Azərbaycan Ermənistanın Dağlıq Qarabağ münaqişəsinin həlli ilə bağlı danışıqlar prosesini pozmaq cəhdlərinə imkan vermədi

Bakı:

25 °C

60 %

4 m/s

AZ RU EN

Ana səhifə / Siyasət / Azərbaycan Ermənistanın Dağlıq Qarabağ münaqişəsinin həlli ilə bağlı danışıqlar prosesini pozmaq cəhdlərinə imkan vermədi

Azərbaycan Ermənistanın Dağlıq Qarabağ münaqişəsinin həlli ilə bağlı danışıqlar prosesini pozmaq cəhdlərinə imkan vermədi

28.03.2019 [09:34]

Rəsmi Bakının hərbi, siyasi və diplomatik cəbhədə atdığı addımlar Ermənistanı yenidən danışıqlar masasına qayıtmağa məcbur etmiş oldu
Milli maraqlara əsaslanan müstəqil xarici siyasət kursuna malik olan Azərbaycanın müasir beynəlxalq münasibətlər sistemində mövqeyi mütəmadi olaraq möhkəmlənir. Prezident İlham Əliyevin rəhbərliyi ilə həyata keçirilən çoxvektorlu və praqmatik xarici siyasət sayəsində ölkəmiz həm ikitərəfli münasibətləri, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirir. Hazırda regional güc mərkəzi olan, bölgədə sabitləşdirici aktor kimi çıxış edən Azərbaycan müasir beynəlxalq münasibətlər sistemində etibarlı tərəfdaş kimi tanınır və dünyada böyük etimad qazanıb.
Şübhəsiz ki, Azərbaycanın xarici siyasət kursunun ən mühüm strateji prioriteti Ermənistan-Azərbaycan Dağlıq Qarabağ münaqişəsinin beynəlxalq hüquq normaları əsasında, yəni ölkəmizin ərazi bütövlüyü çərçivəsində həllidir. Ölkəmiz bu istiqamətdə qətiyyətli mövqe nümayiş etdirir. Bu mövqe ondan ibarətdir ki, Dağlıq Qarabağ münaqişəsi yalnız Azərbaycanın ərazi bütövlüyü çərçivəsində, BMT Təhlükəsizlik Şurasının müvafiq qətnamələri əsasında öz həllini tapmalıdır. O da həqiqətdir ki, Azərbaycanın həyata keçirdiyi milli maraqlara əsaslanan siyasət və hücum diplomatiyası bölgədə yeni reallığın yaranmasına səbəb olub. Prezident İlham Əliyevin həyata keçirdiyi siyasətin yaratdığı yeni reallıq Ermənistan-Azərbaycan Dağlıq Qarabağ münaqişəsinin ölkəmizin milli maraqları çərçivəsində, beynəlxalq hüququn norma və prinsipləri əsasında həllinə tam zəmin formalaşdırıb. Digər tərəfdən, Azərbaycanın qətiyyətli mövqeyinin fonunda beynəlxalq müstəvidə Dağlıq Qarabağ münaqişəsinin beynəlxalq hüquq normalarına əsasən həllinin zəruriliyi bəyan edilir. Yəni münaqişənin həlli ilə bağlı Azərbaycanın ədalətli və haqlı mövqeyi dəstəklənir, bu mövqe ardıcıl olaraq daha da güclənir. Son zamanlar müxtəlif səviyyələrdə səsləndirilən bəyanatlar, qəbul edilmiş sənədlər də Azərbaycanın haqlı və ədalətli mövqeyinin dəstəklənməsinin əyani ifadəsidir.
Bütün bunlara baxmayaraq, Ermənistanın qeyri-konstruktiv mövqe ilə danışıqlar prosesini pozmağa hesablanmış addımlar atması heç kəsə sirr deyil. Bu ölkə tərəfindən zaman-zaman danışıqların formatının dəyişdirilməsi ilə bağlı absurd iddiaların ortaya atılması məhz bu məqsədə xidmət edir. Ermənistanın yeni rəhbərliyi indiyə qədər müxtəlif formalarda Dağlıq Qarabağ münaqişəsinin həlli ilə bağlı ziddiyyətli bəyanatlar səsləndirib, bu məsələ ilə əlaqədar beynəlxalq qanunvericiliyin tələblərinə uyğun olmayan çıxışlar edib. Xüsusi vurğulamaq gərəkdir ki, Azərbaycan Prezidenti İlham Əliyev ATƏT-in fəaliyyətdə olan sədri və Avropa İttifaqı rəsmiləri ilə son görüşlərdə bu məsələ ilə bağlı ciddi narahatlığını ifadə etdi. Bundan dərhal sonra həmsədrlər bəyanatla çıxış etdilər. ATƏT-in Minsk qrupu həmsədrlərinin bəyanatında bildirildi ki, danışıqların formatı dəyişdirilə bilməz və danışıqlar Helsinki Yekun aktında nəzərdə tutulan prinsiplərə söykənir. Yəni xalqların öz müqəddəratını təyinetmə hüququ dövlətlərin ərazi bütövlüyünü təhdid edə bilməz. Əlbəttə, ATƏT-in Minsk qrupu həmsədrlərinin bəyanatı Paşinyanın populist siyasətinin iflasa uğradığını göstərdi. Bir daha bəlli oldu ki, münaqişənin həlli üzrə danışıqlar Ermənistan və Azərbaycan arasında aparılır, danışıqların formatının dəyişdirilməsinə dair səsləndirilən absurd iddialar qəbuledilməzdir.
Yeri gəlmişkən, Xarici İşlər Nazirliyinin mətbuat xidmətinin məlumatına əsasən, ATƏT-in Minsk qrupunun həmsədrlərinin təklifi əsasında Azərbaycan Respublikasının Prezidenti İlham Əliyevin və Ermənistan Respublikasının baş naziri Nikol Paşinyanın Ermənistan-Azərbaycan Dağlıq Qarabağ münaqişəsinin həlli üzrə müzakirələr aparmaq məqsədilə martın 29-da Avstriyanın paytaxtı Vyana şəhərində görüşünün keçirilməsi barədə razılıq əldə olunub. Bu isə həm də ona dəlalət edir ki, Azərbaycan Ermənistanı danışıqlar masasına qayıtmağa məcbur etmiş oldu. Başqa sözlə, Ermənistanın məsuliyyətdən yayınmaq və danışıqlar prosesini pozmaq cəhdləri baş tutmadı.
Ümumiyyətlə, Azərbaycan Dağlıq Qarabağ münaqişəsinin həlli ilə bağlı substantiv danışıqların aparılmasında israrlıdır. Bu gün Ermənistan da yaxşı bilir ki, Azərbaycan işğalçı ölkənin status-kvonu legitimləşdirmək cəhdlərinə heç vaxt imkan verməyəcək. Hər şeydən əvvəl, ölkəmiz öz iqtisadi və hərbi qüdrətinə, yüksək beynəlxalq nüfuzuna güvənir. Azərbaycan öz ərazi bütövlüyünü təmin etmək qüdrətindədir. Bütövlükdə isə, rəsmi Bakının hərbi, siyasi və diplomatik cəbhədə atdığı addımlar Ermənistanı yenidən danışıqlar masasına qayıtmağa məcbur etdi.
Nurlan QƏLƏNDƏRLİ

Paylaş:

Baxılıb: 548 dəfə