanatı işğalçı ölkənin başı üstündə ildırım kimi çaxdı

Hikmət Babaoğlu: Prezident İlham Əliyevin Soçidəki bəyanatı işğalçı ölkənin başı üstündə ildırım kimi çaxdı

05.10.2019 [09:54]

Azərbaycan Prezidenti İlham Əliyevin Soçidə keçirilən “Valday” Diskussiya Klubunda iştirakı və orada etdiyi çıxış olduqca maraqla qarşılandı və mühüm siyasi ismarıclarla yadda qaldı. Hər şeydən öncə qeyd etmək lazımdır ki, “Valday” Diskussiya Klubu dünyanın aparıcı beyin mərkəzlərindən biri olmaqla qlobal və regional kontekstdə ən aktual məsələlərin müzakirə olunduğu platformadır.
Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib. Deputat qeyd edib ki, budəfəki tədbirdə dünyanın 40-a yaxın ölkəsindən çoxsaylı dövlət xadimləri, nüfuzlu ictimai xadimlər və media nümayəndələri iştirak edirdilər. Belə mühüm bir platformada Azərbaycan Prezidentinin səsləndirdiyi fikirlər ölkəmiz barədə həqiqətlərin bir daha yeni rakursdan dünyaya çatdırılması idi. Prezident İlham Əliyev, ilk növbədə, Ermənistanın baş naziri Nikol Paşinyana və onun sərsəm bəyanatlarına elə qətiyyətli və tutarlı cavab verdi ki, bu, işğalçı ölkənin başı üstündə ildırım kimi çaxdı. Nəzərə almaq lazımdır ki, işğalçı ölkəyə məhz Rusiya Federasiyasından “Valday” Diskussiya Klubu kimi nüfuzlu platformanın tribunasından cavab verilməsinin özü olduqca ciddi bir ismarıcdır. Prezident İlham Əliyev “Dağlıq Qarabağ xalqı” kimi təxribatçı ifadələrə də cavab verərək bildirib ki, bu, kökündən yanlış ifadədədir, Dağlıq Qarabağın əhalisi var və bu, azərbaycanlı və erməni icmasından ibarətdir. Prezident bir daha bəyan etdi ki, problem BMT Təhlükəsizlik Şurasının məlum qətnamələri, Helsinki Yekun Aktının prinsipləri və Azərbaycanın ərazi bütövlüyü çərçivəsində həll olunmalıdır. Bu qətiyyətli mövqe bir daha Azərbaycanın mövqeyinin dünya ictimaiyyətinə çatdırılması idi. Rusiya-Azərbaycan münasibətlərinə gəldikdə isə qeyd etmək lazımdır ki, hazırkı mürəkkəb beynəlxalq münasibətlər şəraitində Rusiya-Azərbaycan münasibətləri hər iki ölkənin maraqları kontekstində mühüm əhəmiyyət kəsb edir.
Milli Məclisin deputatı əlavə edib ki, Azərbaycan Prezidenti İlham Əliyevin Rusiya Federasiyasına baş tutan işgüzar səfəri və Soçidə Vladimir Putinlə keçirdiyi görüşdə müzakirə olunan məsələlər bir daha ondan xəbər verir ki, bu münasibətlərin strateji müttəfiqlik səviyyəsində olması iki ölkənin maraqlarına tamamilə uyğundur. Təsadüfi deyil ki, Azərbaycan Prezidenti iki ölkə arasında münasibətlərdən danışarkən bildirib ki, prezidentlər arasında keçirilən belə görüşlər strateji tərəfdaşlıq münasibətlərinin inkişafına təkan verir.
Deputat vurğulayıb ki, Azərbaycan üçün Rusiya ən mühüm tərəfdaş, dost, mehriban qonşudur. Əlbəttə, münasibətlərin belə yüksək səviyyəsi hazırda mövcud olan mürəkkəb geostrateji çağırışlar kontekstində iki dost və qonşu ölkənin təhlükəsizlik maraqları baxımından da aktualdır. Ona görə də tərəflər arasında “yol xəritəsi”nin reallaşdırılması bu münasibətlərə yeni stimul verir.
“Prezident İlham Əliyev “Valday” klubunun fəaliyyətini də yüksək qiymətləndirərək onu dünyanın ən mühüm məsələlərinin müzakirə olunduğu platforma kimi qiymətləndirib. Doğurdan da qlobal çağırışlar kontekstində bu klubun fəaliyyəti dünya siyasətinə yeni rakursdan baxmağa imkan yaradan bəlkə də yeganə intellektual platformadır. Ona görə də bu səfər iki ölkə arasında strateji müttəfiqlik səviyyəsində qiymətləndirilən münasibətlərin perspektivləri baxımından da olduqca önəmlidir”, - deyə Hikmət Babaoğlu əlavə edib.

Paylaş:

Baxılıb: 513 dəfə