"Azərbaycan mədəniyyəti və mədəni şedevrləri gələcək nəsillərə misilsiz ərməğandır"

Bakı:

18 °C

88 %

4 m/s

Əlaqə

AZ RU EN

Ana səhifə / Siyasət / "Azərbaycan mədəniyyəti və mədəni şedevrləri gələcək nəsillərə misilsiz ərməğandır"

"Azərbaycan mədəniyyəti və mədəni şedevrləri gələcək nəsillərə misilsiz ərməğandır"

26.08.2009 [01:24]

Azərbaycanın birinci xanımı, Heydər Əliyev Fondunun prezidenti Mehriban Əliyevanın çoxşaxəli fəaliyyətini əks etdirən kitabın rus dilində variantının təqdimat mərasimi keçirilib
Dünən M.F.Axundov adına Milli Kitabxanada Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın çoxşaxəli fəaliyyətini əks etdirən “Azərbaycan mədəniyyəti və mədəni şedevrləri gələcək nəsillərə misilsiz ərməğandır” kitabının rus dilində variantının təqdimat mərasimi keçirilib.
Mədəniyyət və Turizm Nazirliyinin layihəsi əsasında hazırlanmış kitabın təqdimat mərasimində Milli Məclisin deputatları, tanınmış ziyalılar, mədəniyyət və incəsənət xadimləri iştirak ediblər.
Kitab Mehriban xanım Əliyevanın mədəniyyətin, mədəni irsin qorunması və gələcək nəsillərə çatdırılması istiqamətində 1995-ci ildən 2009-cu ilədək həyata keçirdiyi böyük işləri və onun çoxşaxəli fəaliyyətini geniş şəkildə əks etdirir.
Mədəniyyət və turizm naziri Əbülfəs Qarayev mərasimdə çıxış edərək bildirib ki, “Azərbaycan mədəniyyəti və mədəni şedevrləri gələcək nəsillərə misilsiz ərməğandır” kitabı bu yaxınlarda təqdimatı keçirilmiş “Mədəniyyətimizin və mədəni incilərimizin hamisi” kitabının rus dilində variantıdır. Kitab yenidən işlənib və ona əlavələr edilib, məqalələrin bir çoxu ilk dəfə nəşr olunur. Həmçinin, kitabda Mehriban xanım Əliyevanın xeyirxah əməlləri, çıxışları, onun haqqında deyilən fikirlər də əksini tapıb.
Kitabda, eyni zamanda, Azərbaycanın birinci xanımının təşəbbüsü ilə onun rəhbərlik etdiyi Fond tərəfindən elm, ədəbiyyat, mədəniyyət, təhsil, səhiyyə və digər sahələrdə həyata keçirilən çox dəyərli layihələr haqqında ətraflı məlumatlar toplanıb.
Nazir deyib ki, Mehriban xanım Əliyeva bütün sahələrlə yanaşı, mədəniyyətimizin inkişaf etdirilməsi və dünyaya tanıtdırılması istiqamətində də mühüm işlər görüb. O, YUNESKO-nun və İSESKO-nun xoşməramlı səfiri kimi Azərbaycan mədəniyyəti incilərinin dünya qeyri-maddi mədəni irs siyahısına salınması kimi böyük uğurlara imza atıb. Hazırda bu istiqamətdə fəaliyyət davam etdirilir. Yaxın vaxtlarda Azərbaycanın aşıq musiqisi sənəti də YUNESKO-nun dünya qeyri-maddi mədəni irs siyahısına daxil ediləcək.
Rəngli fotoşəkillərlə zəngin olan bu dəyərli kitab ingilis dilinə də tərcümə olunacaq və yaxın vaxtlarda elektron variantda oxuculara təqdim ediləcək. Nəfis tərtibatla, yüksək poliqrafik keyfiyyətlə çap edilmiş kitab YUNESKO-nun baş direktoru Koişiro Matsuuranın Mehriban xanım Əliyevanın fəaliyyəti haqqında fikirləri ilə açılır.
Təqdimat mərasimində bildirilib ki, “çinar-çap” mətbəəsində 1000 nüsxə tirajla çap olunmuş 798 səhifəlik kitabda AzərTAc-ın materiallarından geniş istifadə edilib.
Tədbirdə AMEA-nın müxbir üzvü, Milli Məclisin Mədəniyyət komitəsinin sədri, Azərbaycanda Atatürk Mərkəzinin rəhbəri Nizami Cəfərov, Aşıqlar Birliyinin sədri, Xalq yazıçısı Zəlimxan Yaqub, Milli Məclisin deputatı Elmira Axundova və Xalq artisti Arif Babayev çıxış edərək Mehriban xanım Əliyevanın genişmiqyaslı fəaliyyətini əks etdirən kitabın rus dilində variantının hazırlanmasını yüksək qiymətləndiriblər. Bildirilib ki, YUNESKO-nun 41 xoşməramlı səfiri sırasında Azərbaycanın birinci xanımının da olması ölkəmizin ən yeni tarixinin parlaq səhifələrindəndir. Mehriban xanım Əliyevanın təşəbbüsü ilə Azərbaycanın zəngin, bənzərsiz mədəni irsinin qorunması və təbliği, təhsil və səhiyyə sahələrində həyata keçirilən genişmiqyaslı layihələr təkcə ölkəmizdə deyil, beynəlxalq aləmdə də yüksək qiymətləndirilir.
Sonda tədbirin iştirakçıları Mehriban xanım Əliyevanın fəaliyyətini əks etdirən və Heydər Əliyev Fondu tərəfindən müxtəlif illərdə çap edilmiş kitabların sərgisinə maraqla baxıblar.

Paylaş:

Baxılıb: 1364 dəfə