Hikmət Babaoğlu: Prezident İlham Əliyev iftar mərasimindəki nitqində bir sıra mühüm mesajlar verdi

Bakı:

28 °C

34 %

6 m/s

AZ RU EN

Ana səhifə / Siyasət / Hikmət Babaoğlu: Prezident İlham Əliyev iftar mərasimindəki nitqində bir sıra mühüm mesajlar verdi

Hikmət Babaoğlu: Prezident İlham Əliyev iftar mərasimindəki nitqində bir sıra mühüm mesajlar verdi

08.06.2018 [09:03]

Prezident İlham Əliyev müqəddəs Ramazan ayı münasibətilə təşkil olunmuş iftar mərasimindəki nitqində bir sıra mühüm mesajlar verdi. Əgər bunların bir hissəsi sosial-iqtisadi və sosial-mənəvi xarakterli idisə, digər mühüm hissəsi hazırkı beynəlxalq münasibətlər şəraitində yeni siyasi reallıqlar və onların perspektivləri ilə bağlı idi. Bu kontekstdə Prezident Ermənistan-Azərbaycan, Dağlıq Qarabağ probleminin həlli məsələsini önə çəkərək dünya ictimaiyyətinə, o cümlədən Ermənistana, problemi həll etmək üçün öhdəlik götürmüş beynəlxalq və regional təşkilatlara mesajlar verdi, Azərbaycanın prinsipial mövqeyi ilə bağlı fikirlərini bildirdi.
Bu sözləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib.
Hikmət Babaoğlu qeyd edib ki, beynəlxalq münasibətlər sisteminin ən yeni tarixi mərhələsində xeyli dərəcədə strateji keyfiyyət dəyişiklikləri baş verib. Yeni dünya nizamına doğru mühüm addımlar atılıb. Bu proses dinamikdir və multipolyar dünya nizamı üçün yaxşı perspektivlər yaradır. Azərbaycan bu prosesdə daim ərazi bütövlüyümüzün bərpası məqsədini prioritet kimi müəyyənləşdirərək özünə yeni müttəfiqlər qazanmaqla Ermənistanın ənənəvi şimal və cənub müttəfiqlərini də öz tərəfinə çəkməyi bacarıb. Bununla paralel olaraq, beynəlxalq təşkilatlarla və beynəlxalq ictimai rəylə də xüsusi işlər aparılıb və ümumi mövqe lehimizə dəyişib. Azərbaycan Ermənistanı idarə edən hərbi xunta diktaturasını ifşa edə bilib. Ona görə də Prezident İlham Əliyev Öz nitqində dedi ki, Onun illər ərzində dediyi sözləri indi erməni xalqı deyir. Prezident İlham Əliyev bildirdi ki, Ermənistanda iqtisadi böhran, demoqrafik böhran yaşanır, ölkə boşalır, hər il on minlərlə insan ölkəni həmişəlik tərk edir, Ermənistanda inkişaf üçün heç bir perspektiv yoxdur. Azərbaycan Ermənistanı iqtisadi, siyasi, nəqliyyat dalanına çevirib.
“Göründüyü kimi, Azərbaycanın artan hərbi-siyasi gücü, qətiyyəti regionda mühüm keyfiyyət dəyişikliyi yaradıb, hərbi-siyasi və iqtisadi güc balansı tamamilə ölkəmizin xeyrinə dəyişib. Bu isə problemin həllini diktə edir, çünki aclıq və səfalət içərisində yaşayan Ermənistan Azərbaycanın torpaqlarını uzun müddət işğal altında saxlaya bilməz. Prezident İlham Əliyev məhz bu reallıqlardan çıxış edərək Ermənistanın yeni hakimiyyətinə çağırış etdi və dedi: “Ümid edirəm ki, Ermənistanın yeni rəhbərliyi əvvəlki hakimiyyətin səhvlərini təkrarlamayacaq və münaqişənin tezliklə həll olunması üçün ciddi işlər görəcək və imitasiya naminə yox, real danışıqlar prosesinə start veriləcək.
Beləliklə, məsələ öz həllini tapa bilər və Qafqaza sülh gələ bilər. Biz bunu istəyirik, biz münaqişənin həllini tələb edirik, bizim buna haqqımız çatır. Ümid edirik ki, bu məsələ danışıqlar yolu ilə tezliklə öz həllini tapa bilər”. Bu fikirlərin bir qədər daha qlobal şərhi belə nəticəyə gəlməyə imkan verir ki, Dağlıq Qarabağ probleminin həlli bütövlükdə Qafqaza sülh və əmin-amanlıq gətirə bilər. Bu da həm Cənubi Qafqaz üçün rifah və sabitlik, həm də regionda strateji marağı olan ölkələr üçün yeni əməkdaşlıq perspektivləri deməkdir”, - deyə Milli Məclisin deputatı bildirib.

Paylaş:

Baxılıb: 624 dəfə