KTMT Azərbaycanın ərazi bütövlüyünü tanıyır və dəstəkləyir

Bakı:

31 °C

48 %

5 m/s

Əlaqə

AZ RU EN

Ana səhifə / Siyasət / KTMT Azərbaycanın ərazi bütövlüyünü tanıyır və dəstəkləyir

KTMT Azərbaycanın ərazi bütövlüyünü tanıyır və dəstəkləyir

25.07.2009 [11:04]

Təşkilatın yaydığı bəyanatda deyilir ki, KTMT Azərbaycanın istəyi və razılığı olmadan onun ərazisində sülhyaratma missiyası funksiyasını öz üzərinə götürməyəcək və bu qurum Dağlıq Qarabağ məsələsi ilə məşğul olmur
ötən həftə MDB ölkələrinin bir sıra kütləvi informasiya vasitələrində özünü “qırğız eksperti” kimi qələmə verən anonim mənbəyə istinadla dərc edilmiş məqalədə Kollektiv Təhlükəsizlik Müqaviləsi Təşkilatının (KTMT) Ermənistan-Azərbaycan münaqişə zonasında sülhyaratma əməliyyatında iştirak etməyə hazır olduğu bildirilmişdi. Bir neçə gün sonra, iyulun 17-də isə KTMT-nin mətbuat xidməti bu məsələ ilə əlaqədar bəyanat yaydı. Bəyanatda bildirilir ki, Azərbaycan KTMT-də təmsil olunmadığından, bu təşkilatın Dağlıq Qarabağ münaqişəsinin tənzimlənməsi prosesində bilavasitə iştirak etməsi gözlənilmir: “... Azərbaycan KTMT-yə üzv ölkələr sırasında yer almadığından, biz Bakının razılığı olmadan öz hərbi hissələrimizi onun ərazisinə daxil edə bilmərik”.
Bəyanatda o da vurğulanır ki, KTMT Azərbaycanın istəyi və razılığı olmadan onun ərazisində sülhyaratma missiyası funksiyasını öz üzərinə götürməyəcək və bu qurum Dağlıq Qarabağ məsələsi ilə məşğul olmur.
Göründüyü kimi, bəyanatda Dağlıq Qarabağ və onun ətraf rayonları konkret olaraq Azərbaycanın tərkib hissəsi kimi göstərilir. Bununla da münaqişənin həlli ətrafında Azərbaycanın suveren hüquqları əsas prinsip kimi götürülür. Bu isə o deməkdir ki, Azərbaycanın tutduğu rasional mövqe və sərgilədiyi praqmatik xarici siyasət kursu nəticəsində ölkəmizin ərazi bütövlüyünü tanıyan və dəstəkləyən təşkilatlar sırasına KTMT də qoşulub. Uzun müddət KTMT-nin Dağlıq Qarabağ münaqişəsi ətrafında tutduğu mövqe anlaşılmaz - sürüşkən müstəvidə cərəyan etsə də, hazırda bu qurum Dağlıq Qarabağ münaqişəsinin beynəlxalq hüquq normalarına əsasən, yəni, Azərbaycanın ərazi bütövlüyü çərçivəsində öz həllini tapması prinsipini dəstəkləməkdədir. Belə ki, təşkilatın üzv dövlətləri Rusiya, Qazaxıstan, Qırğızıstan, özbəkistan, Tacikistan və Belarusla Azərbaycan arasında müxtəlif istiqamətli qarşılıqlı faydalı münasibətlər mövcuddur və əlaqələr inkişaf müstəvisindədir. Bununla yanaşı, həmin ölkələr tərəfindən dəfələrlə səsləndirilən bəyanatlarda Dağlıq Qarabağ münaqişəsinin həllində ərazi bütövlüyünün əsas prinsip kimi götürülməsinin vacibliyi vurğulanıb.
Digər tərəfdən, KTMT-nin aparıcı dövləti Rusiya ilə Azərbaycan arasında münasibətlər daim yüksələn xətlə inkişaf etməkdə və qarşılıqlı tərəfdaşlığa əsaslanan əməkdaşlıq münasibətləri mövcud olmaqdadır. Moskva Dağlıq Qarabağ münaqişəsinin nizamlanması istiqamətində də yüksək fəallıq nümayiş etdirməkdə və Azərbaycanın ərazi bütövlüyünü tam dəstəkləməkdədir. Azərbaycan və Ermənistan prezidentləri arasında baş tutmuş son üç görüşün ikisinə Rusiyanın ev sahibliyi etməsi və Moskvanın təşəbbüsü ilə tərəflər arasında atəşkəs elan edilməsindən bu yana ilk dəfə siyasi bəyannamə - “mayndorf bəyannaməsi”nin imzalanması buna təcrübi faktdır. Eyni zamanda təşkilat üzvlərinin münaqişə ətrafında tutduğu mövqedən bəlli olur ki, Ermənistan KTMT-nin üzvü olsa da, Dağlıq Qarabağ münaqişəsinin həlli istiqamətində tutduğu mövqeyə və sərgilədiyi fəaliyyətə görə təşkilat üzvləri tərəfindən dəstəklənmir.
Dolayısıyla, Azərbaycanın beynəlxalq aləmdə möhkəmlənən və Dağlıq Qarabağ münaqişəsinin beynəlxalq hüquq normalarına əsasən həll edilməsi ətrafında sərgilədiyi qəti mövqeyinə paralel olaraq KTMT də daxil olmaqla regional və qlobal aktorların, demək olar ki, hamısı tərəfindən Azərbaycanın ərazi bütövlüyü tanınmaqda və dəstəklənməkdədir.
Nurlan QƏLƏNDƏROV

Paylaş:

Baxılıb: 1429 dəfə