Vüqar Rəhimzadə: ATƏT DTİHB-nin qərəzli hesabatı Azərbaycanın uğurlarını gözü götürməyən bəzi dairələrin sifarişi ilə hazırlanıb

Bakı:

19 °C

58 %

6 m/s

AZ RU EN

Ana səhifə / Siyasət / Vüqar Rəhimzadə: ATƏT DTİHB-nin qərəzli hesabatı Azərbaycanın uğurlarını gözü götürməyən bəzi dairələrin sifarişi ilə hazırlanıb

Vüqar Rəhimzadə: ATƏT DTİHB-nin qərəzli hesabatı Azərbaycanın uğurlarını gözü götürməyən bəzi dairələrin sifarişi ilə hazırlanıb

13.04.2018 [09:58]

Bu gün Azərbaycanda insan hüquq və azadlıqlarının əsas tərkib hissəsi olan vətəndaşların seçki hüququ ən yüksək səviyyədə təmin olunub. Ölkəmizdə keçirilən bütün seçkilərdə biz bunu müşahidə edirik. Bütün texniki imkanlar ən yüksək səviyyədə təmin edilir və insanlar sərbəst, azad şəkildə səs verirlər. Bu mənada aprelin 11-də keçirilmiş prezident seçkiləri ölkəmizin demokratik inkişaf yolunda növbəti uğurudur. Ölkə əhalisinin 74,30 faizinin iştirak etdiyi səsvermədə seçicilərin 86,03 faiz səsini qazanan İlham Əliyev növbəti dəfə Prezident seçildi. Bununla da xalq ölkənin parlaq gələcəyinə səs vermiş oldu. Lakin bu uğuru həzm edə bilməyən bəzi dairələr qərəzli yanaşmaları ilə demokratik şəraitdə baş tutan seçkini ləkələməyə cəhd edirlər.
Bu fikirləri AZƏRTAC-a “İki sahil” qəzetinin baş redaktoru Vüqar Rəhimzadə bildirib.
Vüqar Rəhimzadə qeyd edib ki, ATƏT və AŞPA müşahidəçilərinin seçki ilə bağlı qərəzli hesabatları ölkəmizin uğurlarını gözü götürməyən bəzi dairələrin sifarişi əsasında hazırlanıb. ATƏT-in Demokratik Təsisatlar və İnsan Hüquqları Bürosu, ATƏT Parlament Assambleyası və Avropa Şurası Parlament Assambleyasının müşahidə missiyalarının ölkəmizdə keçirilən prezident seçkilərinin nəticələri ilə bağlı hazırladıqları hesabat ədalətsiz və qeyri-obyektivdir. Bu, onların ucuz və köhnə taktikasıdır. Bu cür təşkilatlar insan hüquq və azadlıqlarından bir vasitə kimi istifadə edərək müstəqil siyasət yürüdən ölkələrə qarşı təzyiq edir və öz qaranlıq maraqlarını həyata keçirməyə çalışırlar. Ölkəmiz müstəqillik tarixində zaman-zaman bu cür qərəzli münasibətlərlə rastlaşıb, ancaq demokratiya və müstəqillik yolundan dönməyib. Hesab edirəm ki, bu cür hesabatlar ölkəmizin daxili və xarici siyasi kursuna, eyni zamanda, dünyada artan nüfuzuna hansısa formada təsir edə bilməz.
“İki sahil” qəzetinin baş redaktoru qeyd edib ki, ATƏT və AŞPA-nın nümayəndələri ilə yanaşı, seçkiləri izləmək üçün ölkəmizə bir çox xarici dövlətlərin, həmçinin beynəlxalq təşkilatların müşahidəçiləri də gəlmişdilər. Onlar ölkə üzrə bir çox seçki məntəqələrində oldular və səsvermə prosesini canlı olaraq izlədilər. Bundan sonra sözügedən müşahidəçilərin hesabatlarında, eyni zamanda, nüfuzlu xarici KİV-lərdə səsvermənin demokratik, şəffaf şəkildə keçirilməsi ilə bağlı kifayət qədər müsbət, obyektiv fikirlər səsləndirildi. Təəssüf ki, ATƏT və AŞPA müşahidəçiləri yenə də bu uğurlara qara eynəkdən baxdılar, seçkilərin nəticələri ilə bağlı qərəzli fikirlər səsləndirdilər. Bu hesabatlar seçkidən əvvəl hazırlanıb və qeyri-obyektivlikdən başqa bir şeyi əks etdirmir.

Paylaş:

Baxılıb: 495 dəfə