Bu gün Azərbaycan yüksək iqtisadi artıma malik olan, sürətlə inkişaf edən gənc demokratik ölkədir

Bakı:

27 °C

58 %

7 m/s

AZ RU EN

Ana səhifə / Siyasət / Bu gün Azərbaycan yüksək iqtisadi artıma malik olan, sürətlə inkişaf edən gənc demokratik ölkədir

Bu gün Azərbaycan yüksək iqtisadi artıma malik olan, sürətlə inkişaf edən gənc demokratik ölkədir

09.07.2009 [10:39]

Bu fikir Azərbaycan Diplomatik Xidmətinin 90 illiyinə həsr olunmuş “Azərbaycan qlobal siyasətdə: xarici siyasətin formalaşması” adlı beynəlxalq konfransda səsləndirilib
Dünən Bakıda Azərbaycan Respublikasının Diplomatik Xidmətinin 90 illiyinə həsr olunmuş “Azərbaycan qlobal siyasətdə: xarici siyasətin formalaşması” adlı beynəlxalq konfrans keçirilib. Konfransa sədrlik edən xarici işlər nazirinin müavini Hafiz Paşayev 90 il əvvəl Şərqdə ilk demokratik dövlət olan Azərbaycan Xalq Cümhuriyyətinin (AXC) yarandığını, bu dövlətin qurulması ilə diplomatik xidmətin əsaslarının qoyulduğunu diqqətə çatdırıb.
Azərbaycanın xarici siyasət idarəsinin rəhbəri Elmar Məmmədyarov Xarici İşlər Nazirliyinin yaranması, keçdiyi yol və qarşıda duran vəzifələr barədə konfrans iştirakçılarına ətraflı məlumat verib.
E.Məmmədyarov vurğulayıb ki, Sovet İttifaqının dağılması ilə Azərbaycan xalqı öz müstəqilliyini bərpa etmək və dövlətçiliyini inkişaf etdirərək möhkəmləndirmək üçün tarixi fürsət qazanıb. Həmin vaxtlar çoxları qonşu Ermənistanın hərbi təcavüzünə məruz qalıb, ağır iqtisadi böhranın və daxili qeyri-sabitliyin hökm sürdüyü Azərbaycanın bu mürəkkəb vəziyyətdən çıxacağına və uğur qazanacağına inanmırdı. 1993-cü ildə ümummilli lider Heydər Əliyevin Prezident seçilməsindən sonra Azərbaycanın müstəqilliyi və suverenliyinin möhkəmləndirilməsi istiqamətində uğurlu strategiyanın həyata keçirilməsinə başlanılıb. Ulu öndər Heydər Əliyev xarici əlaqələrimizi genişləndirib, ölkənin uzunmüddətli inkişafının təməlini qoyub. Bugünkü Azərbaycan dövlətçiliyinin köklərinin Azərbaycan Xalq Cümhuriyyəti ilə bağlı olduğunu deyən nazir bildirib ki, AXC-nin qısa müddət ərzində mövcud olmasına baxmayaraq, Xarici İşlər Nazirliyi də daxil olmaqla əsas dövlət institutları məhz həmin dövrdə yaradılıb.
Ermənistan-Azərbaycan, Dağlıq Qarabağ münaqişəsinin nizamlanmasının xarici siyasətimizin bir nömrəli prioriteti olduğunu qeyd edən E.Məmmədyarov vurğulayıb ki, biz münaqişənin həlli üçün erməni hərbi qüvvələrinin işğal olunmuş Azərbaycan ərazisindən çıxarılması, bu ərazilərdə Azərbaycanın pozulmuş suveren hüquqlarının bərpası, məcburi köçkünlərin öz doğma yurdlarına qaytarılması, qanuni və demokratik proses çərçivəsində Dağlıq Qarabağda Azərbaycan və erməni icmalarının dinc yanaşı yaşaması və Azərbaycan Respublikasının tərkibində muxtariyyətini təmin edəcək statusun müəyyənləşdirilməsindən başqa bir yol görmürük. Azərbaycan münaqişənin sülh yolu ilə nizamlanmasına sadiqdir və münaqişənin beynəlxalq hüququn norma və prinsiplərinə uyğun ədalətli həllinin dəstəklənməsi üçün bütün səylərini səfərbər etməklə öz tərəfdaşları, beynəlxalq və regional təşkilatlarla aparılan işi davam edəcək.
Türkiyənin keçmiş xarici işlər naziri və parlamentinin sabiq sədri Hikmət çətin ölkəmizin qısa müddətdə böyük nailiyyətlər əldə etdiyini vurğulayaraq bildirib ki, bu gün Azərbaycan yüksək iqtisadi artıma malik olan, sürətlə inkişaf edən gənc demokratik ölkədir. Azərbaycan öz milli maraqlarının gerçəkləşdirilməsi, habelə, regional və qlobal mövqelərinin möhkəmləndirilməsi üçün özünün iqtisadi və siyasi imkanlarından məharətlə istifadə edir.
Ulu öndər Heydər Əliyevin ölkəmizin Avroatlantika məkanına inteqrasiyası yolunda böyük xidmətləri olduğunu qeyd edən H.çətin deyib ki, bu gün Azərbaycan beynəlxalq aləmdə etibarlı tərəfdaş kimi tanınıb.
Rusiya prezidentinin sabiq xüsusi nümayəndəsi və keçmiş energetika naziri Viktor Kalyujnı, CNN agentliyinin baş siyasi icmalçısı Bil Şnayder və başqaları bildiriblər ki, Azərbaycan dövlətlərin suveren bərabərliyi prinsipinə əsaslanan müstəqil xarici siyasət yürüdür. Azərbaycan bütün ölkələrlə dostluq və qarşılıqlı səmərəli əlaqələrini inkişaf etdirməklə öz regionunda və onun sərhədlərindən kənarda mehriban qonşuluğu təşviq etməkdə çox maraqlıdır.
Beynəlxalq konfrans işini sessiyalarda davam etdirib. Sessiyalarda “Bölgə təhlükəsizlik və münaqişələr: Güc tarazlığının tapılması”, “Bölgədəki iqtisadi və enerji inkişafı - xarici siyasət amili” mövzularında məruzələr dinlənilib, müzakirələr aparılıb.
Konfransda Azərbaycanın xarici ölkələrdəki səfirləri ilə yanaşı, bir çox ölkələrin xarici siyasət idarələrinin nümayəndələri iştirak ediblər.
Konfrans çərçivəsində “Azərbaycan qlobal siyasətdə: Xarici siyasətin formalaşması” kitabının təqdimatı olub.

Paylaş:

Baxılıb: 1475 dəfə