“Türkiyə FETÖ ilə mübarizədə Azərbaycanın dəstəyini yüksək qiymətləndirir”

Bakı:

25 °C

59 %

4 m/s

Əlaqə

AZ RU EN

Ana səhifə / Siyasət / “Türkiyə FETÖ ilə mübarizədə Azərbaycanın dəstəyini yüksək qiymətləndirir”

“Türkiyə FETÖ ilə mübarizədə Azərbaycanın dəstəyini yüksək qiymətləndirir”

13.07.2017 [09:55]

Erkan Özoral: 15 iyul Türkiyə Cümhuriyyəti üçün önəmli dönüş nöqtəsi, Türkiyə demokratiyası üçün mühüm sınaq oldu
2016-cı il iyulun 15-də Türkiyədə baş vermiş dövlət çevrilişinə cəhddən bir il ötür. Türkiyənin Azərbaycandakı səfiri Erkan Özoral dünən bununla bağlı mətbuat konfransı keçirib.
Jurnalistlər qarşısındakı çıxışına iyulun 4-də Ermənistan silahlı qüvvələrinin Füzuli rayonunun Alxanlı kəndini atəşə tutması nəticəsində ikiyaşlı Zəhra Quliyevanın və nənəsinin həlak olmasına münasibət bildirməklə başlayan səfir işğalçıların bu hərəkətini bir daha lənətlədiyini deyib.
Sonra 2016-cı il iyulun 15-də baş verənlər barədə danışan Erkan Özoral həmin gecə çevrilişə cəhd göstərənlərin törətdikləri vəhşiliyin dünyada tayı-bərabərinin olmadığını, FETÖ-nün dövlət çevrilişinə cəhd zamanı Türkiyə xalqının sərt müqaviməti ilə üzləşdiyini, həmin vaxt 250 nəfərin şəhidlik zirvəsinə ucaldığını, 2000-dən artıq vətəndaşın yaralandığını bildirib: “Bu hadisələr zamanı xalq meydanlara axışaraq mövqeyini nümayiş etdirdi. Türk millətinin hər bir fərdi 15 iyulda ölkə Prezidentinin çağırışı ilə küçələrə çıxıb, canlarını xainlərin silahlarına sipər etdi. Siyasi partiyalar, media və qeyri-hökumət təşkilatları da dövlətin yanında oldu”.
Erkan Özoral çevrilişə cəhd edən xainlərin insanlıqdan və vicdandan kənar davranışlar sərgilədiklərini bildirərək, onları Fətullah Gülənin əmrlərini düşüncəsiz şəkildə icra edən robot adlandırıb.
Çıxışına davam edən diplomat Azərbaycanın hər zaman olduğu kimi, 15 iyul hadisələri zamanı da Türkiyənin yanında olduğunu vurğulayıb. Buna görə Azərbaycan xalqına, Prezidentinə təşəkkür edən Erkan Özoral deyib: “Bildiyiniz kimi, FETÖ terror təşkilatı Türkiyənin xaricində də şəbəkələşib. Türkiyə xaricində də FETÖ-yə qarşı layiqli mübarizə aparılır. Azərbaycan FETÖ-yə qarşı mübarizədə daim Türkiyəyə dəstək verib. Türkiyə FETÖ ilə mübarizədə Azərbaycanın dəstəyini yüksək qiymətləndirir. Təəssüf ki, Türkiyə FETÖ ilə mübarizədə beynəlxalq təşkilatlardan zəruri dəstəyi almır. Azərbaycan isə ilk gündən bu məsələdə bizi dəstəklədi və dəstəkləməyə davam edir. Tarix boyu müşahidə edilən bu həmrəyliyin ən müasir nümunəsi isə başda Prezident İlham Əliyev olmaqla, Azərbaycan xalqının Türkiyədə 15 iyul dövlət çevrilişi cəhdinə qarşı verdiyi dəstəkdir”.
“15 iyul Türkiyə Cümhuriyyəti üçün önəmli dönüş nöqtəsi, Türkiyə demokratiyası üçün mühüm sınaq oldu”, - deyən səfir qeyd edib ki, dövlət çevrilişinə cəhddən sonra Türkiyə iqtisadiyyatı daha yaxşı inkişaf edib, terrora qarşı layiqli mübarizə aparılıb.
Sonra jurnalistlərin suallarını cavablandıran diplomat bildirib ki, Fətullah Gülənin Türkiyəyə ekstradisiya olunması ilə bağlı danışıqlar davam edir. Onun sözlərinə görə, çevriliş cəhdindən sonra FETÖ ilə əlaqəli olan 130-140 min nəfər saxlanılıb ki, onlardan da 45 min nəfərinə həbs cəzaları verilib.
Nadir AZƏRİ

Paylaş:

Baxılıb: 644 dəfə