Dünya üzrə birinci onluğa daxil olmuş alim...

Bakı:

17 °C

88 %

4 m/s

Əlaqə

AZ RU EN

Ana səhifə / Siyasət / Dünya üzrə birinci onluğa daxil olmuş alim...

Dünya üzrə birinci onluğa daxil olmuş alim...

24.07.2009 [12:58]

Şahlar Əsgərovun 40 il öncə başladığı tədqiqatın nəticələrindən bu gün NASA və Avropa Kosmik Tədqiqatlar Mərkəzi tərəfindən geniş istifadə olunur
Azərbaycan dünya elminə töhfə verən, böyük mütəfəkkirlər yetişdirən aktiv məkanlardan biridir. Fəlsəfə tarixində Bəhmənyar, İbn-Sina, Nəsrəddin Tusi kimi mütəfəkkirlər təhsil, elm fəlsəfəsinə dair dəyərli fikirlər söyləmiş, dünya miqyasında yayılan nəzəriyyələr yaratmışlar...
Müasir dövrdə də Azərbaycan mütəfəkkirləri təhsil sahəsində dünya dövlətlərinin texnoloji çevikliyini artıran yeni elmi nəzəriyyələr ortaya qoymuşlar. Bunların ən bariz nümunəsi kimi, Lütfi-Zadənin yaratdığı qeyri-səlis məntiq nəzəriyyəsini göstərmək olar. Amma bəzi hallarda dünya əhəmiyyətli elmi nəzəriyyələr hazırlayan azərbaycanlı alimlər diqqət mərkəzindən kənarda qalır. Əslində isə, dünya miqyasında aparılan araşdırmalara nəzər saldıqda bəlli olur ki, xarici ölkələrin alimlərinin ən çox istinad etdikləri mənbə də məhz həmin azərbaycanlı alimlər olur...
Belə ki, bir müddət öncə internet axtarış sistemində apardığımız araşdırmaların nəticəsi olaraq bir faktla rastlaşdıq. www.biblioteca.universia.net, www.sgc.engin.umich.edu, www.ntrs.nasa.gov, www.adsabs.harvard.edu, www.springerlink.com, www.etd.caltech.edu və digər saytlarda Yeni Azərbaycan Partiyasının İdarə Heyətinin üzvü, Bakı Dövlət Universitetinin professoru Şahlar Əsgərovun ionlarla metalların bombardmanı zamanı metalların yeyilməsi, katod tozlanması araşdırması ilə tanış olduq.
Klivlend şəhərində Levis Araşdırmalar Mərkəzinin mütəxəssisi Maris A.Mantenieks hazırladığı ağır ionlarla iş prosesində enerjinin alınması məruzəsində Şahlar Əsgərovun tədqiqatlarına böyük yer ayrıb. Tədqiqatçı qeyd edir ki, ağır ionlarla iş, katod tozlanması araşdırmaları hələ 60-cı illərdə Şahlar Əsgərov və Sena tərəfindən başlanılıb: “Şahlar Əsgərovun və Senanın apardığı araşdırmaların nəticələri sonradan bu sahədə böyük nailiyyətlərin əldə olunmasına geniş yol açdı”.
Məruzə müəllifi, həmçinin, bildirib ki, Əsgərov və Senanın tədqiqatları bu sahədə mühüm nailiyyətlər əldə etmiş Stuart və Wehnerin əldə etdiyi nəticələrlə demək olar ki, eynilik təşkil edir.
Bununla da, ağır ionlarla iş prosesi məruzəsini davam etdirən mütəxəssis daha 9 yerdə Şahlar Əsgərovun elmi araşdırmalarının nəticələrinə istinad edir...
Amma təəssüflə qeyd etməliyik ki, Maris A.Mantenieks məruzəsində Şahlar Əsgərovun araşdırmalarının bu günə qədər diqqət mərkəzindən kənarda qaldığını da yazıb.
Məlumat üçün bildirək ki, katod tozlanması ağır ionlarla aparılan bir prosesdir. Şahlar Əsgərovun 40 il öncə başladığı bu tədqiqat sahəsinin nailiyyətləri bu gün NASA, Avropa Kosmik Tədqiqatlar Mərkəzi tərəfindən geniş istifadə olunur. çünki bu elmi tədqiqatın nəticələrindən hazırda kosmik tədqiqatlarda istifadə edirlər. Bu elmi araşdırmaları ilə Şahlar Əsgərov dünya üzrə 10 alim sırasında layiqli yerini tutduğunu bir daha sübut etmiş olur.
Qeyd edək ki, XX əsrdə raketlər kimyəvi yanacaqla işləyirdisə, XXI əsrdə artıq bu elmi araşdırmaların nəticələrindən istifadə edərək ion mühərriklər hazırlanır və kosmosa aparatların çıxarılmasında bu mühərriklərin rolu getdikcə artır.
ümumiyyətlə, ion mühərrikləri 70-ci illərdən bəri diqqəti cəlb edib. Əlbəttə ki, bu dövrə qədər kosmik sənaye mövcud idi. Amma ağır ionlarla iş prosesi bu sahədə ikinci mərhələnin başlanmasına rəvac verib.
Xatırladaq ki, artıq 2000-ci ildən bəri ion mühərrikləri vasitəsilə kosmosa bir çox aparatlar da aparılıb.
Ramil VƏLİBƏYOV

Paylaş:

Baxılıb: 1464 dəfə