Yaponiyadakı Azərbaycan diasporu Ermənistan silahlı qüvvələrinin təxribatını pisləyən bəyanat yayıb

Bakı:

18 °C

72 %

5 m/s

AZ RU EN

Ana səhifə / Siyasət / Yaponiyadakı Azərbaycan diasporu Ermənistan silahlı qüvvələrinin təxribatını pisləyən bəyanat yayıb

Yaponiyadakı Azərbaycan diasporu Ermənistan silahlı qüvvələrinin təxribatını pisləyən bəyanat yayıb

07.07.2017 [09:47]

Yaponiyada fəaliyyət göstərən Azərbaycan-Yaponiya Dostluq Mərkəzi iyulun 4-də Ermənistan silahlı qüvvələri tərəfindən Füzuli rayonunun Alxanlı kəndinin iriçaplı silahlardan atəşə tutulması nəticəsində mülki şəxslərin öldürülməsi ilə bağlı bəyanat yayıb.
Təşkilatın Facebook səhifəsində yapon və ingilis dillərində yerləşdirilən bəyanatın surəti BMT-nin baş katibi Antonio Quterreşə, Avropa Parlamentinin baş ofisinə, İnsan Hüquqları üzrə Avropa Məhkəməsinə, ATƏT-in Minsk qrupunun həmsədrlərinə, Yaponiya parlamentinin yuxarı və aşağı palatalarının sədrlərinə, Yaponiya Xarici İşlər Nazirliyinə də göndərilib.
Bəyanatda qeyd edilir ki, baş verən faciə nəticəsində mülki şəxslər - Quliyeva Sahibə və onun 2 yaşlı nəvəsi Quliyeva Zəhra öldürülüb, Quliyeva Sərvinaz isə yaralanıb. Bu faciə Azərbaycan torpaqlarının işğal altında saxlanılmasının region üçün nə qədər ciddi təhlükə olduğunu, eyni zamanda, Ermənistan dövlətinin terrorçu və işğalçı mahiyyətini bir daha ortaya qoyur.
Ermənistan silahlı qüvvələrinin Azərbaycanın dinc əhalisinə və mülki obyektlərinə yönəlmiş artilleriya zərbələri sübut edir ki, Ermənistan dövləti təcavüzkar siyasəti ilə beynəlxalq hüququn normalarını, beynəlxalq humanitar hüququn və insan haqlarının, xüsusilə 1949-cu il Cenevrə Konvensiyasını və ona 1 saylı Əlavəni, həmçinin Uşaqların hüquqlarına dair və İnsan hüquqlarının müdafiəsi və fundamental azadlıqlara dair Konvensiyanı ciddi şəkildə pozmaqda davam edir.
Bəyanatda deyilir: “Biz dünya ictimaiyyətinə, beynəlxalq təşkilatlara, ATƏT-in Minsk qrupunun həmsədr ölkələrinə, Birləşmiş Millətlər Təşkilatına müraciət edərək, onları təcavüzkara qarşı konkret addımlar atmağa, beynəlxalq hüququn normalarına uyğun sərt sanksiyalar tətbiq etməyə israrla çağırırıq.
Beynəlxalq ictimaiyyətin erməni vəhşiliyinə göz yumması təcavüzkarın əl-qolunu daha da açır, törətdiyi cinayətlərin cəzasız qalması Ermənistan ordusunun Azərbaycanın dinc sakinlərini qətlə yetirməsinə səbəb olur.
Bu ağır və çətin günlərdə sonsuz kədər və hiddətimizi ifadə edərək, həlak olanların ailələrinə, yaxınlarına, bütün Azərbaycan xalqına dərin hüznlə başsağlığı veririk. Xüsusi olaraq bəyan edirik ki, Azərbaycan dövlətinin torpaqlarımızın işğaldan azad olunması, təcavüzkarın cəzalandırılması istiqamətində atdığı bütün addımları dəstəkləyirik. Əminik ki, Azərbaycan dövləti bu qanlı cinayəti törədənlərin layiqli cəzalarını alması üçün bütün zəruri tədbirləri görəcək”.
Azərbaycan-Yaponiya Dostluq Mərkəzi dünya birliyini və beynəlxalq təşkilatları baş verən hadisəyə biganə qalmamağa, Ermənistan tərəfinin Azərbaycan ərazilərini işğal etməsi faktı ilə bağlı daha sərt tədbirlər görməyə çağırıb.

Paylaş:

Baxılıb: 456 dəfə