Milli Məclisin Müdafiə, təhlükəsizlik və korrupsiya ilə mübarizə komitəsinin iclası keçirilib

Bakı:

25 °C

63 %

0 m/s

Əlaqə

AZ RU EN

Ana səhifə / Siyasət / Milli Məclisin Müdafiə, təhlükəsizlik və korrupsiya ilə mübarizə komitəsinin iclası keçirilib

Milli Məclisin Müdafiə, təhlükəsizlik və korrupsiya ilə mübarizə komitəsinin iclası keçirilib

17.11.2017 [10:15]

Noyabrın 16-da Milli Məclisin Müdafiə, təhlükəsizlik və korrupsiya ilə mübarizə komitəsinin növbəti iclası keçirilib.
AZƏRTAC xəbər verir ki, Milli Məclis sədrinin birinci müavini, komitənin sədri Ziyafət Əsgərov iclasın gündəliyinə altı məsələnin daxil olduğunu deyib. Birinci məsələ “Azərbaycan Respublikasının Silahlı Qüvvələri haqqında” qanun layihəsidir. Qeyd edib ki, bu sahəni tənzimləyən Qanun 1991-ci ildə qəbul olunmuş və hazırda qüvvədədir. Birinci oxunuşda müzakirəyə təqdim olunan bu qanun layihəsinin qəbul olunması zərurəti isə ölkəmizdə keçirilmiş sonuncu referendum nəticəsində Konstitusiyaya edilmiş dəyişikliklərdən sonra yaranıb. Yeni qanun silahlı qüvvələrimizin hüquqi bazasının möhkəmləndirilməsi baxımından mühüm əhəmiyyətə malikdir. Qanun layihəsi Konstitusiyamıza və digər hərbi qanunvericilik aktlarına uyğundur. Bu qanun qüvvəyə mindiyi gündən əvvəlki qanun qüvvədən düşəcək.
Qanun layihəsinin müzakirəsi zamanı deputatlar Fərəc Quliyev, Zahid Oruc, Aydın Mirzəzadə və Müdafiə Nazirliyinin nümayəndəsi Rauf Kişiyev çıxış edərək yeni qanunun üstünlüklərindən danışıblar.
Müzakirələrdən sonra qanun layihəsi birinci oxunuşda Milli Məclisin plenar iclasında müzakirəyə tövsiyə edilib.
İclasda deputatlar “1999-cu il 28 dekabr tarixində Vaşinqton şəhərində imzalanmış “Azərbaycan Respublikası Hökuməti və Amerika Birləşmiş Ştatları Hökuməti arasında kütləvi qırğın silahlarının yayılmasının qarşısının alınması və müdafiə sahəsində tədbirlər haqqında Saziş”in növbəti yeddi il müddətinə uzadılmasına da razılıq veriblər.
Sonra deputatlar “2005-ci il martın 30-da Varşava şəhərində imzalanmış Azərbaycan Respublikası Hökuməti və Polşa Respublikası Hökuməti arasında müdafiə sahəsində əməkdaşlıq haqqında Sazişdə dəyişikliklər edilməsi barədə Azərbaycan Respublikası Hökuməti və Polşa Respublikası Hökuməti arasında” Protokolun təsdiq edilməsi haqqında” məsələyə müsbət münasibət bildiriblər. Qeyd olunub ki, dəyişikliyə əsasən, tərəflər arasında əməkdaşlıq çərçivəsində mübadilə edilən məxfi məlumatın mühafizəsi ayrıca sazişin müddəaları ilə tənzimlənəcək.
Bildirilib ki, iclasın gündəliyinə daxil edilmiş növbəti üç məsələ İnzibati Xətalar Məcəlləsinə uyğunlaşdırma xarakteri daşıyır və texniki xarakterlidir. Beləliklə, “Azərbaycan Respublikasının 1994-cü il 23 sentyabr tarixli 885 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin İntizam nizamnaməsi”ndə dəyişiklik edilməsi haqqında, “Azərbaycan Respublikasının 1994-cü il 23 sentyabr tarixli 886 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin Qarnizon və qarovul xidmətləri nizamnaməsi”ndə dəyişikliklər edilməsi haqqında”, həmçinin “Azərbaycan Respublikasının 1994-cü il 23 sentyabr tarixli 887 nömrəli Qanunu ilə təsdiq edilmiş “Azərbaycan Respublikası Silahlı Qüvvələrinin daxili xidmət nizamnaməsi”ndə dəyişiklik edilməsi haqqında” qanun layihələri də Milli Məclisin plenar iclasında müzakirəyə tövsiyə edilib.

Paylaş:

Baxılıb: 452 dəfə